Tamagarange 15 - Ngudradreadrekadhane Ka Sisiu 魯凱語聖經

¹ Sangilribatenga ku lavai, ikai ki kalakitalekane, ku Samesunge la iluku ku vaeva ku kiu mwa drele ki taelrelreini. Ku Samesunge la kawriva ki tama ki taelrelreini, “Lri mudaanaku silape ki taelrelreli.” Ku tama ki taelrelreini la kai pawbangalre iniane pudaane,

² la iya kai iniane, “Kiapawtengaku ka malrasesu iniane, lakamani ku pwali pakarudrange ki natalragisu sa karudrarudrangesu. Kai agini mathaithariri iniane, lri dulrusu mwa karudrange iniane.”

³ La iya kai ku Samesunge, “Kikai kwidra kiaecebaku ki swa Pelisitine, kadrwa ku naika akicapilaneli!”

⁴ Kwini lasu la pwalra ku 300 ku kalailalri, la malra kwini tawthu ki kalailalri paerece patadrusadrusa, la erece ku taliwlare ka apwi,

⁵ La pwa padalai, la malra kwini ki lakalailalri pwa ki angangade ki swa Pelisitine. La pwa lama pakanaelre kudra nimalranenga si kaika nimalraneana ku lamugi, adravane ka babuduane ka maulriwlrivane mialri lama.

⁶ Ku swa Pelisitine la silape drele luka aneane kudra paiya kikai, la thingale ala ka amani ku Samesunge ka paiya, Asi lwiyane kwini tama ki taelrelreini (swa Timena) wamalra kwini ki taelrelreini si pamwa ki natalragini sa karudrarudrange. Lakamani kwini swa Pelisitine la mwa ki daane ki tama ki taelrelreini; la lama kwini ki alisu, la mialri lama ki daane ki tama ki taelrelreini.

⁷ Ku Samesunge la iya kai, “Kikai paramia numi kikai ka kadrwa ku ulalengane, kiaketeketaku, lu kainaku bilri kikai uramane kainaku lri pisadra lutuumane!”

⁸ Ku Samesunge la pia kwidra paparu bulabulai papacai, papacai ku tathathatha ku umawmase. Sakabilrilanenga kwini lasu la kela ka Itame, si ikaikai ki barungulu ka alrisapesape.

Ku Samesunge pamalebe ki swa Pelisitine

⁹ Ku swa Pelisitine la kela ka Yuda, ikai kwini tutakwapingane, si kikaruburu mwa ki cekele Lehi.

¹⁰ Ku swa Yuda la kivaga liniane, “Anu kela kikai si kikaruburu naiane?” Kwini lalasu la kawriva, “Wakela nai pwalra ki Samesunge; ku tapangimianeini naiane, lri mialri nai pangimia iniane.”

¹¹ Lakamani kwidra, la ta 3,000 ku swa Yuda ku wakela kwini barungulu ka alrisapesape kavai Itame silape ki Samesunge, si iya kai iniane, “Laibekace kaisu thingale ala ka swa Pelisitine ku warathudu naiane? Pamatiakurungasu naiane!” Ku Samesunge la tubalre, “Twathadalranaku kudra tapangimiane lini nakwane si tungimiyaiya bilri liniane!”

¹² Kwini lalasu la pelaela ki Samesunge, “Ku kela nai kikai, lri kerenge nai muswane, si malra muswane baai ki swa Pelisitine.” Ku Samesunge la kawriva, “Kunumi kiketeketaili, kai numi lri pwalrima nakwane.”

¹³ Kwini lalasu la tubalre, “Unu, lri malra nai muswane si kerenge lakakathane, si baai ki lalasu; kai nai lri papacai muswane.” Kwini lalasu la arakai ku drusa ku bavane ka calrisi malra kerenge ki Samesunge, si iluku mulatadre ki barungulu.

¹⁴ Ku Samesunge sa kela Lehi, ku swa Pelisitine la makitu lrabwale mwa kidredresenge iniane, si akwadradrau kawriva iniane. Ku Ri ki Tamatama la kela iniane, la pasapukwane iniane; kwini lasu sa kirimu ngikudukudu, kwini sakerengane ku drusa ki alrimaini ku calrisi la mia ki kwalamanga ki apwi ka lrekelreke ka calrisi.

¹⁵ Kwini lasu la kidringai ku vaeva ku kaina ka marudame ka bathingi ki ruba, la siludu, si arakai kwini bathingi papacai ki takudrulu ka umawmase.

¹⁶ Ku Samesunge la ngitatu senai: Arakaiyaku ku vaeva ku bathingi ki ruba papacai ki takudrulu ka umawmase; arakaiyaku ku vaeva ku bathingi ki ruba si abate ku wapacai ka kinawmasane.

¹⁷ Kwini lasu samaka kawrivanga la malra cilri kwini bathingi ki ruba. Lakamani kwini kadaengane kwini kipasi “Ramathe Lehi”.

¹⁸ Sakabilrilanenga, ku Samesunge la kakadhame turamuru; kwini lasu la kitubi ki Tamatama, “Kikai paakacisu ki sasiakawlusu turamuru; kikai ani kiara kadhamane pacai, si kipwalra kwini ki labadha ka swa Pelisitine amiasu?”

¹⁹ Ku Twaumase la malra paegacane ku kadaengane ka Lehi, la kainganai ngiburai ku taciladhane. Samaka ungulunga kwini lasu, la siwlri sapukwane. Lakamani, kwini acilai kisunagane pasi Hakure, pakela kaikameane yakaiyana ka Lehi.

²⁰ Sa rathurathudwana ku swa Pelisitine, ku Samesunge ataramagarange ki swa Iseraylri taramapusale ka caili.