Tamagarange 14 - Ngudradreadrekadhane Ka Sisiu 魯凱語聖經

Samesunge si ababai ka swa Timena

¹ Yakai saka minakavalane, ku Samesunge la mwa ka Timena; kwini lasu la drele ku tangea ku swa Pelisitine ka tawvailekete.

² Kwini lasu la mubalriu si pelaela ki marudrawdrangeini, “Wadrelaku ku tangea ku tawvailekete ikai Timena ka swa Pelisitine, lu mwa rakete anika taelrelreli la iya.”

³ Kudra marudrawdrangeini la kivaga iniane, “Asu nau patwalailringa kwini ki sakamaelanane ka badha ka swa Pelisitine kudra lrika taelrelresu? Laibekace ka kadrwa ku amaka kidringadhaneta ikai ki zuku ki sakacekeleta ku tawvailekete?” Ai ku Samesunge la kawriva ki tamaini, “Madalamaku iniane turamuru; lu mwa rakete iniane.”

⁴ Ku marudrawdrangeini kai wathingale ala ka Tamatama ka ani pia kwini amiamia ki Samesunge, asi lwiyane ku Twaumase waranau ku lrika akiecebane ki swa Pelisitine. Kikwini kwidra, amani ku swa Pelisitine ka warathudu ki swa Iseraylri.

⁵ Ku Samesunge si marudrawdrangeini la mwa ka Timena. Kwini lalasu sa ngukakai ki babudwane kwini, kwini lasu la kilalra ku lrulai ka raiyungu ku wagirigiringi iniane.

⁶ Ku Ri ki Tamatama la kirimu mwa ki Samesunge, kwini lasu la aralrialrima pwa papacai kwini ki raiyungu, mia ki papacai ki tikiane ka kiu. Kwini lasu la kai pathingale ki marudrawdrange kwini tapianeini.

⁷ Ku Samesunge la mwa drele kwini ki tawvailekete, kikawriva iniane; ku Samesunge la kadalame turamuru iniane.

⁸ Sangilribatenga ku vai, ku Samesunge la kela tulrevege rakete iniane. Sa ikadadalranane, kwini lasu la ngibangulu drele kudra papacaini kudra raiyungu, ala drele ku latumu si tuvalu ikai ki kinawmasane ki raiyungu.

⁹ Kwini lasu la malra ngubeekele pikai ki alrimaini, takudadadavace si takukanekane. Ala mwa ki marudrawdrangeini, si baai liniane ku valu, kwini marudrawdrangeini la kane; ai ku Samesunge la kai pelaela liniane kwini valu ala ka malraini patwalai ki wapacai ka kinawmasane ki raiyungu.

¹⁰ Ku tamaini la mwa ki daane ki alisu, ku Samesunge la singikai kwini ki zidai ku kakudhane ki yacengecenge, ikai kwini si pangiakaneane.

¹¹ Ku swa Pelisitine la drele ki Samesunge, la sikawlu ku tamatulrulu tupapalra iniane.

¹² Ku Samesunge la iya kai liniane, “Ala nau anazu ku vaeva, lwiyasi la dulru numi makathingale kwini anazu ikai kai ki minakapitulane ka takarudrarudrangane lri baadhaku numiane ku tinukucingalrane ku kaimadhane si nirukudrane ka laimai;

¹³ lwiyasi la kai numi maka thingale, kunumi makanaelre lri baai numi nakwane kudra kaimadhane si rukudrane ka laimai.” Kwini lalasu la iya kai, “Ala pelaela nai kilalalra kwini anazu!”

¹⁴ Ku Samesunge la iya kai: Kudra la akaneane twalai kudra ki lri kane; kudra la malimeme la twalai ki sapukwane. Kwini lalasu la kidredredreme makatulrulunga laka kadrwa ku maka wathingale.

¹⁵ Saka samakasupatele, kwini lalasu la kawriva ki taelrelre ki Samesunge, “Kusu ala kalrilrigila si la thingale kwini anazu ki taelrelresu, lu kai ngimianga kwini, lri pwa nai lama ki daane ki tamasu patuelre, si paelre muswane lama. Kunumi ka tadrusa ku dawlu numi naiane pakai ku aribicane numi naiane?”

¹⁶ Ku taelrelre ki Samesunge la kirimu tubitubi ikai cucubungu iniane iya kai, “Malrasesu nakwane, kaisu ka tengane kadalame nakwane! Waanazusu ki sakacekeleli, la kaisu maka pelaela nakwane.” Ku Samesunge la kawriva, “Adravane ka marudrawdrangeli kadrwa ku tapelaelaneli liniane, lai lri kirimwaku maka pelaela muswane?”

¹⁷ Kwini taelrelreini ikai kwini ki nimakapitulane ka tapangiakanekaneanane ki takarudrarudrangane, kwini taelrelre ki Samesunge la ngwalai kikai si tubi ngikamiamiane. Saka samakapitulu, ku Samesunge la kai beserenga ki taelrelreini kiara upungu iniane la pelaela iniane, kwini alisu la katwase pelaela ki swa Pelisitine.

¹⁸ Saka samakapitulu, ku Samesunge sakaiyana mudaane ki tapeapecane, ku laumawmase ki cekele la kela drele ki Samesunge, iya kai: Manemane ku lrika silrialribate ki valu ku limemane? Yakaiyana ku drumane ku lrika sapupukwane ki raiyungu? Ku Samesunge la tubalre: Lwiyasi kai arakai ku tina ka lwangeli pavilringi, nai kai numi maka thingale lutuumane kikai anazu!

¹⁹ Ku Ri ki Tamatama la kirimu kela ki Samesunge, pasapukwane iniane, kwini lasu la katwase mwa ka Asekelungu, la papacai ku tamatulrulu ku umawmase, si malra mulaimai liniane, la malra kudra sangiragelanane lini si la baai kwini ki wathingale ku anazu ka laumawmase sangilribatenga, kwini lasu la kalisi liniane turamuru, si katwase mwa ki daane ki tamaini.

²⁰ Ku taelrelreini sakabilrilane la mwa ki natalragini sa karudrarudrange karudrange.