Tamagarange 13 - Ngudradreadrekadhane Ka Sisiu 魯凱語聖經

Takitulalakane ki Samesunge

¹ Ku swa Iseraylri la pasaalriwnga ki Tamatama, ku Tamatama la pakela ki swa Pelisitine rathudu liniane taramasupatele ka caili.

² Kikwini kwidra, yakai ku umawmase ka zuku ki Dange, ku naganeini sia Manua, yakaikai ka cekele Zura. Ku labaibaini la kai maka tulalake, la ka kadrwa ku lalake.

³ Ku sasiakawlu ki Tamatama subelebelenge la adrelane ki labaibaini, si iya kai, “Kaisu maka twalalake, laka kadrwa ku lalakesu, ai kailri tarathainunga lalri katawbalirisu, si tulalake ku tangea ku sawvalai.

⁴ Kusu la dradrela, ku malrupi ku bava si sapukwane ka bava madha ungungulu, la madha kanekane ku kaika nitumabulane ikai ki lrisi sanaka maneemane.

⁵ Asi lwiyane lri tulalakesu ku tangea ku sawvalai. Lu kitulalakenga kwini lalake, madha gulrugulrugulru ku isiuini, asi lwiyane kwini lasu sana kitulalake patarumara ki Twaumase ka amani kudra Kiatukudha ki kakudhane ki langumawmawmase. Kwini lasu lri sangiluku palribulu ki swa Iseraylri kidaili ki swa Pelisitine.”

⁶ Kikai alisu la pelaela ki tawaneini, “Yakai ku tangea ku umawmase ki Twaumase la adrelane nakwane; kudra tangimianeini mia ki sasiakawlu ki Twaumase, matipathimithimi. Kainaku kiavaga twalaisu inu iya; la kai pelaela nakwane ka sia aneane.

⁷ Kwini lasu amia kai nakwane, lri katawbaliraku, si tulalake ku vaeva ku sawvalai. Kwini lasu madha ungungulu ku malrupi ku bava si sapukwane ka bava, la madha kanekane kudra kaika mabula ku lamanemane ikai ki lrisi; asi lwiyane kwini lalake sana kitulalake patarumara ki Twaumase, lani pakela ki wapacai kidaili ki kakudhane ki umawmase.”

⁸ Ku Manua la papia ki Tamatama kitubi, “Tamatama, kudra pakainganaisu kudra umawmase ki Twaumase pakelaanga mwa naiane kai, lani bulru ku lrika apangimiane kwini ki lrikitulalake.”

⁹ Ku Twaumase la kilalra kudra takitubiane ki Manua. Kwini alisu sa nene ikai angangade, ku sasiakawlu ki Twaumase belenge la siwlri mucucubungu iniane. Kikwini kwidra, ku taelrelreini ka Manua kai yakai;

¹⁰ kwini alisu la lrabwale mwa pelaela ki taelrelreini, “Drela! Kudra wakela nakwane ku umawmase adrelanenga nakwane.”

¹¹ Ku Manua la ngidrakale tupalra ki labaibaini, mwa kwini ki umawmase cucubungu, si kivaga iniane, “Amanisu kwidra kiakawriva ki taelrelreli?” Kwini umawmase la tubalre, “Unu” iya.

¹² Ku Manua la kawriva, “Kwini takawrivanesu lu ngimianga kwidra, lri tungitwatumane nai bulru tuadrau iniane? Si lrika ngitwatumane ku tapanianiakaneini?”

¹³ Ku sasiakawlu ki Tamatama ka yabelenge la tubalre, “Kwi taelrelresu lri tara paluludu kudra pelaelali iniane.

¹⁴ Kwini alisu kai lri kane sanaka nituakaneanane ara budu, kai lri ungulu kudra malrupi ka bava si sapukwane ka bava, kai lri kane kudra kaika mabula kudra lamanemanenga ikai ki satulrisiane. Ku pelaelali iniane patuelre, kwini alisu lri tara paluludu.”

^15-16 Ku Manua la kai thingale kwini ki umawmase ala ka sasiakawlu ki Tamatama, la iya kai iniane, “Ala madha katwatwaseana! Nai culwana ku vaeva ku tikiane ku sawvalai ka kiu si pakane muswane.” Kudra sasiakawlu la kawriva, “Adravane asurwana naku, kainaku lri kane kwini akaneane. Lwiyasi la lamasu, malra kamani tu Lama ka lrisi si patarumara ki Tamatama!”

¹⁷ Ku Manua la kawriva, “Ala sia aneane ku naganesu? Lu ngimianga kikai vagasu, nai pangibilri musakene muswane.”

¹⁸ Ku sasiakawlu la tubalre, “Asu nau kivagalringa iya ku naganeli? Kwini yai palrealrebane ka nagane.”

¹⁹ Ku Manua la iluku ku vaeva ku tikiane ka sawvalai ka kiu si lataleke tu Taleke ka lrisi, si pubelenge ki lrenege ki tapatarumaramarane, la patarumara ki palrealrebane lu twatumane ka Tamatama.

^20-21 Ku kelrabe ki apwi sa twalai ki tapatarumaramarane mubelenge; ku Manua si taelrelreini wadrele ki sasiakawlu ki Tamatama ikai kwini ki kelrabe mubelenge. Ku Manua kikai ala thingale kwini ki umawmase ka twalai ki Tamatama ka sasiakawluini; kwini lasu si taelrelreini la guruthunganenga ikai daedae. Kwini lalasu la kai pelanga drele kwini ki sasiakawlu.

²² Ku Manua la kawriva ki taelrelreini, “Lri tara pacaita, ngwalai kikai tadrelaneta ki Twaumase.”

²³ Ai kwini taelrelreini twabalre, “Lwiyasi ku Tamatama lalri papacai mitane, nai kai tarumara kikai patarumarata ka Lama ka lrisi si Taleke ka lrisi, nai kai padrele mitane kilakikai; la nai kai ikai si pelaela mitane kikai lavaga patuelre.”

²⁴ Ku taelrelre ki Manua la tulalake ku vaeva ku sawvalai, la sunagane iniane pasi Samesunge. Kikai vavalake la swasuai kadradrau; ku Tamatama la subulrubulru iniane.

²⁵ Kwini lasu sa ikai kavai kabicelrakane Zura si Isetawle, ki taikaiyane ki Dange, ku Ri ki Tamatama la pathagilinga sueteane iniane.