Tamagarange 12 - Ngudradreadrekadhane Ka Sisiu 魯凱語聖經

Yepeta si swa Iparaime

¹ Ku swa Iparaime kiapadulrunga ku akikaruburane; kwini lalasu talwabalre ka kadravane Yuredange, kela ka Zapunge, la kawriva ki Yepeta, “Asu lribate pagisane mwa kikaruburu ki swa Amune kai dawlu naiane patupalra? Lri pwa nai lama muswane si daanesu!”

² Ku Yepeta la tubalre liniane, “Kunaku si sakacekeleli saka paramuru makakaruburu ki swa Amune; nakiatubiaku paraluba naiane iya, la kai numi pukawnu kela paralubu naiane.

³ Sa drelaku ka kai numi lri kela, la kipacai lribate ki pagisane kikaruburu ki swa Amune. Ku Tamatama la paakaci naiane. Kikai anu kirimu kela kikaruburu nakwane?”

⁴ Ku Yepeta la sarubu makanaelre ki swa Gileade, si makakaruburu ki swa Iparaime, la pamalebe liniane. (Kikai swa Iparaime naamia kai, “Kunumi ka swa Gileade ka yakaikai Iparaime si Manase amani numi ku mwabere ka kwapingi ki Iparaime manemane numi.”)

⁵ Ku swa Gileade la malranga ku talupiale ku tatalubalrebalreane ka kadravane Yuredange, telenge ki swa Iparaime mubere, lwiyasi la ikai ku swa Iparaime ku mwabebere ku kwapingi, la kivaga ku swa Iparaime iniane, “Swa Iparaimesu?” Lwiyasi kwini umawmase la tubalre, “Ini iya!”

⁶ Kwini lalasu la pakawriva iniane iya kai, “Sibebulethe”, asi lwiyane kai swa Iparaime kai madringelrese lu avavaga, lri tara “Sibebulithe” iya ku lingau lini; lu ngimia kikai, ku swa Gileade la malra ruthuku iniane, la pikai tatalubalrebalreane ka kadravane Yuredange pwa papacai iniane. Kikwini kwidra, ku swa Iparaime ikai ku 42,000 ku kiapapacai.

⁷ Ku Yepeta ku taatamagarangananeini ki swa Iseraylri taraeneme ka caili. La pacainga, la kidralreke ikai ki cekeleini ka Gileade.

Ibezange, Ilunge, Abedunge

⁸ Sapacainga ku Yepeta, la atamagarange ki swa Iseraylri ku Ibezange ka swa Bithelrihime.

⁹ Kwini lasu tamatulrulu ku lalalakeini ku sawvalai, la tamatulrulu ku lalabaibai ku lalalakeini. Kwini lasu la pakithareve ki lalakeini mwa ki drumane ki ricingi ka zuku, la patwalai ki drumane ka ricingi ka zuku tulrevege ku labaibai ki lalakeini ka tamatulrulu. Ku Ibezange atamagarange ki swa Iseraylri tarapitu ka caili.

¹⁰ Sapacai kwini lasu, la kidralreke pikai Bithelrihime.

¹¹ Sapacainga ku Ibezange, la kamaninga ku Ilune ka swa Zibulungu ka atamagarange ki swa Iseraylri tara mangeale ka caili.

¹² Sapacai kwini lasu, la kidralreke pikai ka Aiyalungu ka Zibulungu.

¹³ Sapacainga ku Ilune, la kamaninga ku Abedungu ka lalake ki Hilele ka swa Pirathunge ku atamagarange ki swa Iseraylri.

¹⁴ Kwini lasu tamasupatele ku lalalakeini ku lasawvalai, tamatulrulu ku lagaganeini; kwini lalasu la ngukai ki mapitulu ku laruba. Ku Idume taravalru ka caili ku atamagaranganeini ki swa Iseraylri.

¹⁵ Kwini lasu la pacai, la kidralreke pikai tali lregelrege ki swa Amaleke, kavai Pirathunge tali Iparaime.