Tamagarange 11 - Ngudradreadrekadhane Ka Sisiu 魯凱語聖經

¹ Ku Yepeta ka swa Gileade amani kwidra magarange ka kwapingi. Ku tinaini laka pairairange; ku tamaini ka Gileade,

² si tinaini la tulalake ku tapiya ku lalake lini; kikai lalalake sa kadrawnga la pakatwase ki Yepeta. Kwini lalasu la iya kai iniane, “Kaisu lri maka mucungulu kai tacekecekelane ki tama nai, lalakesu ki pairairange.”

³ Ku Yepeta la katwase ki labetakaneini mubere, si ikaikai ka Tube. Kwini lasu la dawlu kudra ki lagurucucuki; kwini lalasu la tupapalra iniane.

⁴ Sangilribatenga si kawlainga, ku swa Amune la makakaruburu ki swa Iseraylri.

⁵ Sa kirimunga makakaruburu, ku lamarudrange ki swa Gileade la mwa ka Tube dawlu ki Yepeta siwlria iya.

⁶ Kwini lalasu la kawriva iniane, “Ala kamania ku warathudu naiane, si sangiluku naiane kikaruburu ki swa Amune.”

⁷ La kawriva ku Yepeta, “Ku paswalala kai numi ka malrase nakwane la malra numi nakwane pakatwase ki daane ki ama? Kikainga sa kipadradresengenga numi kai akwalriane, manemaneana ku kela numi kipasilape nakwane?”

⁸ Ku lamarudrange ki swa Gileade la kawriva ki Yepeta, “Kikai wakela nai kipasilape muswane, ani sangiluku naiane kikaruburu ki swa Amune amia nai muswane, si atamatama ki swa Gileade patuelre.”

⁹ Ku Yepeta la kawriva, “Ani siwlri amia numi nakwane si kikaruburu ki swa Amune, lwiyasi ku Tamatama la paakaci nakwane, lri atamatamaku numiane.”

¹⁰ Kwini lalasu la kawriva, “Palraingi nai, lri tara kilalra nai ku tapadrekadrekasanesu; ku Tamatama anika amani ku wasiwmi naiane.”

¹¹ Ku Yepeta la katwasenga tupalra ki lamarudrange ki swa Gileade siwlri; ku mapapangale la cegecege iniane atamatama si tamatama ki kwapingi. Ku Yepeta la ikai Mizepa pelaela icucubungu ki Tamatama ku vagaini.

¹² Ku Yepeta la sikawlu ku wamwa ki talialalai ka Amune, si kawriva, “Manemane ku akidrikisanesu naiane? Asu malra kwini kadaengane nai?”

¹³ Ku talialalai ki Amune la tubalre ki sasiakawlu ki Yepeta iya kai, “Ku swa Iseraylri sa katwase Izipiti wadrikisi ku kadaenganeli, twalai kadravane Arenunge kela kadravane ka Yabuke, daruru ka kadravane Yuredange Kikai, kunumi ngumathaitharira sawlri nakwane kikai kadaengane.”

¹⁴ Ku Yepeta la sikawlunga ku wamwa kikawriva ki talialalai ki swa Amune,

¹⁵ si kawriva iniane, “Ku swa Iseraylri kadrwa ku taravasane ku kadaengane ki swa Muabe si swa Amune.

¹⁶ Ku patengatengane, ku swa Iseraylri sa katwasenga ka Izipiti, ngwakakai ka calragulragu kela ka laveke Suize, ala kela ka Kadise.

¹⁷ Sakamani kwidra, kwini lalasu la sikawlu ku wamwa kitubi ki talialalai ki swa Idume ku apalraingane pangukakai ki kadaengane lini, ai ku talialalai ki swa Idume la kai palraingi. Kwini lalasu la sikawlu ku wamwa kitubi ki talialalai ki Muabe ku apalraingane pangukakai ki kadaengane lini iya, kwini lasu la mialri kai palraingi. Lakamani ku swa Iseraylri ikainga ka Kadise.

¹⁸ Sakabilrilanenga kwini lalasu la katwase arucucubungu ngukakai calragulragu, lragau ki kadaengane ki swa Idume si kadaengane ki swa Muabe, kela tali talrawane Muabe. Kwini lalasu la ikai drakerale Arenunge cegecege ku balrawbau lini, kai talwabalre kadravane Arenunge, asi lwiyane amani saka pagisane ki swa Muabe.

¹⁹ Ku swa Iseraylri la sikawlu ku wamwa kitubi ki talialalai ki swa Amuri, kwini ki talialalai ki swa Hesebunge ka Sihunge, ku apalraingane pangukakai ki kadaengane lini, mwa ki kadaengane ki swa Iseraylri.

²⁰ Ai ku talialalai ka Sihunge kai palraingi; kwini lasu kiarimulringa sangiluku nguelre ki kwapingini ikai Yazare tutakwapingane, si kikaruburu ki swa Iseraylri.

²¹ Ku Tamatama ka Twaumase ki swa Iseraylri la malra ki talialalai ka Sihunge si lakwapingini makanaelre baai ki swa Iseraylri; kwini lalasu la pamalebe ki swa Amuri, si malra ku kadaengane lini.

²² Ku swa Iseraylri wamalra patuelre ku kadaengane ki swa Amuri, si malranga ku kadaengane lini, twalai tali lrawdru ka kadravane ka Arenunge kela ka tali dradha ka kadravane ka Yabuke, twalai tali talrawane calragulragu kela ka tali sapakalriwgu kadravane Yuredange

²³ Lakamani kwidra, amani ku Tamatama ka pasiakai ki swa Iseraylri pakatwase ki swa Amuri.

²⁴ Nau malra sawlri kikai kadaengane amiamiasu? Ku baai ki twaumase numi ka Kemuse ku kadaengane, lri dulru numi malra; ai ku Tamatama ka Twaumase nai kudra baaini patuelre, lri tara palakebe nai.

²⁵ Sapupukwanaku ki Balake ka lalake ki Zipure ka talialalai ki swa Muabe amiasu? Kwini lasu kadrwa ku takirimwane lelemethe ki swa Iseraylri, la kai kiecebe naiane.

²⁶ Ku swa Iseraylri la malra ku lacekele ki swa Hesebunge si la ngiathalringulu ka cekele, Aruire si la ngiathalringulu ka cekele, si patuelre ku cekele ki tara balrealreanane ka kadravane Arenunge, ikai ku tara 300 ka caili. Ikai kikai caili, anu kai sawlriwlri kikai kadaengane?

²⁷ Kunaku kadrwa ku tapasalrivaneli numiane, kikai la kikaruburusu nakwane, si kiecebe nakwane. Ku Tamatama amani ku tara saibange; kaikameane twaringaringau ku tangimiane si kaika tangimiane ikai ki swa Iseraylri si swa Amune.”

²⁸ Ai, ku talialalai ki Amune kai wathengete ku sikawlu ki Yepeta pelaela ku Vagaini.

²⁹ Sakamani kwidra, ku Ri ki Tamatama la mwa ki Yepeta, kwini lasu la ngukakai Gileade, Manase, siwlri mwa ka Mizepa ka Gileade, papia ka Amune.

³⁰ Ku Yepeta la kithupu ki Tamatama iya kai, “Lwiyasi paakacisu nakwane ki swa Amune,

³¹ lu siwlringa naku, lri tara malraku kudra aswalalanga twalai ki lrawlrawdru naiyanane kidredresenge nakwane ku umawmase si patarumara muswane, la malra iniane tu Lama ka lrisi si patarumara.”

³² Kwini Yepeta la talubalre ki kadravane si makakaruburu ki swa Amune; ku Tamatama la paakaci liniane.

³³ Kwini lasu la kikaruburu liniane, twalai Aruire kela ka talikai Minethe, ku adailane wakela ka Abele Kiramime, paelrelre talumapusale ku cekele, palraaingi papacai amudu ki laumawmase. Kikai, ku swa Amune la kipamaki ki swa Iseraylri.

Ababai ka lalake ki Yepeta

³⁴ Ku Yepeta sa siwlri mubalriu si kela ka Mizepa linianane, kwini vaeva ka ababai ka lalakeini la malra ku kalringikingi dralradralrai kidredresenge iniane.

³⁵ Sa drele ku Yepeta iniane, la tubi turamuru si thuriace ku laimai. La iya kai, “Lalakeli, asu pakiangeange kai kidremedremeli! Asu ka amani? Twakavagavaganga naku kiketekete ki Tamatama, kainaku lri maka sawlringa!”

³⁶ Ku lalakeini la iya kai, “Kwini kiaketeketengasu ki Tamatama, pangimia ku kiketeketengasu si la pangimia nakwane, asi lwiyane ku Tamatama pangiabilringa ikai ki kinawmasane ki swa Amune.”

³⁷ Ku lalakeini la kitubi iniane, “Vaeva ku akitubianeli muswane, ala palraingaili katwase tavanane tara drusa ka dramare, madha thethethengete nakwane; lri taruelreaku ki lalialili mwa ka lregelrege, pasikai ku kaika takitharevaneanali si la pacai tubi.”

³⁸ Ku Yepeta palraingi iniane tara drusa ka dramare katwase tavanane, kwini alisu la taruelre ki lalialini mwa lregelrege, la ikai kwini ngwalai kudra kaika takitharevananaini la pacai si tubitubi.

³⁹ Sa tara drusanga ka dramare, la siwlri mwa ki tamaini, ku Yepeta la pangimia kudra takiketeketaneini ki Tamatama. Sa pacai kwini lalakeini tawvaileketeana. Sakabilrilinga, yakai ku kakudhane ki swa Iseraylri,

⁴⁰ ku labaibai ki swa Iseraylri, luka caili matwase ki daaneini maka supatele ka vai, matwase si tubi ngulrialringau ki lalake ki Yepeta ka ababai ka swa Gileade.