Tamagarange 10 - Ngudradreadrekadhane Ka Sisiu 魯凱語聖經

Tula

¹ Sa pacainga ku Abimileke, ku lalake ki Pua, agane ki Dudu ka Tula la ngibwalenga palribulu ki swa Iseraylri. Kwini lasu zuku ki swa Isakare, yakaikai ka Samire ka tali lregelrege ka Iparaime.

² Kwini lasu atamagarange ki swa Iseraylri tara 23 ka caili. Sa pacainga, la dralreke pikai Samire.

Yaire

³ Sa pacainga ku Tula, lakamani ku Yaire ka swa Gileade ku tamagarange ki swa Iseraylri tara 22 ka caili.

⁴ Kwini lasu tamatulrulu ku sawvalai ku lalakeini, ngukai ki taimatulrulane ku ruba. Kwini lalasu yakai kwini tali Gileade laka matulrulu ku cekele; pakela kaikameane kikai lacekele kiapasi Hade Yaire.

⁵ Ku Yaire sa pacainga, la dralreke pikai Kamunge.

Yepeta

⁶ Ku swa Iseraylri la pasaalriwnga ki Tamatama. Kwini lalasu la sukusukubu ki Baale si Asetarete, si latwaumase ki Siria, ki Sidune, ki Muabe, ki Amune si Pelisitine. Kwini lalasu kiadaili ki Tamatama, kai sukubu iniane.

⁷ Ku Tamatama la kaelaela ki swa Iseraylri, malra liniane si baai ki Pelisitine si Amune.

⁸ Tara 18 ka caili tulisi si tusinalreme ki yakai tali talrawane kadravane Yuredange, ikai ki swa Amuri, swa tali Gileade ka swa Iseraylri.

⁹ Ku swa Amune la talubalre kadravane Yuredange mwa kikaruburu ki swa Yuda, swa Biniyamingi si swa Iparaime. Ku swa Iseraylri kia kelanga ku maadrau turamuru ku apacadhane lini.

¹⁰ Ku swa Iseraylri la kitubi ki Tamatama, iya kai, “Pasalriu nai muswane; la kidaili nai muswane ka Twaumase si sukubu ki Baale.”

¹¹ Ku Tamatama la tubalre, “Kunadruma, twasinalreme numiane kudra laumawmase ka swa Izipiti, swa Amuri, swa Amune, swa Pelisitine,

¹² swa Sidune, swa Amaleke si swa Maune, la kitubi numi nakwane, la kainaku palribulu numiane?

¹³ Ai, la katwaseana numi kidaili nakwane, si mwa sukusukubu ki latwaumase. Lakamani kikai, kainaku lri palribulunga numiane.

¹⁴ Lu katwasa kitubi kudra pilri numi ka latwaumase! Lu matikurunga numi anika amani kwini lalasu ku palribulu numiane!”

¹⁵ Ai, ku swa Iseraylri la kawriva ki Tamatama, “Pasalriu nai; ku nau pia kwini taiyanesu naiane ngisasingikaiya. Ai kathane kikaikameane tara palribula naiane!”

¹⁶ Kwini lalasu la musuburu cilri kwini yakai liniane ka twaumase ki sakamaelanane ka kuni, si sukubunga ki Tamatama. Ku Tamatama la ngwalai ku sakwalrialri ki swa Iseraylri si la kwalri ku kidremedremeini turamuru.

¹⁷ Ki kwini, ku kwapingi ki Amune yakai Gileade ki takwapingane, kipadulru ku akikaruburane. Ku swa Iseraylri la mialri isaruburubunga, ikai Mizepa ka Gileade.

¹⁸ Ku lazuku ki swa Iseraylri kudra yakai tali Gileade ku lakiacapili si mapapangale la makawrivariva iya kai, “Ala kudra aswala mwa kikaruburu ki Amune, lrika amani ku atamatama ki mapapangale ki swa Gileade la iya.”