Tamagarange 1 - Ngudradreadrekadhane Ka Sisiu 魯凱語聖經

Ku zuku ki Yuda si Simiune waravase ki Adunibezeke

¹ Sa pacainga ku Yesua, ku swa Iseraylri la kivaga ki Tamatama, “Ikai naiane ka lazuku la lrika aneane ka zuku ku lrika aswalalanga mwa kikaruburu ki swa Kanange?”

² Ku Tamatama la tubalre, “Lrika swa Yuda ku aswalalanga mwa. Lri baadhaku liniane kikai kadaengane.”

³ Kwini swa Yuda la kawriva ki retesane lini ka zuku ki Simiune, “Abwala tupalra naiane tamwa kavai nibaadhanenga naiane ka kadaengane, karedele kikaruburu ki swa Kanange, lakamani ku atupapalrane nai numiane mwa ki kibaai numi ku kadaengane.” Kwini swa Simiune si

⁴ swa Yuda la maelre katwase kikaruburu; ku Tamatama la malra ki swa Kanange si swa Perizi baai liniane. Kwini lalasu la papacai ku takudrai ku umawmase ikai Bizeke,

⁵ Si la ikai kavai kipadradresenge ki Aduni Bizeke, la makakaruburu iniane.

⁶ Ku Aduni Bizeke la katwase mubere; la saladha kwini lalasu, si ravase iniane, malra thiabe retege kwini dradrangalrane ki alrima si drapale.

⁷ Ku Aduni Bizeke la kawriva, “Yakai ku nata mapitulu ku latalialalai ku kiathiabe nakwane ku dradrangalrane ki alrima si drapale; kwini lalasu la ikai ki tailebeane ki takanekaneane ka cukwili siludu ku sangukaneane ku akaneane. Kaiasasane ku Twaumase singiakai kudra tapangimianeli si pawcugunga nakwane.” Kwini lasu la ki iluku pwa ka Yerusalrime, la pacai ikai kavai.

Ku zuku ki Yuda wamalra ka Yerusalrime si Hiburunge

⁸ Ku swa Yuda kiakaruburu ki swa Yerusalrime. Kwini lalasu la malranga kavai cekele, papacai kwini ki umawmase ki cekele, si pwa lama kwini ki cekele.

⁹ Kwini lalasu la pacungulu kikaruburu ki yakai lregelrege, yakai tali taililingane, si swa tali salrawlrawdrunga ka takameamealane ka swa Kanange.

¹⁰ Kwini lalasu la mialri kikaruburu kwini ki yakai cekele Hiburungu ka swa Kanange (nasia Kiriathe Areba kai Hiburunge), la pamalebenga ki zuku ki Sesai, Ahimane si Talamai.

Ku Uthenile wamalra ka cekele Debire

¹¹ Ku swa Yuda ka zuku twalai kwini mucekele kikaruburu ki swa Debire; kikai Dibere kunadruma sia Kirathe Sepere.

¹² Ku swa Yuda ka zuku ka Kalebe amia kai, “Ku aneane ku maka wamalra Kirathe Sepere, lri malraku ki lalakeli ka Akesa pamwa iniane karudrange.”

¹³ Ku Uthenile ka lalake ki Kenaze ka agi ki Kalebe la malra kwini cekele; ku Kalebe la pakarudrange ki lalakeini ka Akesa pamwa iniane.

¹⁴ Saka takarudrarudrangane ka vai, ku Uthenile la pakagarange ki Akesa mwa kitubi ki tamaini ku taluvale ku kadaengane. Ku Akesa sa mulebe ki tangukaiyane ka ruba, ku Kalebe la makakaai kivaga iniane ku murikaikaini luka manemane,

¹⁵ kwini alisu la iya kai, “Ala baadhaili ku vaeva ka saceacebe; mwarikaiyaku ku tacebeane ki acilai, asi lwiyane kudra baaisu nakwane ku kadaengane yadrepele ka takameamealane.” Ku Kalebe la malra kwini tali belenge si tali lebe ka tacebeane ki acilai patuelre baai iniane.

Tapamalebeane ki zuku ki Yuda si Biniyamingi

¹⁶ Ku lamwabaibalrithi ki tama ki tawane ki Musi amani kai swa Keni; kwini lalasu maredele ki swa Yuda twalai ki abare ka cekele Yeriku, mwa ka tali lrawdru ubulane Yuda kavai Arade, ikai kwini ki laumawmase ki swa Amaleke.

¹⁷ Ku swa Yuda maredele ki retesane lini ka Simiune mwa kavai, si maelre pamalebe ki yakai cekele Zipathe ka swa Kanange, malra kwini ki cekele kabebetethe patuelre, la pasi Hurema.

^18-19 Ku Tamatama paralubu ki swa Yuda, kwini lalasu la malra kwini lregelrege, ai kai wamalra ka Gaza, Asekelungu, Ikerungu si kadaengane ka ngiathalringulu kai ki lacekele. Kikai yakai tali babiabila ki laveke ka laumawmase yakai ku palridingi lini ku sakikaruburuburane, lakamani kwidra ku swa Yuda kai maka pakatwase liniane.

²⁰ Singiakai ku tadrekasane ki Musi, ku Kalebe la kibaainga ka Hiburungu; kwini lasu la malra kwini ki taitulruane ka zuku ka mwabaibalrithi ki Anake pakatwase ki cekele.

²¹ Ku swa Biniyamingi kai pakatwase ki yakai Yerusalrime ka swa Yebuse, lakamani kwidra ku swa Yebuse pakelana kaikameane taelreana ki swa Biniyamingi ikai kavai.

Ku zuku ki swa Iparaime si zuku ki Manase wamalra ka Bithele

^22-23 Ku zuku ki Iparaime si zuku ki Manase kiakaruburu mwa ka cekele Bithele; kwini cekele sia Luze ku nagane. Ku Tamatama la paralubu liniane. Kwini lalasu la sikawlu ki taralrilriu mucekele lrilriu;

²⁴ kwini walrilriu la drele ku tangea ku umawmase twalai cekele mulatadre, la mwa kivaga iniane, “Ala pelaela naiane watumane madu si mudaane cekele, kai nai lri papacai muswane la iya.”

²⁵ Kwini umawmase la pelaela liniane. Kwini zuku ki Iparaime si Manase la malra papacai demedeme kwini umawmase ki cekele, kathanenga kwini lasu si wacekecekeleini ku nipasurane.

²⁶ Sakabilrilanenga, kwini lasu la mwa ki kadaengane ki swa Hite, ikai kwini cegecege ku taluvale ku cekele, la sunagane kwini pasi Luze; kikai cekele pakela kaiasasane thadalraneana sinagane kikai nagane.

Kai ka pakatwase ki swa Iseraylri ka laumawmase

²⁷ Ku zuku ki Manase kai wamalra kwini ki yakai Bithe Sane, Tanake, Dure si Ibelame, Migidu si ngwadadethe ka cekele ka umawmase pakatwase; kwini swa Kanange pacungulu ikai kwini, kadrwa ku takirimwane iga.

²⁸ Sa aru karakacenga ku swa Iseraylri, kwini lalasu la vutha malra paaduri ki swa Kanange, ai kai wamalra nguelre liniane pakatwase.

²⁹ Ku zuku ki Iparaime kai pakatwase kwini ki yakai cekele Gizere ka swa Kanange, lakamani kwidra ku swa Kanange pacungulu taelre liniane ikai kavai.

³⁰ Ku zuku ki Zibulungu kai pakatwase kwini ki laumawmase ki yakai cekele Kiterunge si Nahalale, lakamani kwini ki swa Kanange pacungucungulwana ikai kwini, ai kia paaduri ki swa Zibulungu.

³¹ Ku zuku ki Asere kai pakatwase kwini ki laumawmase ki yakai Akeku, Sidune, Ahelabe, Akezibe, Heleba, Apike si Rihube,

³² kwini lalasu la taelre kwini ki swa Kanange, kai pakatwase liniane pulatadre.

³³ Ku zuku ki Napetali kai pakatwase kwini ki yakai cekele ka Bithe Simise si Bithe Anathe. Kwini lalasu la taelre kwini ki swa Kanange, ai wamalra vutha kikwini ki laumawmase pakwalri pakauawngu.

³⁴ Ku swa Amuri wamalra kwini ki zuku ki Dange vutha pwa ka lregelrege, kai palraingi liniane mudratane.

³⁵ Ku swa Amuri pacungucungulu ikai Aiyalungu, Salebime si lregelrege Herese; ai kudra swa Iparaime si Manase pamalebe liniane pakwalri pakauawngu.

³⁶ Ku pagisane ki swa Idume twalai Akerabime ka tangutikiane ka kadalranane pathagili, yakai tali dradha ka Sila.