Takatwasane Izipiti 9 - Ngudradreadrekadhane Ka Sisiu 魯凱語聖經

(Mwasaka lrima) Swalrubu

¹ Ku Tamatama kawriva ki Musi, “Lu mwa kikawriva ki talialalai ki swa Izipiti, pelaela iniane, ku Tamatama ka Twaumase ki swa Hiburu amia kai, ‘Pakatwasa ki kawkawluli, lani katwase sukubu nakwane.

² Lwiyasi kaisu tarumaranga si pakatwase liniane,

³ lri pulebeaku ku taingeane ku matiaukukuludru ku sapapacai si pathavungu muswane: Kwini lapulapusu patuelre, ki kwini larigi, laruba, lalrakeda, lalwange, lanikiubawbalane ka kiu si lakiu lri kikela ku paramuru ka swalrubu.

⁴ Lri pakakaelaku ki lanilapulapwane ki swa Iseraylri si nilapulapwane ki swa Izipiti, ku lanilapulapwane ki swa Iseraylri lrika kadrwa ka navaevanga ku wapacai.

⁵ Kunaku ka Tamatama malritheethengaku pikai lwiya putaluvaivai kikai pinangu Twaumasane ka puku.’ ”

⁶ Sakakaiyane, ku Tamatama la pangimia ku taiyaneini pia kwini. Sanaka nilapulapwane ki swa Izipiti la makitu kisaela ki swalrubu si pacainga, ai kudra lanilapulapwane ki swa Iseraylri laka kadrwa ka navaevanga ku kawlrase.

⁷ Ku talialalai la kivavaga, la thingale kudra lanilapulapwane ki swa Iseraylri laka kadrwa ku navaevanga ku wapacai. Ai ku takidremedremaneini laka sakamiana kakawlukulu, kai pakatwase ki mapapangale.

(Mwasaka eneme) Mapu

⁸ Sakabilrilane, ku Tamatama kawarivanga ki Musi si Arungu, “Malra pasingi talabwane gemegeme ku abu, lani ka Musi ku piacucubungu ki talialalai si papubebelenge sabulu.

⁹ Kikai thuvugu lri mia ki thuvugu ki dae sarau alraelre Izipiti, ku thuvugu sana makakai ki umawmase si lanilapulapwane lri makitu ngithabucu tunana, si kapu.”

¹⁰ La katwase malra ku abu, la mucucubungu ki talialalai. Ku Musi la malra kwini abu si cabungu papubebelenge, kwini thuvugu la makakai ki laumawmase si lanilapulapwane la makitu ngithabucu si kapu.

¹¹ Kudra lataraivigi la kai maka pangimia picucubungu ki Musi, asi lwiyane mialri lini ka ngimiyaiya ki swa Izipiti ngithabucu ku kinawmasane kapu.

¹² Ai ngiamia ku nataiyane ki Tamatama, ka amanini ku pakakawlukulu ki takidremedremane ki talialalai ki swa Izipiti, kai kilalra ku vaga ki Musi si Arungu.

(Mwasaka pitu) Kananu

¹³ Sakabilrilane, ku Tamatama la pelaela ki Musi, “Lwiya ki mialrealre mwa kikawriva ki talialalai, pelaela iniane, ku Tamatama ka Twaumase ki swa Hiburu amia kai, ‘Pakatwasa ki kawkawluli, lani katwase si sukubu nakwane.

¹⁴ Kikainga lwiyasi la kaisu kilalra, kainaku lri pathavungu ki lasasiakawlusu si lamapapangalesu sikakathane, adravane kusu lri kipaelresu kipathavungu. Lu mia kikai lalri thingalesu kai yakawmasane kadrwa ku paramia nakwane.

¹⁵ Alaiyasi arakaiyaku ku swalrubu pathavungu muswane si mapapangalesu, naika maamudunga numi.

¹⁶ Ai pakai ku apathingalaneli kikai pukuli, papanianiyakeana naku muswane, ku lrika apasalraelreane kai naganeli kawmasane.

¹⁷ Ai sakamiiananasu ngitatwadrau, si kai pakatwase ki kawkawluli.

¹⁸ Lwiya lumiamia kai, lri pulebeaku ku kananu; ikai ki lrikisi ki swa Izipiti kadrwana ku takathane ku paramurane mulebe ku kananu.

¹⁹ Kikai lri maka drekasesu malra kwini lanilapulapwane si kwini sanaka yaangangade sanaka manemane kisaswarau pudaane. Ku lakananu lri makakai ki kinawmasane ki laumawmase si yaangangade ka lanilapulapwane; lri makitu pacai.’ ”

²⁰ Ku lasasiakawlu ki talialalai ngwalai kwini vaga ki Tamatama si makitu kasamali mukuludru, la malra ki laduri lini si lanilapulapwane kisaswarau pudaane ki daane.

²¹ Kudra ladrumane la kai kilalra ku tapakipapawlringavane ki Tamatama, laka tapikaiyaneana ki duri lini si lanilapulapwane ikai angangade.

²² Ku Tamatama la kawriva ki Musi, “Cilika kwini alrimasu papia belenge, kai swa Izipiti palraelre lri mulebe ku kananu, si makakai ki mapapangale, lanilapulapwane si sanaka wacebecebe.”

²³ Ku Musi la ciliki ku ukudruini papia belenge, ku Tamatama la pulebe ku dreredrere lrikace si kananu mwa daedae.

²⁴ Ku tadradrau ka kananu la tupapalra ki dreredrere si lrikace mulebe; kikai yai ikai ki lrikisi ki swa Izipiti niyane madradraunga ka sapapacai ka kananu.

²⁵ Ku kananu la demedeme pakalalisi kwini layangangade ki swa Izipiti, paelre ki sanaka umawmase, lanilapulapwane, si taleke ikai umawma si laangatu.

²⁶ Kathane ku taikaiyane ki swa Iseraylri ka Gusenge laka kadrwa ku kananu.

²⁷ Ku talialalai ki swa Izipiti la dawlu ki Musi si Arungu mwa kikawriva iniane, iya kai, “Kikai pasalrivaku. Kunaku si mapapangaleli pasalriu nai; ku Tamatama pacengecenge.

²⁸ Kunumi ala kitubia ki Tamatama! Kai nai maka wabeserenga kikai sapapacai ka dreredrere si kananu! Palraingaku pakatwase numiane; madha asurunga ikai kikai.”

²⁹ Ku Musi la iya kai iniane, “Sana katwasaku kikai ki cekele lri cilikaku kai alrima si papia ki Tamatama kitubi, lalri idrengere kai dreredrere kai mulebenga kai kananu. Lumia kikai, lalri thingalesu kai kadaengane ala ka Tamatamane.

³⁰ Ai wathingalaku kai mapapangalesu sakamia kai musakene sukubu ki Tamatama ka Twaumase.”

³¹ Ku lalrekelreke si mugi la kipakalalisi ki kananu; asi lwiyane kwini mabeanga ka mugi, la pupunga ku lalrekelreke.

³² Kathane ku tatitiki ka mugi ka kai kiapakalisi, asi lwiyane kwini mugi kaiyana mabea.

³³ Ku Musi la katwase twalai ki talialalai ki swa Izipiti, mulatadre ki cekele, la ciliki ku alrima papia ki Tamatama kitubi. Ku dreredrere udale si kananu la makakaai makitu idrengere.

³⁴ Ku talialalai sadrele kikai patuelre, la kiriimunga pasalriu; ku takidremedremaneini si mapapangale ala kiriimunga kakawlukulu.

³⁵ Ngiamia ku nataiyane ki Tamatama ki Musi, ku takidremedremane ki talialalai ki swa Izipiti sakamia kakawlukulu, kai pakatwase ki mapapangale ki swa Iseraylri.