Takatwasane Izipiti 8 - Ngudradreadrekadhane Ka Sisiu 魯凱語聖經

(Mwasaka drusa) Latakurawru

¹ Ku Tamatama amia kai ki Musi, “Kusu mwa kikawriva ki talialalai ki swa Izipiti, pelaela iniane ku Tamatama amia kai, ‘Pakatwasa ki kawkawluli, lani sukubu nakwane.

² Lwiyasi kai kilalra nakwane, lri pathavungaku ki kunisu, lalri suete salraelre ki kuni ku latakurawru.

³ Kai kadravane Nile lri sueteane ku latakurawru; ku latakurawru lri mutaluvaivai twalai ki acilai, mudaane ki daanesu, ki tapeapecanesu, mudaane ki daane ki lasasiakawlusu, mudaane ki daane ki laumawmasesu, lai lri mudaane adravane ka tagagane, ituku mwadringi ki palungu,

⁴ la mialri ituku mwa ki kinawmasanesu, ki kinawmasane ki lasasiakawlusu, ki kinawmasane ki lamapapangalesu.’ ”

⁵ Ku Tamatama la iya kai ki Musi, “Pelaela ki Arungu, malra ku ukudru iya, la sege papia ki lavaalru, kadalranane ki lavarukuru, baiyu si labaibaiyu, la putaluvaivai ki latakurawru, ku latakurawru lani sarau salraelre ki kuni.”

⁶ Ku Arungu la sege ku ukudruini, papia ki acilai, ku latakurawru la itituku ka amaaninga salraelre ki kadaengane.

⁷ Ai kwini lataraivigi mialri ivigi, la mialri putaluvaivai ki latakurawru ikai daedae.

⁸ Ku talialalai la dawlu ki Musi si Arungu, si iya kai, “Ala kitubia ki Tamatama lani sisau ki kavai latakurawru, lri pakatwasaku ki kawkawlusu, lani mwa patarumara ki Tamatama.”

⁹ Ku Musi la tubalre, “Palraingaku pasikai muswane kitubi. Ala kelreta ku vai, la nau kela pasikai muswane, ki sasiakawlusu si lamapapangalesu kitubi. Kikwini, ku latakurawru lri makitu kamudu, lai ka kathanenga kadravane Nile ku taikaiyane.”

¹⁰ La tubalre ku talialalai, “Lwiya ala pasikaiyaili kitubi.” Ku Musi la iya kai, “Lri tara pangimiaku ku kitubisu, lalri thingalesu kai kiacaebe ki belenge kadrwa ku lrika miyaiya ki Tamatama ka Twaumase nai.

¹¹ Ku latakurawru lalri katwase muswane, ki sasiakawlusu si mapapangalesu, kathane ka kadravane Nile kalri ikaiyana.”

¹² Ku Musi si Arungu la katwase mulatadre ki talialalai; ku Musi la inulri kitubi ki Tamatama kwini ki pulebeini pwa ki talialalai ki swa Izipiti kwini latakurawru mwalra sisau.

¹³ Ku Tamatama la pangimia ku takitubiane ki Musi pia kwini. Sanaka yadaane, ikai kalatadrane si yaangangade ku latakurawru makitu pacainga.

¹⁴ Ku swa Izipiti la sarubu patukwakudha kwini wapacainga ka latakurawru, salraelre ki cekele la sangubalre kaika abesebeserane.

¹⁵ Ai, ngiamia ku taiyane ki Tamatama, ku talialalai sadrele sa makitu pacainga ku latakurawru, ku takidremedremaneini kiarimunga kakawlukulu, kai kilalra ki Musi si Arungu.

(Mwasaka tulru) Lakucu

¹⁶ Ku Tamatama kawariva ki Musi, “Pelaela ki Arungu, ani arakai ku ukudruini sititi ki daedae, kwi thuvugu ani akabalrithi akucu si salraelre Izipiti.”

¹⁷ Ku Arungu la arakai ku ukudruini pwa sititi ki daedae, la suetenga ku kucu ki laumawmase si lanilapulapwane ikai Izipiti.

¹⁸ Kudra lataraivigi, taarakai ku ivigita pangibwale ku kucu la iya, ai kai maka watumanenga. Sakamani kwidra, ku laumawmase si lanilapulapwane kucunga ku kinawmasane lini.

¹⁹ Ku taraivigi la pelaela ki talialalai, “Kikai yai Twaumase ka paiya!” Ai ngiamia ku taiyane ki Tamatama, ku takidremedremane ki talialalai lrika sakamiana kakawlukulu, kai kilalra ku vaga ki Musi si Arungu.

(Mwasaka supate) Lralrangavane

²⁰ Ku Tamatama kawariva ki Musi, “Lwiya ki mialrealre, mwa kavai babiabila ki kadravane kikawriva ki talialalai, pelaela iniane ku Tamatama amia kai, ‘Pakatwasa ki kawkawluli, lani katwase sukubu nakwane.

²¹ Lri pakipapawlringavaku muswane, alaiyasi kaisu tarumara, lri arakaiyaku ku laalralrangau pathavungu muswane, ki lasasiakawlusu si lamapapangalesu. Ki sanaka daane ki swa Izipiti lri makitu kiikai ki alralrangau, ku alralrangau lri makitu sarau ikai kidruanga.

²² Ai ikai ki taikaiyane ki mapapangaleli kavai Gusenge lalri kakadrwa kanavaevanga ku alralrangau. Ku piali kikai ani thingale amiaku muswane, amaniaku ku Tamatama kikai ki kadaengane.

²³ Lri apakaelaku ki kawkawluli si kwini ki mapapangalesu. Kikai pinangu Twaumasane ka puku lri ngimia athingalane lwiya.’ ”

²⁴ Ku Tamatama la pakatwase kwini twaredelane ka laalralrangau mudaane ki taikaiyane ki talialalai, la mialri mudaane ki ladaane ki lasasiakawluini; pasalraelre ki kuni ki swa Izipiti makitu kimudaane ki laalralrangau.

²⁵ Ku talialalai la dawlu ki Musi si Arungu, si iya kai, “Lu mwa, la ikaiya ki kunili patarumara ki Twaumase numi.”

²⁶ Ku Musi la iya kai, “Pikakua ka ngimiyaiya kikai? Lwiyasi la patarumara nai ki Tamatama ka Twaumase nai ku lanilapulapwane, lri pathaele nai si lai lri kalisi naiane ku swa Izipiti; lu padredrele nai ki swa Izipiti lu arakai nai ku lanilapulapwane patarumara lrika pasalriunga nai liniane, kwi lalasu lri malra ku lrenege si dukulru papacai naiane!

²⁷ Lri tara pangimia nai ku tadrekasane ki Tamatama ka Twaumase nai, dadavace makatulrulu, mwa ka calragulragu si patarumara iniane.”

²⁸ Ku talialalai la iya kai, “Palraingaku ku wamwa numi ka calragulragu, si papia ki Tamatama ka Twaumase numi patarumara, ai madha mwadaidaili katwase la pasikaiyaili kitubi.”

²⁹ La tubalre ku Musi, “Sana katwasaku lri kitubiaku ki Tamatama lwiya kikai laalralrangau lri makitu kidaili muswane si lasasiakawlusu si lamapapangalesu. Ai kaisu lri maka pelanga kadraedrangelre naiane, si telenge ku lrika akatwasane nai patarumara ki Tamatama.”

³⁰ Ku Musi sa katwase ki talialalai ki swa Izipiti, la kitubi ki Tamatama;

³¹ ku Tamatama la pangimia ku takitubiane ki Musi. Kudra laalralrangau la katwasenga ki talialalai, lasasiakawluini si lamapapangaleini, laka kadrwa kanavaevanga ku asuru.

³² Ai kikai, ku takidremedremane ki talialalai laka sakamiana kakawlukulu, si kai pakatwase ki swa Iseraylri.