Takatwasane Izipiti 6 - Ngudradreadrekadhane Ka Sisiu 魯凱語聖經

¹ Ku Tamatama la iya kai ki Musi, “Lri drelengasu kai apangimianeli kiecebe ki talialalai ki swa Izipiti. Lri rututaku ku apakatwasane ki kawkawluli. Lri rutututaku iniane ku kaika apikakwaneini kai pakatwase ki kuni lini.”

Ku Twaumase wadawlu ki Musi

² Ku Twaumase la pelaela ki Musi, “Tamatamaku,

³ ka amani ku wadulru sanaka manemane ka Twaumase. Adrelanengaku ki Aberahame, Isake, Yakubu. Ai, kadrwana ku takirimwaneli pelaela liniane kikai saniange ka naganeli ka Tamatama.

⁴ Nakiaketeketaku liniane, pukawnu ku abaadhane liniane kudra natasalikaikaiyane lini ka Kanange.

⁵ Kikai kialalraku ku tubitubi lini ki swa Iseraylri ku tapakwalriane ki swa Izipiti liniane, ngwalringavaku ku kiketeketeli.

⁶ Lakamani kusu lu mwa pelaela ki swa Iseraylri, iya kai liniane, ‘Tamatamaku; lri palribulaku liniane, patwalai ki takituduriane ki swa Izipiti mukerenge liniane. Lri arakaiyaku kai sapukwane ka alrima pathavungu ki swa Izipiti, lri palribulaku numiane.

⁷ Lri malraku numiane tukawkawluli, lri mialriaku a Twaumase numiane. Lu twalainga numi ki tapakwalriane numiane ki swa Izipiti kipangilralraingi, lri thingalenga numi ala ka amaniaku ku Tamatama, ka amani ku Twaumase numi.

⁸ Napwavagaku ki Aberahame, Isake, Yakubu, lakamani lri tara ilukaku liniane mwa kwini ki kadaengane, kwini kadaengane lri kamani ku tacekecekelane numi. Kunaku Tamatamaku.’ ”

⁹ Ku Musi la malra kikai si pelaela ki swa Iseraylri, ai kai kialalra ku vagaini, asi lwiyane kwini takitusinalremeane lini tuduri masulringa tubi ku kidremedreme lini.

¹⁰ Ku Tamatama la iya kai ki Musi,

¹¹ “Lu mwa pelaela ki talialalai, ani tara pakatwase ki swa Iseraylri kidaili Izipiti.”

¹² La iya kai ku Musi, “Adravane ka swa Iseraylri kai kialalra ku vagali, ku talialalai lri kilalra nakwane? Amaniaku kudra kai wathingale kawriva ka umawmase.”

¹³ Ku Tamatama la drekase ki Musi si Arungu, “Lu mwa pelaela ki swa Iseraylri si talialalai ki swa Izipiti, ka amaniaku ka wadrekase, ka lrika amani kulri ililuku ki swa Iseraylri katwase Izipiti.”

Tamacucungulane ki Arungu si Musi

¹⁴ Kikai la tapacasane kikai lebe yai amani ku latamatama ki zuku ki swa Iseraylri. Takatakanga ku lalake ki Yakubu ka Riwbingi tasupate ku sawvalai ku lalakeini: Hanuke, Palu, Hezerunge si Karemi; kikai amani ku tasingikaiyane ki zuku ki Riwbingi.

¹⁵ Kai Simiune taeneme ku lalakeini: Yemuele, Yamingi, Uhade, Yakingi, Zuhare si Saule ka tulalake ki swa Kanange; amani lini ku tasingikaiyane ki zuku ki Simiune.

¹⁶ Kai Lrivi tatulru ku lalakeini: Geresune, Kuhathe si Mirari; amani ku tasingikaiyane ki zuku ki Lrivi. Ku Lrivi pakela ki tara 137 ka caili.

¹⁷ Kai Geresune tadrusa ku lalakeini: Lribini si Simi; la tara ikai ku takalra ku lagagane lini.

¹⁸ Kai Kuhathe tasupate ku lalakeini: Amerame, Izehare, Hiburungu si Uzile. Kai Kuhathe pakela ki tara 133 ka caili.

¹⁹ Kai Mirari tadrusa ku lalakeini: Maheli si Muse. Kikai amani ku zuku ki Lrivi si cucungulane kai ki zuku.

²⁰ Ku Amerame marudrange mwa ki tinaini ka Yukebide ka betakane ki tamaini; twalalake ki Arungu si Musi. Ku Amerame pakela ki tara 137 ka caili.

²¹ Ku Izehare tatulru ku lalakeini: Kura, Nipege si Zikeri.

²² Ku Uzile tatulru ku lalakeini: Misaele, Ilrizapane si Sitheri.

²³ Ku Arungu marudrange ki Ilriseba; lalake ki Aminadabe, agi ki Nahasunge. Ku Ilriseba twalalake ku lalake ki Arungu ku tasupate: Nadabe, Abihu, Ilriazare si Ithamare.

²⁴ Ku Kura twalalake ku tatulru: Asire, Ilekana si Abiasape; amani lini ku lalalake ki Kura ka cucungulane ki maretetese si ladadaane.

²⁵ Ku lalake ki Arungu ka Ilriazare marudrange mwa ki lalake ki Putile; twalalake ki Pinehase. Kilakikai patuelre amani ku tamatama ki ladadaanane ki lamaretetese si ladadaanane ki zuku ki Lrivi.

²⁶ Ku Arungu si Musi kwini tadrusa ala amani kudra napangwakai ki drekase ki Tamatama, iya kai, “Lu mwa malra ki swa Iseraylri kwini ki lazuku apasakaikai iluku liniane katwase Izipiti”.

²⁷ Kwini lalasu la mialri kamani kudra nawamwa ki talialalai ki swa Izipiti kitubi mukerenga ki swa Iseraylri iya.

Ku Tamatama wadrekase ki Musi si Arungu

²⁸ Ku paswalala ku Tamatama sa kawriva ki Musi ikai Izipiti,

²⁹ amia kai, “Tamatamaku; malra kikai takawrivaneli muswane si pelaela patuelre ki talialalai ki swa Izipiti.”

³⁰ Ai, ku Musi la icucubungu ki Tamatama tubalre iya kai, “Wathingalesu kai kulrunganeli, ku talialalai lri tumane kilalra ku vagali?”