Takatwasane Izipiti 5 - Ngudradreadrekadhane Ka Sisiu 魯凱語聖經

Ku Musi si Arungu kiakawriva ki talialalai ki swa Izipiti

¹ Sakabilrilanenga ku Musi si Arungu la katwase mwa kikawriva ki talialalai ki swa Izipiti, la iya kai, “Ku Tamatama ka Twaumase ki swa Iseraylri amia kai, ‘Pakatwasa ki kawkawluli, lani mwa calragulragu tulrisisi, sukubu nakwane.’ ”

² Ku talialalai ki swa Izipiti la iya kai, “Kwini Tamatama aneane? Manemane si lri tara kilalraku iniane? Manemane si pakatwasaku ki swa Iseraylri? Kainaku wathingale kwini ki Tamatama; lai kainaku lri pakatwase ki swa Iseraylri.”

³ Ku Musi si Arungu la tubalre, “Ku Twaumase ki swa Hiburu adrelanenga naiane. Kikai la pukawna naiane ku amakatulrulane ku kadalranane, mwa ka calragulragu sukubu patarumara ki Tamatama ka Twaumase nai. Amani luiyasi kai nai pangimia, lri arakai ku caemane ku makaruruburane si amudu naiane.”

⁴ Ku talialalai ki swa Izipiti la tubalre ki Musi si Arungu, “Kikai manemane ku patharevane? Ani aru ngiabalai ki akaungane lini amia numi kai ki laumawmase? Aru pakirarimwa kwini laduri kaungu sikakathane!

⁵ Kikai umawmase numi ka swa Iseraylri mapapangalenga ki swa Izipiti, lalri kai pakaungu liniane?”

⁶ Kwini ki vai, ku talialalai ki swa Izipiti la drekase kwini ki latarakadrenge ki takaungane si lataramaililuku ki awngane ka swa Iseraylri iya kai,

⁷ “Madha babainga ki swa Iseraylri ku satulringigane lini ku laubulu! Pangisasilapa liniane ku laubulu,

⁸ ai tara tulrepenga iya liniane ku mararamau ki siaswalane ku takathanane, kai lri maka kabebekelane adravane ka vaeva. Salradhane lini lakamani ku kitubi lini nakwane ku apukawnaneli liniane ku amwane si patarumara ki Twaumase lini!

⁹ Padrima ku telregane ki awngane lini, ani aru karacange, lani kai picugunga kilalalra kwini ki lakawriariariva.”

¹⁰ Kwini swa Izipiti ka latarakadrenge ki takaungane si lataramaililuku ki awngane ka swa Iseraylri la mwa pelaela ki swa Iseraylri, “Ku talialalai wadrekase madha babainga liniane ku laubulu.

¹¹ Amia kai adravane katwase mwadaili, kunumi lri tara ngikakamani numi silape ku laubulu, ku takathane ku lringiga lalri kai akivalane adravane ka vaeva.”

¹² Ku swa Iseraylri la mu Izipiti kidruanga muriubulu.

¹³ Ku tarakadrekadrenge ki awngane la rututu liniane, tara baadha iya liniane ki vaivai kudra lalringiga, tuthadaalrane ku kalrane sakipatarumaramaarana ku laubulu.

¹⁴ Kwini tarakadrenge ki awngane la lrumai kwini ki sikawlu ki swa Izipiti ka lataramaililuku ki awngane ka swa Iseraylri, kaelaela liniane, “Matumane kikai lamauawngu kai maka baai ku thadalrane ku paswalala ku kalrane ku lringiga?”

¹⁵ Kwini lataramaililuku ki awngane la mwa kitubi ki talialalai iya kai, “Talialalai, asu ngitha pia kai naiane?

¹⁶ Ku tarakadrekadrenge kai wabaai naiane ku laubulu, tara baadha ku thadalrane ku paswalala ku kalrane ku lringiga la iyana! Kikai la makitu kilrumai nai kipathavungu, kikai amani numi ka swa Izipiti ka pasalriu.”

¹⁷ La iya kai ku talialalai ki swa Izipiti, “Masalrai numi, kibubuli isadra, lakamani ku kitubi numi nakwane pukawnu numiane mwa patarumara ki yabelenge ka Tamatama.

¹⁸ Lu siwlria si kirimwa kaungu! Kai nai lri baai ku laubulu, ai kunumi lri tara baaiyana numi ku thadalrane ku paswalaala ku kalrane ku lringiga.”

¹⁹ Kwini taramaililuku ki awngane sa kilalra kwini kunumi lrika sakamia ki vaivai babaai numi ku thadalrane ku paswalala ku kalrane ku lringiga iya, la thingale kalri kelanga ku amatikurwane.

²⁰ Sa mulatadrenga, la drele ki Musi si Arungu tadrusa ikai latadre mukalavalava liniane.

²¹ Kwini lalasu la iya kai ki Musi si Arungu, “Ku Tamatama lri tara ka wathingale luka watumane numi; amani numi ka pakagirimucu kalisi ki talialalai si tabebelenge naiane, la ikai kudra tatakaiyane lini papacai naiane. Ku Tamatama lri tara pathavungu numiane!”

Ku Musi siadruru ki Tamatama ku sakwalrialri

²² Ku Musi la mucucubungu ki Tamatama iya kai, “Tamatama, asu pia kai sidrekase ki kawkawlusu? Asu sikawlu nakwane pwa kikai?

²³ Twalainga sa mwaku ki talialalai kikawriva, kwini lasu kiarimunga sikuranau pakiangeange kai ki kawkawlusu; la kaisu paralubu liniane ku natikianenga!”