Takatwasane Izipiti 36 - Ngudradreadrekadhane Ka Sisiu 魯凱語聖經

¹ “Ku Bizale, Uhulriabe si drumane ka lasialrima, amani kwidra kiapatarumara ki Tamatama ku lrigilane daedarepe, wathingale ku lrika apangimiane ku Alrivilrivi ka balrawbau ka laumawmase, lri singikaai ku cunu ki Tamatama pia ku laawngane tudaane.”

Ku mapapangale patarwamara ku saceacebe

² Ku Musi wasarubu ki Bizale, Uhulriabe si kwini sanaka kiapatarumara ki Tamatama ku lrigilane, si palraingi paralubu kaungu ka umawmase, wacunu liniane pathagili kaungu.

³ Kwini lalasu wamwa ki Musi kibaai kwidra nipatarumarane acebe ki la swa Iseraylri pasikai ki atudaanane ku Alrivilrivi ka balrawbau. Ai, lukamialrealre, ku mapapangale wakelakeelana iluku ku saceacebe, si baai pwa ki Musi.

⁴ Ngwalai kikai, kwini lalri kamani ku maungu la idrengereana ku awngane lini,

⁵ la mwa kikawriva ki Musi, iya kai, “Ku patarumara ki mapapangale sialribatenga kwidra ki cunu ki Tamatama ku satudaanane.”

⁶ Ku Musi la pakatwase pelaela palraelre ki mapapangale imianga ku apatarumarane ki Alrivilrivi ka balrawbau iya.

⁷ Asi lwiyane kwidra nitarumarane ku saceacebe makakelretenga patulrepenge ki satudaanane si lalri puteedrana.

Twadaane ku Alrivilrivi ka balrawbau ki Tamatama

⁸ Ikai kwini ki la kiapuawawngane kudra la malrigili ku alrima lini kaamani ku twadaane ku Alrivilrivi ka balrawbau ki Tamatama. Kwini lalasu arakai ku mangeale ku makalrilau tudaane ku balrawbau. Kikai balrawbau arakaiya ku kaimadhane si salesese, thilalatadhane, maduduli ka gialrane darepe, si pacase ku pacase ki Kirubime.

⁹ Kwini vaevaeva ku adravane la maramaramau, ku lragiane 12 ka mituru, ku ngulapane drusa ka mituru.

¹⁰ La malra kwini tailrimane paelrelre caisi, rathudu tutaingeane, kwini tailrimane la tuthadaalrane ku tapiane.

¹¹ Kwini lalasu ikai ki taingeane ka nirathudane ka makalrilau ki sababiabilanga la caisi ku salesese ku tapwane ku sauculrungane.

¹² Kwini lalasu la malra kwini malrimale ku tapwane ki sauculrungane caisi pikai ki aswalaalanga ki mwasakavaeva ka nierecane ku taingeane ka malrimale ka sawculrungane, la caisi pikai ki mwasakadrusa ki lapiu.

¹³ La darepe ku malrimale ku kingi ka sakakaili, la malra pararaisi paelre kai ki taidrusane.

¹⁴ Kwini lalasu la arakai ku niarakaiyane ku ubale ki kakiuane pia tu 11 ku balrawbau tutalrugulrugane ki Alrivilrivi ka balrawbau.

¹⁵ Kwini vavaeva ku takathane la paramaramau: Ku lragiane 13 ka mituru, ku ngulapane drusa ka mituru.

¹⁶ Kwini tailrimane la caisi paelrelre, tuvaeva, kwini enemenga la tutaingeane.

¹⁷ Kwini tali babiabila ki salrilrikudrunga ki mwasakavaeva ka balrawbau la caisi tumalrimale ku sauculrungane. Ku maelane ka taingeane la pangubabiabila caisi ku sawculrungane tumalrimale.

¹⁸ La tumalrimale ku lriwlu tusakakaili, la malra kwini taidrusane ka balrawbau apararaisi, tuvaevanga ka talrugulrugane.

¹⁹ Kwi lalasu ku drumane la arakai ku nieremane ku duduli ka lrangici ki balase ka kiu si maelane ka taingeane ka tinutharirane ka lrangici ka nitudrusane ka talrugulrugane, si tusapasabelengane ki cavalri ki Alrivilrivi ka balrawbau.

²⁰ Kwi lalasu arakai ku bwaburavane ka paela ka angatu tusacegecegane ka ulrudru ki Alrivilrivi ka balrawbau.

²¹ Kwini vaevaeva ka ulrudru ku ubelengane supate ka mituru, ku ngulapane 66 ka kunhunge,

²² la tara tudrusa ku tamacaculruculrwane, tamacaculruane ki labulri. Sanaka bulri yakaai ku taculruculruane.

²³ La pikai ki tali lrawdru ki Alrivilrivi ka balrawbau cegecege ku mapusale ku bulri,

²⁴ kwini lebe ki bulri la pikai ku masupatele ku gingi ku taacegecegane, kwini ki vaevaeva laka drusa ku gingi ka tapacegecegane paulrudru.

²⁵ Kwi lalasu la pikai ki tali dradha ki Alrivilrivi ka balrawbau cegecege ku mapusale ka bulri,

²⁶ si masupatele ku gingi ka tapacegecegane, kwini tailebeane ki vavaeva ki bulri piakai ku drusa ku tapacegecegane ka gingi.

²⁷ Pikai ki tali lrilrikudru ki Alrivilrivi ka balrawbau, kwini ki tali sapakalriwgu ki Alrivilrivi ka balrawbau, wacegecege ku eneme ku bulri;

²⁸ kwini ki piyu la pikai ku drusa ku bulri.

²⁹ Kwini tailebeane ki drusa ka bulri la pararaisi, mararaisi pakela taibelengane, ka vaeva ka nipangusivaalane pangithalringulu. Kwini lrika tali piyu ka drusa ka bulri laka thadalrane ku tangimiane.

³⁰ Lu elrelreane lrika valru ku bulri si 16 ku tapacegecegane, ki vavaeva ki bulri tailebe latara ikai ku drusa ku tapacegecegane ka gingi.

³¹ Kwi lalasu la arakai ku bwaburavane ka paela ka angatu tusabaratane ka bulri tu 15; kwini tali thili ki Alrivilrivi ka balrawbau ku bulri lrima ku sabaratane,

³² kwini tali thili laka lrima; kwini lrilrikudru ki Alrivilrivi ka balrawbau, ka tali sapakalriwgu ki Alrivilrivi ka balrawbau, mialri pakalrima.

³³ Kwini sa kabicelrakane ka sabaratane yakai ki tali barabarange ki bulri pasutelrai, twalai ki tali awlrulru pakela ki thili ki tali awlrulru.

³⁴ Arakaiya ku kingi cabu ki bulri, si paraisi ku kingi ka kakalathe, ku lrika angukakaiyane barate ki angatu; kwini sabaratane ka angatu mialri arakai ku kingi cabu.

³⁵ Kwi lalasu arakai ku kaimadhane si salesese, thilalatadhane, maduduli ka gialrane darepe ku vaeva ku make, kwini belenge la pacase ku mia ki Kirubime.

³⁶ Kwi lalasu la malra kikai make kelrai pubelenge kwini ki supate ka niarakaiyane ku bwaburavane ka paela ka angatu ka ulrudru. Ku ulrudru arakai ku kingi cabu, kwini belenge ki ulrudru la ikai ku kingi ka sakakaili, kwi lalasu la pasikai ki ulrudru pia ku supate ka gingi ka tapacegecegane.

³⁷ Kwi lalasu arakai ku kaimadhane si salesese, thilalatadhane, maduduli ka gialrane pasikai ki samamudaane ki Alrivilrivi ka balrawbau pia ku make ki lrawlrawdru, kwini belenge ki make la pacase.

³⁸ Kwi lalasu pasiakai kikai ki make ki lrawlrawdru pia ku lrima ku ulrudru, kwini ki ulrudru yakai ku sakakaili. Kwini karingavane ki ulrudru si sabarebare ki ulrudru arakai ku kingi cabu patuelre, la pasikai ki ulrudru pia ku lrima ku lriwlu ka tacegecegane.