Takatwasane Izipiti 3 - Ngudradreadrekadhane Ka Sisiu 魯凱語聖經

Ku Twaumase wadawlu ki Musi

¹ Yakai saka minakavalane, ku Musi la pagwagu ku lakiu ki Yetheru ka tama ki labaibaini ka barakalai ki swa Midiange; la mailuku ku twaredelane ku lakiu lribate ki aenaenai ka Sinai, la mwa kwidra lregelrege ki Twaumase ka Hurebe.

² Ikai kwini, ku sasiakawlu ki Tamatama la mia ki wakelrakelrakelrabe ka apwi, singikai ki cecenekane ka angatu athingalane ki Musi. Ku Musi la drele kwini cecenekane sakulama, la kai kawtutu.

³ La kidremedreme, “Ala matiasamali kikai, kikai cecenekane ka angatu ani kulamalama la kai kawtutu? Anau mwa drele!”

⁴ Ku Tamatama la drele sa kirimu nau aru adeethe sa iya ku Musi, la twalai ki cecenekane ka angatu tawtau iniane, “Musi! Musi!” La tubalre ku Musi, “Unu, kawvadhaku!”

⁵ Ku Twaumase la iya kai, “Madha aru adedethe. Mwalra kwini kecesu! Asi lwiyane kwini taikaiyanesu acegecege saniange ka kadaengane.

⁶ Amaniaku ku Twaumase ki cucungulanesu ka Aberahame, Isake, Yakubu.” Ku Musi la paidringi ku lringauini, mwakuludru drele ki Twaumase.

⁷ Ku Tamatama la iya kai, “Wadrelengaku ku takipakwalriane ki kawkawluli ikai Izipiti; kialalranga naku ku tubitubi lini ku akimukerengane ki akipakwalriane. Wathingalaku ku sakwalrialri lini,

⁸ lakamani ku mulebeli, ku apatwaladhane ki alrima ki swa Izipiti malra palribulu liniane, sangiluku liniane mwa kwidra ki malrange swaadrau ka kadaengane, mwalwalwaludru ku mireke si valu ka kadaengane: Kavai amani ku taikaiyane ki swa Kanange, Hite, Amuri, Perizi, Hivi si Yebuse ka laumawmase.

⁹ Pwadriadringadhaku kilalra kwini tubitubi ki kawkawluli, si drele ku tapangimiamiane ki swa Izipiti dredrepete liniane.

¹⁰ Kikai lri sikawlaku muswane mwa ki talialalai ki swa Izipiti; lu mwa malra iluku ki kawkawluli ka swa Iseraylri katwase Izipiti.”

¹¹ Ai ku Musi amia kai ki Twaumase, “Manemanaku? Anaku makatumane mwa Izipiti kwini ki talialalai, si malra ililuku ki swa Iseraylri mulatadre?”

¹² La tubalre ku Twaumase, “Lri tapalraku muswane. Lu ililukungasu ki swa Iseraylri mulatadre Izipiti, kunumi ikaiya kai sukubu nakwane. Kikai ala amani ku sapatuthingalane ku tasikawlaneli muswane.”

¹³ Ku Musi la iya kai, “Lu mwaku pelaela ki swa Iseraylri, ‘Ku Twaumase ki cucungulane numi siakawlu nakwane kela kai numiane,’ lri iya kai kivaga, ‘Sia aneane ku naganeini?’ Kwini la lri tumanaiyaku pelaela liniane?”

¹⁴ Ku Twaumase la iya kai, “Amaniaku kudra pathagilane si satwalrepenge ka magagemegeme. Lu mwa pelaela liniane, ‘Kwidra sia pathagilane si satwalrepenge ka magagemegeme siakawlu nakwane kela kai.’

¹⁵ Tamatamaku, ka Twaumase ki cucungulane lini, ka Twaumase ki Aberahame, Isake, Yakubu. Siakawlaku muswane mwa liniane kavai, amani kikai ku naganeli, pakeela lumamilringi, ku lamwabaibalrithi lri makitu iya kai sunagane nakwane.

¹⁶ Lu mwa sarubu ki kiacapili ki swa Iseraylri, pelaela liniane: Kunaku ka yabelenge ka Tamatama, ka Twaumase ki cucungulane lini, Twaumase ki Aberahame, Isake, Yakubu, naadrelanaku muswane. Ku apelaelane liniane, wakelaku liniane, la drelengaku ku tapangimiamiane ki swa Izipiti pakwalri liniane.

¹⁷ Lri tara sangilukaku liniane katwase Izipiti. Makakelretenga ku takipakwalriane lini; lri ilukaku liniane mwa kwidra mwalwalwaludru ku mireke si valu ka kadaengane, ka amani ku taikaikaiyane ki swa Kanange, swa Hite, swa Amuri, swa Perizi, swa Hivi si swa Yebuse ka laumawmase.

¹⁸ “Ku lakawkawluli lri kilalra ku takawrivanesu liniane. Ala lri ilukusu ki kiacapili ki swa Iseraylri mwa kikawriva ki talialalai ki swa Izipiti, iya kai iniane, ‘Ku yabelenge ka Tamatama ka Twaumase ki swa Hiburu naadrelane nakwane. Kikai la palrainga naiane ku amakatulrulane ku kadalranane, mwa kavai calragulragu, papia ki yabelenge ka Tamatama ka Twaumase nai si patarumara.’

¹⁹ Wathingalaku, kathaane lu rututaku iniane tara pangimia kwini iya, ku talialalai ki swa Izipiti kai lri palraingi numiane pakatwase.

²⁰ Ai lri arakaiyaku ku pukuli padredrele ku palrealrebane ku kakudhane si pathavungu ki swa Izipiti. Lukabilrilinga lri palraingi numiane pakatwase.

²¹ “Lri pakiusakenaku numiane ki swa Izipiti; lakamani kwidra, lu katwasenga kavai ku kawkawluli, kai lri paliwnaunai katwase.

²² Ku labaibai ki swa Iseraylri lri mwa ki lapasiagiagisi lini, si mwa ki la swa Izipiti kwini ki labaibai malra ku kingi gingi, silu si laimai. Ku swa Iseraylri lalri baai ki lalake lini pangiragelane, lu pia kai lalri malra kwini lamanemane ki swa Izipiti katwase iluku.”