Takatwasane Izipiti 23 - Ngudradreadrekadhane Ka Sisiu 魯凱語聖經

Dringelresane si aparamaramavane

¹ “Madha pasarasarau ku kaika kavagane; madha malramalra ku kaika tangimiamiane si pusakai ki pasalriu ka umawmase.

² Madha singikaikai ki tapapangale si pasalriu, ku wakilrungu ki dringelresane;

³ la madha ikaikai ki takukusukuswane si pusakai ki matiakukuru.

⁴ “Lwiyasi la drelesu kwidra lwange ku ruba ki badhasu la amuli ki kadalranane, malra si la baai iniane.

⁵ Lwiyasi kwini ruba ki badha la siamece ku matelrege la tubakebake, paraluba iniane drakale kwini ki ruba, madha katwatwase.

⁶ “Madha ikaikai ki tamakakusukuswane la capange dralrili ki matiakukuru.

⁷ Madha pasamalimali kukusu; madha papacapacai ki mwalecege si vutha kitupasalrivane ka umawmase; asi lwiyane lri tara pathavungaku kwidra paiya kikai ngialisiane ku umawmase.

⁸ Madha malramalra ku pavangalre; asi lwiyane kai pavangalre pakamukici ki maca ki umawmase, kilrungu kwidra ki sapelaelane ka vaga ki kadrwa ku pasalriu.

⁹ “Madha tusinalremelreme ki singibadhane; asi lwiyane nasaliakaikai numi ikai ka Izipiti, kilringaunga kwidra tangimiamiane lu ibabadhane.”

Saka tarapitu ka caili si saka makapitulu ka vai

¹⁰ “Ikai ki nitaraenemane ka caili kaunga ki umawma, si rubwa ku lataleke.

¹¹ Ai ikai ki saka tarapitu ka caili, paisadrana ki kadaengane, madha kitaletaleke kwidra wacebe ikai angangade. Ani ka matiakukuru kwini wakane kwini ki lataleke, ku tedrane lani kaanenga ku lawaudriwdripi. Kwini babudwanesu si maulriwlrivane la mialria pangimia kwini.

¹² “Kaunga makanemele. Luka samakapitulu madha kauawngu, kwini ki laduri si pasiakaikai muswane kaungu ka lasingibadhane, adravane kwini la nilapulapwane, lri isaadra makanaelre.

¹³ “Kunaku ka Tamatama kudra la kawrivali numiane, tara nguvavaeva pasusu. Madha kitubitubi ki drumane ka twaumase, adravane ka nagane lini madha matikaikai.”

Taitulrwane ka makucingalre ka tatulrisisisiane

¹⁴ “Lukacaili tara pasikaiyaili pasusu ku taitulrwane ku tatulrisisisiane.

¹⁵ Ikai ki dramare ki Abia, amani ku dramare saka takatwasane numi ka Izipiti, pangiamia ku tacunaneli pasusu ki Tamwalrane ku sapawsemakane ka lrisi. Ikai kwini ki nimakapitulane, madha kanekane ku nipawsemakane ka pange. Madha paliwnaunaunai kela sukubu nakwane.

¹⁶ “Kusu tara tulrisisiia kikai Takitalekane ka lrisi lulri pathagilingasu kitaleke ku pautalekesu. “Lri ikaisu ki kalalidrarane ka tamalramalrane ku madru ki angatu si pasusu tulrisisi ki Taseketane ka lrisi.

¹⁷ “Luka kalatulrisisiane kikai ki tulru ka tatulrisisisiane, ku daanesu sanaka sawvalai makitu kela sukubu nakwane ka abebeelengenga ka Tamatama.

¹⁸ “Lu patarumarasu ku nilapulapwane madha patarumaramara ku nipawsemakane ka pange. Kwini sapatarumarane ku nilapulapwane kwini lamace madha pukaiyaiyane.

¹⁹ “Lukacaili malra kwini aswalalanga kabea ka taleke ka mathaithaariringa iluku mwa ki daane ki Tamatama ka Twaumasesu. “Madha arakaikai ku esebe ki thuthu ki tina ka kiu aga ki lrulai ka kiu.”

Nipuvagane si sapelaelane

²⁰ “Lri sikawlaku ki sasiakawlu belenge lri ikai ki kadadalrananesu palakebe muswane, si sangiluku muswane mwa kwidra pasikaili muswane padulru ka kadaengane.

²¹ Kusu kilalra pasalaladha iniane. Madha kiececebe iniane; asi lwiyane amaniaku ka siakawlu iniane, kai lri pacepe kwidra lawabaebaebalre ku lakakudhane.

²² Lwiyasi la kilalrasu iniane, si paluludu sanaka padradrekaseli, lri lrumadhaku ki sanaka badhasu.

²³ Ku sasiakawluli belenge lri sacucubungu sangiluku muswane, sangiluku mudaane kwini ki kadaengane ki swa Amuri, swa Hite, swa Perizi, swa Kanange, swa Hivi si swa Yebuse, si lri amudaku liniane.

²⁴ Madha pidrupidruru si sukubu ki latwaumase lini, la madha kipuawawngane liniane, madha tupapalra ki takisuswane lini. Malra amudu kwini ki lasamiamiange lini, amuda kwini umawmase lini si baburuku kudra sukusukubu lini ku sadrengedrenge.

²⁵ Lwiyasi sukubu numi nakwane ka Tamatama, ka Twaumase numi, lri baadhaku muswane ku taleke si acilai, lai lri mwalraku demedeme ku caemanesu.

²⁶ Ikai ki kunisu, kadrwa ku lri kilribate ku kai maka twalalake ku ababai. Lri pakalragiaku ku niakesu.

²⁷ “Lri pawkuludraku liniane nakwane kwidra ki lakiaecebe muswane, lai lri amama, ku kiakaruburu muswane; sanaka badha lri makitu ngibangulu mubere muswane.

²⁸ Lri pawlrubangaku ki mukuludrane ki badhasu; lu aru cucubungusu lri pathirakupaku ki swa Hivi, swa Kanange si swa Hite.

²⁹ Ai kai ki nitaracailane kainaku lri pakatwase liniane, amani lu awbulane kai kadaengane, si ataikaiyanenga ki lawaudriwdripi.

³⁰ Lri parwakaikaaiyaku pakatwase liniane, ku tadrimane ku umawmase numi, si tarumara kwini lakadaengane.

³¹ Lri paruswadravaku kwini pagisane ki kadaengane, twalai ki laveke Suize daruru kadravane Yuparati; twalai Miditerania padaruru ki aenaenai. Lri baadhaku muswane ku puku ku amaka gemegemanesu kwini ki swakai kwini ki yakai kwini ka laumawmase, lu arwacucubungusu la pakatwase liniane.

³² Madha makaketeketekete sanaka manemane liniane si twaumase lini.

³³ Madha paikaikai liniane ki kunisu, amani lu papasalriu muswane nakwane. Lwiyasi sukubusu ki latwaumase lini, lri kamani ku apacadhanesu ka lrubange.”