Takatwasane Izipiti 22 - Ngudradreadrekadhane Ka Sisiu 魯凱語聖經

Kakudhane ki wathavungu

¹ “Lwiyasi ikai ku umawmase ku kwaupa ku vaeva ku lwange ku kiu, adravane ka waculu ku kialangai, kwini lasu lri tara malra ku lrima si cugu kwini ki vaeva, malra ku supate ku kiu si cugu ki vaeva.

^2-4 Lri tara sawlri kwini sanaka kupaini. Kwini lasu lukakadrua ku manemaneini, lri kikilangai aduri si tusathavungane ki takupaneini. Lwiyasi kwini kiakupa ku lwange ku ruba ku kiu la kikidringai si panianianiakeana, lri tara driima ku sathavungane. “Lwiyasi ikai ku umawmase ku takamaungane muelebe ki daane ki palrapalra, la kithingale, si kipapacai, kwini papacai iniane kadrwa ku pasalrivane; alaiyasi laka piavaiyane, kwini papacai iniane yakai ku pasalrivane.

⁵ “Lwiyasi ikai ku umawmase ku yaangangade ikai ki babudwane pagwagu ki lwange ki kiu, kwini nilapulapwane la kane ki yakai angangade ku lataleke ki palrapalra, lri tara malra kwini yakai ki angangadeini ku taleke ku labudu si thavungu ku tamulisiane ki palrapalra.

⁶ “Lwiyasi ikai ku umawmase la ikai ki angangadeini lama ku cecenekane ka angatu, kwini lamaini la pakudaraisi ku angangade ki palrapalra, la pakulama kwini kaika nikitalekaneana ku nikitalekanenga, kwini lasu lri tara cugu ku tamulisiane ki palrapalra.

⁷ “Lwiyasi ikai ku umawmase ku kiapapikai ku paisu ku tinukucingalrane ka lawbubulu ki palrapalra, la pakikupane ikai ki daaneini, kwini kwaupa la kipwalra, lri tara padrima ku sathavungane;

⁸ lwiyasi la kai pwalra ki kwaupa, kwini kiapapikai lri tara mwa ki tasukusukubane kiketekete, sapathingalane kwini ki lasu ka kai kwaupa kwini sudralru ki palrapalra.

⁹ “Ku namanemanenga ku ngwakai ki lawbubulu la ikai ku rivwane, adravane ka ngwakai ki lwange, kiu, ruba, laimai, ku pakaulrau ku lamanemane, kwini mararivu lri tara mwa ki tasukusukubane. Kwini kiatupasalrivane ki Twaumase lri tara padrima thavungu ki ecebaneini.

¹⁰ “Lwiyasi ikai ku umawmase ku kiapadrangalru ku ruba, lwange, kiu, ku drumane ku nilapulapwane, kwini nilapulapwane la pacai la kadadula, la kikupa, la kakadrwa ku lri pupalra iniane pelaela,

¹¹ kwini kiasudralru lri tara mwa ki tasukusukubane kiketekete, pelaela kwini lasu ka kai kwaupa ku nilapulapwane ki tawki. Lukamiyaiya kikai, kwini pimanemanane lri tarumara kwini tamulisiane, kwini kiasudralru kai lri thavungu.

¹² Lwiyasi ku nilapulapwane la kikupa, kwini kiasudralru lri tara thavungu ki pimanemanane.

¹³ Kwini nilapulapwane la kithuriace ki waudriwdripi, kwini kiasudralru lri tara malra kwini culrale iluku tusapelaelane; kwini lasu kai lri thavungu.

¹⁴ “Lwiyasi ikai ku umawmase ku kiasalru ku nilapulapwane ki palrapalra, kwini pimanemanane la kai ikai ala paacai kadula, kwini kiasalru lri tara thaavungu;

¹⁵ kwini pimanemanane lu ikai kwini, kai lri thavungu. Lwiyasi kwini nilapulapwane laka nikisalrwane, kwini tamulisiane lri arakai ku sakisalrwane ku paisu tusathavungane.”

Kakudhane pangukai ki kakwakudhane ki umawmase si takisuswane

¹⁶ “Lwiyasi la ikai ku paswadringai ki kaiyana kiatusiasilangane ka tawvailekete lri tara baai ku sabaadhane, la malra iniane sitaelrelre.

¹⁷ Lwiyasi kwini tama ki alisu la kai palraingi kwini ki lasu pakarudrange ki lalakeini, kwini lasu lri tara baai ku naika sabaadhane kwini ki tawvailekete.

¹⁸ “Kwidra twalrisilrisi ku ababai lri tara kipapaacai.

¹⁹ “Kwidra pasalriu ki waudriwdripi lri tara kipapaacai.

²⁰ “Ku kai papia nakwane ka Tamatama patarumara, la patarwamara papia ki drumane ka twaumase ku umawmase lri tara kipapaacai.

²¹ “Madha sidrekadrekase ki badhabadha si tusinalreme ki singibabadhane; tara ngulringava kunumi nasaliakaikai numi ikai ka Izipiti.

²² Madha sidrekadrekase ki walibakane si pakulrulrulu.

²³ Lwiyasi la sidrekase numi liniane, kunaku ka Tamatama, lri kilalraku ku kitubitubi lini,

²⁴ si lri kaelaelaku, la lri papacadhaku numiane ara adreme; ku labaibai numi lri awalibakane; ku lalalake numi lri apakulrulrulu.

²⁵ “Lwiyasi la pakisalrusu ku paisu ki naneanenga ki kawkawluli ka matiakukuru, madha pangialralrau ki tarapakisalrwalru malra ku lalake.

²⁶ Lwiyasi la malrasu ku laimai ki palrapalra tusadrepetane, tara sawlria iniane lu kaina mulebe ku vai;

²⁷ asi lwiyane kwini kathane kwini laimai ku sakaculwaneini, lu kakadrwa kwini lai lri maka sakaereke? Lwiyasi kwini lasu la kitubi nakwane, lri tara tubalreaku, asi lwiyane mathalradhaku.

²⁸ “Madha tudreadreadrekase ki Twaumase, la madha pusupusu ki kiacapili ki mapapangale.

²⁹ “Malra kwini tau kitaalekesu: Lataleke, bava si lawlau, la ikai ki apatarumarane si patarumara nakwane. “Malra kwini ki takatakanga ka lalakesu si patarumara nakwane.

³⁰ Malra kwini sanaka aswalalanga kitulalake ku lwange ku kiu patarumara nakwane. Kwini aswalalanga ka sawvalai ka lwange si kiu lri dulru tupapalra ki tina ka lwange si kiu makapitulu, lu daruru ki samakavalrulu ala patarumaraili.

³¹ “Kunumi yai, kawkawluli, lakamani kainu lri kane ku beate ki nikithuriacane ki waudriwdripi ku nilapulapwane; malra pakane ki tawpungu.”