Biblia Todo Logo
Bìoball air-loidhne

- Sanasan -

Takatwasane Izipiti 21 - Ngudradreadrekadhane Ka Sisiu 魯凱語聖經


Kakudhane ku amarasikaiyane ki duri
( Tapelane Drekase 15.12-18 )

1 “Papia ki mapapangale ki swa Iseraylri pelaela kikai lebe kai ki lakakudhane.

2 Lwiyasi la langaisu ku tangea ku swa Hiburu tuduri, kwini lasu lri tara pasikai muswane kaungu taraeneme ka caili. Lu darurunga ki sakapitu ka caili, kwini lasu lri dulru siwlriwlriane ngilralraingi, kai lri baai ku salangadhane ku paisu.

3 Lwiyasi laka kaiyana marudrange sa aduri muswane, lulri katwase kai lri dulru iluku ki labaibaini; lwiyasi laka marudrangenga sa aduri muswane, lri maka iluku ki labaibaini katwase.

4 Lwiyasi ku labaibaini ala ka tawkini ka wabaai iniane, si kwini labaibaini la pasikai iniane tulalake lapu ki lalalake, kwini ababai si lalalakeini lrika tawkiane; kwi lasu lri tarungeangea katwase.

5 Alaiyasi kwini duri la kawriva pathingale ala ka madalame ki tawkini si labaibaini, lalalakeini, la kai lreme tarungeangea katwase ngilralraingi,

6 kwini tawkini lri tara mailuku iniane mwa ki tasukusukubane, ikai kwini lri paacegecege iniane si pasutalu ki lrawlrawdru ka acegecege ikai ki sadringidringi lrawlrawdru, lai arakai ku uriti lutu ki calringaini. Lukamiyaiya kikai, kai lasu lri makalautunga pasikaikai ki tawkini.

7 “Lwiyasi la ikai ku umawmase ku wamalra ki lalakeini ka ababai kilangai aduri, kwini alisu kai lri maka mararamau ki sawvalai ka duri maka kipasiwlri ngilralraingi.

8 Alaiyasi kwini nawalangai iniane laka kiasanu sitaelrelre iniane; sakabilrilinga la kalraasenga iniane, lri maka dulru ku tamaini pangulangai si sawlri iniane; kwini tawki kai lri maka malra iniane kilangai ki maelanane ka zuku, asi lwiyane kwini lasu puacakunga kwini ki alisu.

9 Lwiyasi ikai ku walangai ku duri ka ababai si baai ki lalakeini ka sawvalai, lri malra tukalithane iniane pangimia ki lalakeini.

10 Alaiyasi ikai ku sataelrelreane ku sakadrusa, kwini lasu ku apangimiane ki aswalala ka taelrelre, lri kai kaela ku abaadhane ku akaneane, laimai si atadrusane.

11 Lwiyasi lakai maka pangimia marasikai kwini ki aswalala ka taelrelreini kikai taitulrwane ka atara pangimiane, lri tara pangilralraingi iniane katwase, kai lri maka malra ku namaneemanenga ku sacugane patwalai iniane.”


Kakudhane lu pathavungu ki mabebetethe ki umawmase

12 “Sanaka walrumai ki umawmase pakela ku papacai, lri tara kipapacai;

13 lwiyasi kaika waranau papacai ki umawmase, ala ka pangialisi, kwini lasu lri maka mubere mwa kwini ki takelretaneli.

14 Lwiyasi ikai ku umawmase ku waranau papacai ki umawmase, lri tara kipapacai; adravane kwini lasu ka mwabere mucucubungu ki tapatarumaramarane, kai lri dulru kai kipapacai.

15 “Sanaka walrumai ki marudrawdrange, lri tara kipapacai.

16 “Sanaka wakerenge ki umawmase, la malra iniane kilangai aduri, ku wamalra pikai si tuduri, lri tara kipapaacai.

17 “Sanaka maelaela pusu ki marudrawdrange, lri tara kipapaacai.

18 “Lu malralrumai ku tadrusa, kwini taingea la arakai ku lrenege ku alrima pakadula ki taingea, ai kai papacai kwini ki taingea, kai lri kipathavungu. Lwiyasi kwini kialrumai la kadula si itapeapecane,

19 ai lukabilrilinga la dulrwana ngidrakale, siwkudru mulatadre ki lrawlrawdru, kwini walrumai iniane lri tara thavungu ku tamulisiane ku lavaini, si lri kicapili pawdringai iniane.

20 “Sanaka arakai ku ukudru sititi ki duri, adravane ka sawvalai ka labaibai, kwini duri la makakaai pacai lri tara kipathavungu.

21 Lwiyasi kwini duri la makavaleana makapusaleana ala pacai, kwini tawki kai lri kipathavungu; kudra mulisingaini ikai ki tacekecekelane lrika amani ku sakipathavunganeini.

22 “Lwiyasi la ikai ku umawmase la ngwalai ku tamalralrumadhane si lrudrulu pakadula ki tawbaliri, kwini tawbaliri la kilribate, ai kai pakadula ki talidruma, kwini lasu lri tara thavungu; ku apakathainwane thavungu lri tara kaamani kwini taelrelre ki kiapakadula ka ababai ku pwataluvaivai, lai lri pangukaiyana ki taraturathudane turingaringau ku apangimiane.

23 Lwiyasi kwini tawbaliri la kamanini ku kiapakadula, kwini lasu lri kibilri, pia ku tangimiaane kwini alisu,

24 luka maca lri biilri pamaca, luka alrima lri biilri palrima, luka drapale lri biilri padrapale,

25 lu kiculu lri biilri culu, lu kidula lri biilri pakadula, lu kilrumai lri biilri lrumai.

26 “Lwiyasi ikai ku umawmase ku walrumai ki maca ki sawvalai ka duri ki ababai ka duri, la pakalisi ki thili ki maca, kwini lasu lri tara pangilralraingi kwini ki duri, tusathavungane kwini ki kiapakalisi ku maca.

27 Lwiyasi kwini lasu la lrumai si panguvalisane ki duri, lri mialri pangilralraingi kwini ki duri, tusathavungane ku tanguvalisananeini.”


Capilane ki pimanemanane

28 “Lwiyasi ikai ku lwange la lawngu si papacai ki umawmase, lri dulru arakai ku lrenege papacai kwini ki lwange, ai kwini beateini madha kanekane; kwini pilwangane kai lri kipathavungu.

29 Alaiyasi kwini lwange laka talaulawngane si pakadula ki umawmase, kwini pilwangane laka kingikalralenga kikaelaela, laka sakamia kai malra pakerenge kwini ki lwange, kwini lwange la lawngu papacai ki umawmase, kwini lwange arakaiya ku lrenege papacai, si kwini pilwangane lri mialri kipapacai.

30 Lwiyasi kwini pilwangane arakaiya ku paisu thavungu ki niakesu lu kiiya, kwini lasu lri tara pangimia ku kakudhane baai thavungu.

31 Lwiyasi kwini lwange la lawngu ki vavalake ka sawvalai ki vavalake ka ababai, lri tuthadalrane kwini taiyane ku kakudhane pangimia.

32 Lwiyasi kwini lwange la lawngu papacai ki sawvalai ka duri ki ababai ka duri, kwini pilwangane lri tara thavungu kwini ki tawki ki duri ku paisu pakamatulrulu ku gingi, si kwini lwange lri arakai ku lrenege papacai.

33 “Lwiyasi ikai ku umawmase ku mwacaebe ku sacaebane ki dralremedreme, ku walruku ku dralremedreme la kai caebe pudriadringai kwini ki dralremedreme, la ngwalai si mucilri ku lwange ku ruba mwadringi,

34 kwini lasu lri tara maalra ku paisu thavungu kwini ki pimanemanane, si kwini wapacai ka nilapulapwane sawlri kwini ki lasu.

35 Lwiyasi la ikai ku lwange ku walaungu papacai ki vaeva ka lwange, kwini taidrusa lri kilangai kwini ki panianianiake ka lwange, la mavala mararamau kwini paisu ka kilangai lini ku lwange, lai lri culu kwini wapacai ka lwange si mararamau mapithingi.

36 Alaiyasi ikai ki lalwange ku vaeva ku talaulawngane ki druma, kwini pilwangane la kai pudriadringai pakerenge, kwini lasu lri tara malra ku vaeva ku panianianiake ku lwange thavungu ki ecebaneini, kwini wapacai ka lwange lai ka iniane.”

© The Bible Society in Taiwan, 2017

All rights reserved

© 臺灣聖經公會版權所有,2017

Bible Society in Taiwan
Lean sinn:



Sanasan