Takatwasane Izipiti 2 - Ngudradreadrekadhane Ka Sisiu 魯凱語聖經

Takitulalakane ki Musi

¹ Ikai kwini yakai ku tangea ku swa Lrivi la karudrange mwa ki thadalrane ka zuku lini,

² la tulalake ku vaeva ku sawvalai. La drele kwini ki daini ngiesadhane ku tatulringavaneini, la balai iniane taratulru ka dramare.

³ Sakai maka dulrunga apatumatumane babalai kwini ki lalake, la malra ku tirivu tuniwku, la arakai ku keretange icici, ku kaika angukaiyane ki acilai, ala malra kwini ki daini puniwkane, la malra kwini niwku balai puadringi ki mawtiririvu.

⁴ Ku takaini ka ababai kai ki daini la sadaili acegecege, lri dredrele lu ikai ku tangimiamiane.

⁵ Ku lalake ka ababai ki talialalai la kela mudrakerale mubanau sikelre; kudra lasasiakawluini la makitu ibabiabila ki drakerale dadadavace. Kwini alisu la kirimu drele ikai adringi ki mawtiririvu ku vaeva ku niwku, la pamwa ki sasiakawluini malra.

⁶ Kwini alisu la mucaebe la drele ikai ku tangea ku wagelregelrethe ka sawvalai ka daini, la kakuru iniane, la iya kai, “Kikai lri tara ka daini ki swa Hiburu.”

⁷ Ikai kwini, la kela kwini takaini la iya kai ki lalake ki talialalai, “Matumanaini anau mwa si silape ku swa Hiburu ka ababai lani kamani ku siarapale pathuthu iniane?”

⁸ Kwini lalake ki talialalai la iya kai, “Mathariri!” Kwini ababai la katwase dawlu kwini tina ki daini.

⁹ Kwini lalake ki talialalai la kawriva kwini ki ababai, “Iluka kai ki daini la pasikai nakwane lapu iniane, lri tara baadhaku ku tamulrawlravanesu.” Kwini alisu la iluku kwini ki daini, la sirapale lapu iniane.

¹⁰ Sa kadrawnga kikai vavalake, la iluku iniane pwa ki lalake ki talialalai, kwini lalake ki talialalai ala tukavaga silalake iniane. La iya kai, “Patwaladhaku ki aciacilai malra kai ki vavalake, la tapasi Musi iniane!”

Ku Musi mwabere mu Midiange

¹¹ Maadrawnga ku Musi, laka tangulatalatadrane lrikape ki sakacekeleini ka swa Hiburu; la drele liniane kipakwalrialri. La ikai ku kingivaalane, la drele ku tangea ku swa Izipiti papacai ki tangea ka sakacekeleini ka swa Hiburu.

¹² Ku Musi la masiasirare drele, tali kakadrwa ku umawmase ku wadredredrele la iya, la papacai kwini ki swa Izipiti, si malra kwini kinawmasane dralreke pikai enaenai.

¹³ Sakakaiyane, ku Musi la mwanga kwini, la drele ku tara swa Hiburu ku malralrumalrumai, la iya kai kwini ki mapasaisalriu, “Asu kirimu tusinalrelreme ki sakacekelesu?”

¹⁴ Kwini lasu la tubalre, “Aneane ku siakawlu muswane atamatama naiane, kamani ku kiavavaga naiane? Papacaisu kwidra ki swa Izipiti, lalri mialrisu papacai nakwane?” Sa kilalra ku Musi kikai vaga, la kathathiburu turamuru, la iya kai kidremedreme, “Lri tara ka takalranga ku wathingale kwini tapangimianeli.”

^15-16 Ku talialalai la kilalra kikai, lalri papacai ki Musi, ku Musi la mubere mu Midiange, la ikaikai kwini. Yakai saka minakavalane, ku Musi la nene ikai thili ki taaciladhane; kudra lalake ki barakalai ka Yetheru ku tapitu ka labaibai la kela kwini mwalru, lri pasuete ki taaciladhane, lri pawngulu ki lakiu ki tama lini.

¹⁷ La ikai ku la taralapulapu ki kiu, la pakatwase liniane. Ku Musi la palakebe liniane, la paralubu liniane mwalru si pawngulu ki lakiu.

¹⁸ Sa siwlri mwa ki tama lini, la kivaga ku tama lini, “Anu sara mubalriu kaikameane?”

¹⁹ La tubalre, “Yakai ku tangea ku swa Izipiti ku paralubu naiane, la pakatwase kudra ki twasinalreme naiane ku taralapulapu ki lakiu, la paralubu naiane vau ku acilai si pawngulu ki lakiu.”

²⁰ Kwini tatama la kivaga ki lalalakeini, “La ikainu kwini lasu? Anu suru iniane pikai thili ki taaciladhane? Lu dawla lani kibalrulu mitane.”

²¹ Ku Musi la palraingi ikaikaainga kwini linianane; ku Yetheru la pasitaelrelre kwini lalakeini ka Zipura;

²² ku Zipura la tulalake ku sawvalai. Ku Musi la iya kai, “Kunaku saliakaikaiyaku badhabadhane ka badhabadha, la sunagane ki lalake pasi Geresume!”

²³ La kawlainga ku tangilribatane, la pacainga ku talialalai ki swa Izipiti, ku swa Iseraylri laka thadalraneana ku kipakwalrialri lini. Kwini lalasu la kitubi ki Twaumase ku apalribulane, kiatubi iniane ku akiparalubane lini kidaili ki kipakwalrialri lini.

²⁴ Ku Twaumase la kilalra ku tadangane lini, si ngulringau ku nakiketeketeini ki cucungulane lini ka Aberahame, Isake si Yakubu,

²⁵ Wadrele ku tangimiamiane ki swa Iseraylri kituduri, la kakalithi liniane turamuru.