Takatwasane Izipiti 13 - Ngudradreadrekadhane Ka Sisiu 魯凱語聖經

Patarwamara ku aswalaalanga kitulalake

¹ Ku Tamatama la kawriva ki Musi,

² “Kunumi malra kwini takataakanga si patarumara nakwane, asi lwiyane kikai swa Iseraylri kudra takatakanga ka sawvalai si aswalaalanga kitulalake ka lanilapulapwane nakwane patuelre.”

Tamwalrane ki nipawsemakane tulrisi ka vai

³ Ku Musi la kawriva ki mapapangale ki swa Iseraylri, “Tara ngulringaava kikai vai; kikai vai matwase numi ka Izipiti ka takituduriane numi. Kikai vai, ku Tamatama arakai ku maadrau ku pukuini sangiluku numiane mulatadre. Kunumi madha kane ku nipawsemakane ka pange.

⁴ Kunumi sa katwase numi Izipiti kikai vai amani sakadramare ki Abibe, ka aswalaalanga ka dramare.

⁵ Ku Tamatama nakiaketekete ki cucungulane numi, lri malra kwini kadaengane ki swa Kanange, swa Hite, swa Amuri, swa Hivi si swa Yebuse si baai numiane. Ku Tamatama lu pudaanenga numiane kikai mwalwalwaludru ku mireke si valu ka mathariri ka kadaengane, kunumi pikaiya ki aswalaalanga ka dramare tulrisisi kai ki lrisi.

⁶ Ikai ki nimakapitulane, kunumi la tara kanea ku kaika nipawsemakane ka pange; ikai ki samakapitulu, kunumi tulrisisia, sukubu ki Tamatama.

⁷ Ikai kai ki nimakapitulane, kunumi tara kanea ku kaika nipawsemakane ka pange. Ikai ki lalrilringulu numi kaika nipalraingane pikai ku sapawsemasemakane si ku nipawsemakane ka pange.

⁸ Sana pathagili ku atulrisisiane, kunumi la ngutatikia pelaela ki lamwabaibalrithi numiane kikai tatulrisisiane pia kikai twalrisisi kudra tapangimiane ki Tamatama ku pinangu Twaumasane ka puku sakatwase numi ka Izipiti.

⁹ Lu pasusu kikai tatulrisisiane amani ku sapakipapawlringavane numiane, mararaamau lu patuthingale pikai ki alrima ku siaedrete pikai ki punu patuthingale, lanu maka ngulringau parwakaikai silrigulrigu pikai ki takidremedremane numi ku hulrice ki Tamatama, asi lwiyane ku Tamatama arakai ku maadrau ku pukuini sangiluku numiane katwase Izipiti.

¹⁰ Kunumi la picaila ikai kai ki kalamiane tulrisisi kikai tatulrisisisiane.”

Takataakanga ka lalake ka sawvalai

¹¹ “Ku Tamatama napapia numiane si lacucungulane numi kiketekete, ku ailukane numiane mu Kanange. Kudra lu baai numiane kwini kadaengane,

¹² kunumi tara patarumara ki Tamatama kwini takataakanga ka sawvalai ka lalake. Sanaka takataakanga ka sawvalai ka lalake si aswalaalanga kitulalake ka nilapulapwane patarumara ki Tamatama patuelre.

¹³ Kunumi arakaiya ku lrulai ka kiu kibalrithi sawlri ku balase ka ruba. Lwiyasi kai numi pasana sawlri kwini ki balase ka ruba, pwa celra kwini ki lreini. Kunumi tara sawlria balrithi kwini ki takataakanga ka sawvalai ka lalake.

¹⁴ Lukabibilrili ku lalake numi lri kivaga, ‘Kikai manemane ku patharevane?’ Kunumi la tubalrea, ‘Ku Tamatama arakai ku maadrau ku puku sangiluku mitane patwalai ka Izipiti kwini takitudurianeta.

¹⁵ Sakamani kwini, ku kidremedreme ki talialalai makawlukulu, kai pakatwase mitane, ku Tamatama la papacai ki sanaka aswalaalanga kitulalake paelre ki takataakanga ka sawvalai si aswalaalanga kitulalake ka lanilapulapwane. Lakamani, ku patarumarata sanaka takataakanga ku lanilapulapwane baai ki Tamatama tusapatarumarane, ai wamalrata balrithi sawlri ki takataakanga ka sawvalai.

¹⁶ Kikai tapasuswaneta kikai kakudhane pakai ku apakipapawlringavane mitane, mararaamau lu patuthingalane pikai ki alrima ku siaedrete pikai punu patuthingale, pakai ku angulringavaneta ku Tamatama ka arakai ku maadrau ku puku sangiluku mitane patwalai ka Izipiti mulatadre.’ ”

Ememe si Apwi ka ulrudru

¹⁷ Ku talialalai ki swa Izipiti sa pakatwase ki swa Iseraylri, ku Twaumase kai mailuku liniane pangukakai ka sadedethe ka kadalranane kavai babiabila ki laveke ka Pelisitine mudradha. Ku Twaumase kiadremedreme, “Amani lu kipadradresenge ku amakakaruburane si ngitatasiwlriwlri, la siwlri mu Izipiti.”

¹⁸ Lakamani ku Twaumase wailuku liniane katwase ngutatadailane, ngukakai calragulragu, papia tali laveke Suize. Ku swa Iseraylri sa katwatwase Izipiti ngiragelanenga pudriadringai, kiapadulrunga ku amakakaiyane kikaruburu.

¹⁹ Ku Musi wailuku ku abu ka kinawmasane ki Yusepe katwase, ku Yusepe nakiaketekete icucubungu nakwane amia ki swa Iseraylri, “Ku Twaumase lu palribulu numiane, kunumi tara paelrea kai culraleli iluku katwase, katwase kikai kadaengane.”

²⁰ Ku swa Iseraylri sa katwase Sukuthe, la ikai babiabila ki enaenai ka Ithame tusasuladhane.

²¹ Lukavaiyane, ku Tamatama sacucubungu liniane, la arakai ku ememe ka ulrudru pathingale ku angukaiyane; lukamaungu, ku Tamatama arakai ku apwi ka ulrudru paledra liniane. Lu mia kai, lakamani lukavaiyane lukamaungu maka kisaswarau lini ki kadalranane;

²² lukavaiyane yakai ku ememe ka ulrudru, lukamaungu yakai ku apwi ka ulrudru, ka tasacucubungane liniane.