Takatwasane Izipiti 12 - Ngudradreadrekadhane Ka Sisiu 魯凱語聖經

Takilragavane ka lrisi

¹ Ku Tamatama yakai Izipiti kawriva ki Musi si Arungu,

² “Kikai dramare kai lrikamani ku tapathagilane ki dramadramare, kalri kamani kudra aswalaalanga ka dramare ki nitaracailane.

³ Kunumi kikai pelaelali la malra si bulru ki swa Iseraylri makanaelre: Ikai kai ki dramare kai ki samakamangeale ka vai, kwini tatama ki dadadaanane lri tara pasikai ki tacekecekelaneini pilri ku tikiane ku kiu ku tikiane ku kakiuane.

⁴ Alaiyasi kwini lasu la tabekele ku wacekecekeleini, si kai lri maka eleme kwini umasane ka kiu, kwini lasu lri dulru mapithingi ki pasiagisini ku vaevane ka kiu, lri singikai ku tatapiane ku umawmase lulri pingithainu si pavalavala.

⁵ Lu arakai ku nikiubawbalane ka kiu ku kakiuane mararaamau, ai lri tara ka taracailinga ka balase ka kiu, si lrika kakadrwa ku takatumanane.

⁶ Lu kelanga ki saka 14 ka vai kai dramare kai ki maungu, ku swa Iseraylri makanaelre lri culu kwini pilri lini ka nilapulapwane.

⁷ Ku mapapangale lri malra kelrete ku erai si drisisi ki tara thili ki lrawlrawdru si tali belenge ki lrawlrawdru, si ikai daane kane ku kiu.

⁸ Kwini ki maungu lri tara kane ku niakamane ku kiu, mapalili ka lacenge si kaika nipawsemakane ka pange.

⁹ Madha pingangetangeta kane ku beate ki kiu, la madha kanekane ku nithingelrane, tara kanea ku umasane ka niakamane, paelre ki awlru, sadavadavace si tali adringi.

¹⁰ Ku tedrane madha pukaiyaiyane; ku tedrane tara lama imauawngane.

¹¹ Lu kanekane numi, kiraririmwa kane; la lritheethe ku lakete, sikece, la malra ku ukudru. Kikai yai amani ku Tamatamane ka Takilragavane ka lrisi.

¹² “Ikai kwini ki maungane, lri mulebeaku mwa ki swa Izipiti, papacai demedeme ki tinutakane, kai susu ku umawmase ku nilapulapwane, lri papacai patuelre. Lri pathavungaku sanaka latwaumase ki swa Izipiti. Amaniaku ku Tamatama.

¹³ Kwini erai ki taibelengane ki lrawlrawdru amani ku sapatuthingalane ki taikaiyane numi. Lu pathavuthavungaku ki swa Izipiti, kainaku lri pakadula numiane.

¹⁴ Sana daruru kai vai kai, kunumi tara tulrisisiia, ngulringalringau ka tatulrisisisiane ki Tamatama ka vai. Ku agagane numi lai lri mialri tara pasusu kikai tatulrisisisiane, cegecege ku apalralrawlrawthane ka kakudhane.”

Tamwalrane ku sapawsemakane ka lrisi

¹⁵ Ku Tamatama amia kai, “Ki nimakapitulane, kunumi madha kanekane ku nipawsemakane ka pange, kanea sikakathane ku kaika nipawsemakane ka pange. Ikai kwini ki aswalaalanga ka vai mwalra demele ku yadaane ku sapawsemasemakane, ikai kwini ki nimakapitulane alaiyasi ikai ku umawmase ku wakane kwini nipawsemakane ka pange, kwini lasu kai lri kipasipinga ka kawkawluli.

¹⁶ Kwini ki aswalalanga ka vai si samakapitulu, lri isarubu numi si taelre sukubu. Kikai nimakapusalane, kathane ku apadulrwane numi ku taleke, madha piapia ku drumane ku awngane.

¹⁷ Kunumi tara pasuswa kikai Tamwalrane ku sapawsemakane ka lrisi, asi lwiyane kikai vai kai, amani ku tasangilukaneli numiane ka lazuku katwase ka Izipiti. Lu daruru kai vai kai, kunumi tara tulrisisiia, ku lamwabaibalrithi numiane la mialri ani tara pasusu kikai lrisi, si cegecege ka apalralrawthanenga ka kakudhane.

¹⁸ Twalai kwini lukamaungu ki samaka 14 ka vai ki aswalaalanga ki dramare, pakeela lukamaungu ki saka 21 ki vai, kunumi madha kanekane ku nipawsemakane ka pange.

¹⁹ Ikai kai ki nimakapitulane, madha pudadaane ku nipawsemakane ku pange; sanaka wakane ku nipawsemakane ku akaneane ku umawmase, adravane ka kiatulalake ikai kuni ku yabadhanane kitulalake, ku nagane lini makanaelre lri patwalai ki kawkawluli kimwalra supilri.

²⁰ Kunumi madha kanekane sanaka nipawsemakane ka akaneane; sanaka mapapangale lri kane makanaelre ku kaika nipawsemakane ka pange.”

Aswalaalanga ka Takilragavane ka lrisi

²¹ Ku Musi la sarubu ki kiacapili ki swa Iseraylri, pelaela liniane, “Kunumi ka dadadaanane pilria ku vaeva ku lrulaiyana ku kiu, la culu, la tulrisisi ki Takilragavane ka lrisi.

²² La malra ku ererece ku buraburu, la dapenge kwini yathalangane ku erai si drisisi pwa ki taibelenge ki lrawlrawdru. Pakeela ki kaiyane ki mialrealre, sanaka aneeanenga madha paulatalatadre.

²³ Ku Tamatama lu ngukakai ki Izipiti, si papacapacai ki swa Izipiti, sana drele ku erai ikai taibelenge si tara thili ki lrawlrawdru, lri tara lribate kwini ki lrawlrawdru, kai paudaane kwini ki kiasikawlu ku amudane ka sasiakawlu mudaane ki daane numi papacai numiane.

²⁴ Kunumi si lagagane numi tara apalralrawthana pasalaladha kikai ki kakudhane.

²⁵ Lu mudaanenga numi ku puvaganga ki Tamatama ka kadaengane, kunumi tara paluluda kikai kakudhane kai ki lrisi.

²⁶ Alaiyasi ku lalake numi la kivaga numiane, ‘Kikai kakudhane kai manemane ku patharevane?’

²⁷ Kunumi tubalrea, ‘Kikai yai samusakenane ki Tamatama ku Takilragavane ka lrisi kikai kakudhane ka sapatarumarane, asi lwiyane sa ikai Izipiti ku Twaumase walribate ki ladaane ki swa Iseraylri. La papacai ki swa Izipiti, si paudripi ki niaketa.’ ” Ku swa Iseraylri la pidruru, sukubu ki Tamatama.

²⁸ La katwase makitu mulatadre, si singikai ku tacunane ki Tamatama ki Musi si Arungu pangimianga.

Kiapapacai ku aswalalanga kitulalake

²⁹ Sakelanga ki kabiceacelrakane, ku Tamatama papacai nguelre ki aswalaalanga kitulalake ki swa Izipiti, twalai ki abebeelengenga ka tinwapane ki talialalai kwini lri kamani ku mwacungulu si atalialalai ka lalake ki talialalai, pakela ki tinwapane ki lakiaemenge; adravane ka aswalaalanga kitulalake ka lanilapulapwane mialri papacai.

³⁰ Kwini sakamaungu, ku talialalai ki swa Izipiti, ku sasiakawluini si mapapangale makanaelre ki kuni la makitu pacunu kasamali. Ikai Izipiti kathanenga ku makakaralealeale tubitubi ku lalingau ku kilalra madu, asi lwiyane sanaka daane yakaai ku wapacai ku umawmase.

³¹ Kwini sakamaungu, ku talialalai ki swa Izipiti la dawlu ki Musi si Arungu, la iya kai liniane, “Lu kirimwa katwase, kunumi si kwini sakacekele numi ka swa Iseraylri kirimwa katwase kai ki kuni nai, pangimia kudra kitubi numi si mwa sukubu ki Tamatama numi.

³² Mailuku ki lakiu si lalwange numi sarakatwase; la pasikai nakwane subulrubulru.”

³³ Ku swa Izipiti la rututu ki swa Iseraylri pakatwase ki kuni lini; kwini lalasu amia kai, “Lu kai numi katwase kikai, lri makitu pacai nai kawtu.”

³⁴ Ku swa Iseraylri la malra ku kaika nipawsemakane ka malaelamenge pwa ki palungu, la arakai ku laimai cabu, si angeale.

³⁵ La mialri lini pangimia ku tacunane ki Musi liniane, mwa ki swa Izipiti malra ku kingi gingi silu si laimai.

³⁶ Ku Tamatama la pawsakene ki swa Izipiti ki kawkawluini; kwini lalasu ta saiya ku manemane, ku swa Izipiti la baai liniane ku manemane. Lakamiyaiya kikai, ku swa Iseraylri wailuku ku tacekecekelane ki swa Izipiti.

Ku swa Iseraylri matwase Izipiti

³⁷ Ku swa Iseraylri singikai Ramese dadavace mwa Sukuthe. Lu kai paelre asipi kwini ki labaibai si lavavalake, ku sawvalai sikakathane, ta 600,000 ku umawmase.

³⁸ Tapangale ku maelane ka zuku si lalwange lakiu ku twapapalra liniane katwase.

³⁹ Kwini lalasu la tarakadalranane akame kwini iluku lini twalai Izipiti, kudra kaika nipawsemakane ka malaelamenge, asi lwiyane kiarututu kirarimu katwase Izipiti, la kai maka ngipapadulru ku laakaneane.

⁴⁰ Ku swa Iseraylri ku taikaiyane lini Izipiti tara 430 ka caili.

⁴¹ Kwini tapalikaiyane ki tatara 430 ka caili, kwini lazuku ki kawkawlu ki Tamatama la makitu katwase Izipiti.

⁴² Kikai ki maungu, Ku Tamatama ngiakakamani palakebe liniane, sangiluku liniane katwase ka Izipiti; ku swa Iseraylri la mialri drangalru kwini ki maungu, si malra patarumara ki Tamatama, kaamani ku angulringalringavane drangalru ki vaeva ka maungane ki mwabalribalrithi ki zidai.

Kakudhane ki Takilragavane ka lrisi

⁴³ Ku Tamatama kawariva ki Musi si Arungu, “Wabadhaku numiane kikai kakudhane ki Takilragavane ka lrisi: Ku maelane ka zuku kailri maka kane ku titikiane ka kiu ki Takilragavane ka lrisi;

⁴⁴ ai kudra langainga numi si laka kiagelregelrenga ka laduri kai lri kiruthuku kikai.

⁴⁵ Kudra lri padawdaalru ikai numiane ku badhabadha si tuvange kai lri maka kane.

⁴⁶ Lu kane numi ikaiya ki daane numi makanaelre ka wacekecekele, madha ililuku pulatadre; kudra lavigwa ki tikiane ka kiu la madha pakacelracelra.

⁴⁷ Ku mapapangale ki swa Iseraylri makanaelre tara tulrisisia kai ki lrisi ka vai.

⁴⁸ Ai kudra kai kiagelregelre ku umawmase kai lri maka kane ki tikiane ka kiu. Lwiyasi la ikai ku yakai numiane ku maelane ka zuku, ka swatelrainga ikaikai, lri pasusu kai ki Takilragavane ka lrisi musakene ki Tamatama, kunumi tara paswalaana pasikai ki wacekecekeleini ki lasawvalai pakigelregelre. Lukamiyaiya kikai, kwini lalasu lri kipasudalepenga ka kiatulalake ikai kikai ka swa Iseraylri ka umawmase, lri dulru kane ku tikiane ka kiu ki Takilragavane ka lrisi.

⁴⁹ Sanaka kiatulalake ikai kikai ka swa Iseraylri si yakai numiane ka maelane ka zuku lri makitu pasusu kikai kakudhane.”

⁵⁰ Ku swa Iseraylri makanaelre pasusu ku drekase ki Tamatama ki Musi si Arungu ku kakudhane.

⁵¹ Ku Tamatama la pikai kwini ki vai sangiluku ki lazuku ki swa Iseraylri katwase Izipiti.