Takatwasane Izipiti 11 - Ngudradreadrekadhane Ka Sisiu 魯凱語聖經

(Mwasaka mangeale) Ku aswalalanga kitulalake ka sawvalai wapacai makanaelre

¹ Ku Tamatama la iya kai ki Musi, “Lri pulebeaku ku bibiilrilinga ku sapakwalriane ki talialalai ki swa Izipiti si mapapangaleini. Kikai, lri tara pakatwase numiane. Ku tengatengane, kwi lasu lri tara pakatwase numiane kikai ki kadaengane.

² Kikai lu mwa pelaela ki swa Iseraylri, ani mwa ki lapasiagiagisi lini malra ku kingi, gingi, silu.”

³ Ku Tamatama pawasakene kwini ki swa Izipiti ki swa Iseraylri. Ku tabebelenge ki swa Izipiti si mapapangale makitwa musakene ki Musi ka saniange turamuru ku takaumawmasane.

⁴ Ku Musi la iya kai ki talialalai, “Ku Tamatama amia kai, ‘Kaimaungu luka kabiceacelrakane, lri mulebeaku mwa Izipiti.

⁵ Ku takatakanga ka sawvalai ki swa Izipiti, twalai kwini ki lri mucungulu atalialalai ka lalake ki talialalai pakela ki sawvalai ka lalake ka tulalake kwidra ki lakawkawlu ka tarasilribulribu, lri makitu pacai. Kudra la aswalaalanga kitulalake ka lanilapulapwane lri makitu pacai.

⁶ Palraelre ki swa Izipiti lri ikai ku wakaralealeale tubitubi; kikai tangimiamiane yai kadrwana ku ngimiyaiya kunadruma, lukabibilrili mialri kakadrua.

⁷ Ai ikai ki daane ki swa Iseraylri, adravane ka tawpungu kai lri alealeale ki umawmase ki lanilapulapwane. Kikwini, ala lri thingalesu ala ka amaniaku ku Tamatama; lri pakakaelaku ki swa Izipiti si swa Iseraylri.’ ”

⁸ Sakabibilrilinga ku Musi la iya kai, “Ku lasasiakawlusu lri kela mucucubungu nakwane, si pidruru kitubi nakwane ku lrika amailukaneli ki sakacekeleli katwase. Lu kelanga kwini, ala lri katwasaku kikai.” Ku Musi la kagirimucu katwase twalai ki talialalai mulatadre.

⁹ Ku Tamatama nakawariva ki Musi, “Ku talialalai ki swa Izipiti lri pacungulu kai tarumara ku vagasu, lukamiyaiya kikai, ala lri dulrwaku ikai ki Izipiti pia ku makakalra ku pinangu Twaumasane ka puku.”

¹⁰ Ku Musi si Arungu yakai cucubungu ki talialalai pia kilakikai pinangu Twaumasane ka puku, ai ku Tamatama pakakawlukulu ku takidremedremane ki talialalai, kai palraingi ki swa Iseraylri katwase ki kuni.