Tabekacane 9 - Ngudradreadrekadhane Ka Sisiu 魯凱語聖經

Ku Twaumase si Nua makaketekete

¹ Ku Twaumase swabulrubulru ki Nua si lalalakeini, iya kai, “Lri tulalake numi tuthathatha, ku lamwabaibalrithi lri salraelre kawmasane.

² Kai kadaengane sanaka nilapulapwane, laadhadhame, yacakena ka wagulagulai si yadringi ki laveke ka lakange lri mukuludru numiane patuelre, lri kamani numi ku marasiakai.

³ Kunadruma wabaadhaku numiane kai lalacenge ka akaneane numi, kikai lai lri mialriaku baai kikai lawaudriwdripi ka akaneane numi.

⁴ Ai kunumi maadha kanekane lutuumane ku eraeradhane ku beate, asi lwiyane ku niake yakai ki erai.

⁵ Ku aneane ku papacai ki umawmase, lri papacadhaku ki aneane; sanaka mabebetethe ki niake ki umawmase ku waudriwdripi, lri mialri kipapacai.

⁶ Sanaka patwaeraerai ki umawmase, ku palrapalra lri mialri patueraerai iniane, asi lwiyane kwaku ka Twaumase yai wabekacaku ki umawmase ngipapatwalrau ku tangimiamianeli.

⁷ Lri tulalalake numi tuthathatha; ku lamwabaibalrithi numiane lri salraelre sueete kai kawmasane.”

⁸ Ku Twaumase la kawriva ki Nua si lalalakeini iya kai,

⁹ “Kaiasasane kwaku si kunumi si lamwabaibalrithi numi,

¹⁰ si kai kadaengane sanaka waudriwdripi, ka amani kwidra palra numi mulatadre ki varukuru ka lanilapulapwane, laadhadhame kiketekete.

¹¹ Pwakawnaku numiane: Sanaka panianianiake kai lri kipakamudunga kiara telebe lutuumane, kai lri ikainga ku telebe ku wamudu ki kadaengane.

^12-13 Kai balrilawlauli lri ikai ki ememe utaluvaivai, tusapatuthingalane ka palralrawthu ka sakiketeketane. Kikai sakiketeketane yai nikiketeketane numiane si sanaka panianianiake, kai balrilawlau yai amani ku sapatuthingalane ku takiketeketaneli ki kawmasane.

¹⁴ Adravane lukamani luigane, lri pikaiyaku belenge paipai ku kwakulavane ku ememe, ku balrilawlau lai lri ikai ki ememe utaluvaivai,

¹⁵ lai lri ngulringavaku ku kiketeketeli numiane si patuelre ki panianianiake: Ku telebe lri kai amudunga ki sanaka panianianiake.

¹⁶ Lu drelaku ku balrilawlau ikai ki ememe, lai lri ngulringavaku ku palralrawthu ka kiketeketeli numiane si patuelre ki panianianiake ikai kai ki kadaengane.

¹⁷ Kikai yai amani ku kiketeketeli ki yakai kawmasane sanaka panianianiake ka sapatuthingalane.”

Nua si lalalakeini

¹⁸ Ku twalai ki varukuru mulatadre ku lalalake ki Nua yai amani kai: Seme, Hame, Yapethe. (Kai Hame amani ku tama ki Kanange.)

¹⁹ Kikai tatulru ka lalalake ki Nua, amani ku cucungulane ki sanaka umawmase ikaikai kawmasane.

²⁰ Ku Nua tarakaungu, lakamani ku aswalaalanga pacebe ku babudwane ka umawmase.

²¹ Yakai saka nikingivalane, kai lasu la ungulu ku bava si kabusuku, si vilralrakane apece ikai ki balrawbau.

²² Ku Hame (tama ki Kanange) la drele ki tamaini ka vilralralrakane, la katwase pelaela ki tadrusa ka betakaneini.

²³ Ku Seme si Yapethe la malra ku vaeva ku malraagi ku laimai, si pikai ki tabalangane lini, arikalrilrikudru mudaane ki balrawbau, la malra kwini laimai subusubu ki kinawmasane ki tama lini, ku lringau lini la papulalatadre, kai drele ku tavilralrakane ki tama lini.

²⁴ Ku Nua sa ngubusukanenga, la thingale ka amani kwini agiaginga ka lalakeini ka paiya,

²⁵ la iya kai: Kai Kanange lri kipusu! Lri aduri ki labetakaneini.

²⁶ Drengedrengera ki Tamatama, ka Twaumase ki Seme! Ku Kanange lri aduri ki Seme.

²⁷ Ku Twaumase ani pangiradhekane ki Yapethe! Ku lamwabaibalrithi iniane si lamwabaibalrithi ki Seme ani taelre, ku Kanange lri aduri ki Yapethe.

²⁸ Sangilribatenga ku telebe, ku Nua panianiakeana tara 350 ka caili.

²⁹ Kwi lasu sapacai tara 950 ka caili.