Tabekacane 7 - Ngudradreadrekadhane Ka Sisiu 魯凱語聖經

Telebe

¹ Ku Tamatama la iya kai ki Nua, “Kusu si wacekecekelesu lri mudaane numi makanaelre ki varukuru, asi lwiyane wadrelaku ikai kai ki zidai kathanesu ku mwalecege ku kakwakudhane.

² Lri ilukusu ki nilapulapwane mudaane ki varukuru: Sanaka tinumabulane ki takisuswane, ki taingeane ka sawvalai si ababai lrika taipitwane; ku kaika mabula, ku taingeane ka sawvalai si ababai lrika taingeangeane;

³ ku laadhadhame lrika taipitwane ka tadradrusa ku sawvalai si ababai. Lu mia kai, ku makaelaela ku nilapulapwane, adhadhame lri kipalakebe, lri edhale ikai ki kadaengane.

⁴ Lu maka pitulunga, lri pulebeaku ku madradrau ku udale maka masupatele ki vaiyane si maungu, malra amudu patuelre kai bekaceli.”

⁵ Ku Nua la singikai ku tadrekasane ki Tamatama nguvavaeva pangimia.

⁶ Ku Nua satara 600 ku cailini, watelebe kai kawmasane.

⁷ Ku Nua si taelrelreini, lalalake ka sawvalai si lakiathareve mwadaane ki varukuru makanaelre, mubere ki telebe.

⁸ Lu singikaiyane ki lrisi ku nikelretane ka mabula si kaika mabula ka makaelaela ka nilapulapwane, adhadhame, wagulagulai,

⁹ mialri singikaai ku drekase ki Twaumase ku sawvalai si ababai tarudradrusa tupapalra ki Nua mudaane ki varukuru.

¹⁰ Samaka pitulunga, la telebe kai kawmasane.

¹¹ Ku Nua sa taraeneme ka idai ku cailini, kwini ki caili, sakadrusa ki dramare 17 ki vai, kai adringi ki kadaengane kai acilai la mubelenge berai, kai subelebelenge la nguelebane,

¹² si kainganai gugu ku udale maka masupatele ki vaiyane si maungu.

¹³ La ikai kwini ki vai, ku Nua si taelrelreini, si tatulru ka lalalake: Seme, Hame, Yapethe, si lakiathareve mwadaane ki varukuru makanaelre.

¹⁴ Ku makaelaela ku labulabulai, nilapulapwane, wagulagulai, si adhadhame la mialri singikai ku sakamanemanane,

¹⁵ tarudradrusa tupapalra ki Nua mubelenge ki varukuru.

¹⁶ Sanaka waudriwdripi la singikai ku drekase ki Twaumase, ku sawvalai si ababai tarudradrusa mubelenge ki varukuru. Ku Tamatama la atalingikaiyane ki Nua elebe ku lrawlrawdru ki varukuru.

¹⁷ Ku telebe la pacungulu makamasupatele ka vai. Ku acilai la aru kadradrau, ku varukuru la kipelai twalai ki kadaengane.

¹⁸ La aru kadradrau ku acilai, ku varukuru la pathagili kipeapelai ki acilai.

¹⁹ Ku telebe la sueetenga ki kadaengane, kai kawmasane ku latabebelenge ku lregelrege kialreenepenga patuelre.

²⁰ Ai padrimadriimana aru kadrau ku acilai, ku talribatane ki lregelrege ku acilai wakelanga ki pitu ka mituru.

²¹ Kai kadaengane sanaka waudriwdripi: Adhadhame, nilapulapwane, bulabulai, wagulagulai si laumawmase la pacai patuelre.

²² Kai kadaengane sanaka yakaai ku niake la mialri pacai patuelre.

²³ Ku Tamatama waamudu sanaka panianianiake kai kawmasane: Laumawmase, lanilapulapwane, lawagulagulai si laadhadhame; kathane ku Nua si taelre iniane ikai ki varukuru ka panianiake.

²⁴ Watelebe kai kawmasane tara 150 ku vai.