Tabekacane 6 - Ngudradreadrekadhane Ka Sisiu 魯凱語聖經

Ngialisiane ka umawmase

¹ Sa edhalenga ku umawmase si alraelrenga kai kawmasane, si tulalalalakenga.

² Sakamani kwidra yakai kwidra “Lalalake ki twaumase” la drele ki lalalake ki umawmase kwidra ki labaibai ka tathaithariri, la ngisasingikaai ku kadalame lini si mwa sitaelrelre liniane.

³ Lakamani, ku Tamatama amia kai, “Kai umawmase yai swakai ki beate, kai Rili kai lri apalralrawthu ikai adringi liniane; lakamani kai caili lini kai lri dulru palribate ki tara 120 ka caili.”

⁴ Twalainga kwini, kai kadaengane yakai ku tadradrau ka umawmase mutaluvaivai. Kwini lalasu yai amani kwidra mwabaibalrithi ki “Lalalake ki Twaumase” si lalalake ki umawmase ka ababai; kai lalasu amani ku tamagarange si kiamatikaikai ka umawmase sakanadruma.

⁵ Ku Tamatama sadrele ki laumawmase samakitu ngilisiane ku kidremedreme,

⁶ la kasamadre ku tabekacaneini ki umawmase pikai kawmasane. La kwalri tubi ku kidremedreme, ku Tamatama la iya kai,

⁷ “Lri patwaladhaku kai ki kadaengane amudu kai ki bekaceli ka umawmase, la mialri amudu ki bulabulai, wagulagulai si adhadhame, asi lwiyane masamadraku kai tabekacaneli kai ki waudriwdripi.”

⁸ Ai ku Tamatama kiaragai ki Nua.

Abulru ki Nua

^9-10 Kikai tali lebe yai abulru pangukai ki Nua: Ku Nua tatulru ku sawvalai ku lalake, Seme, Hame, Yapethe. Ku Nua kadrwa ku pwalane, ikai kwini ki zidai kathane ku mwalecege ka umawmase; makiasudaalru ki Twaumase.

¹¹ Ku drumane ku umawmase yadrepele ka tanganganga lu drele ku Twaumase; kai kawmasane yainu kidruanga ku malrumalrumalrumai.

¹² Ku Twaumase la paswalebe drele kawmasane, la drele kawmasane ka ngialisianenga, ku tangivelevelane si kakwakudhane ki umawmase ngialisianenga turamuru.

¹³ Ku Twaumase amia kai ki Nua, “Malrithethengaku ku amudane ki laumawmase. Kai kawmasane swaeteanenga ku tapasalrivane lini, lri pakarededelaku liniane kai kawmasane amudu.

¹⁴ Kusu pilria si arakai ku mathariri ka angatu, la ngipapasikai darepe ku vaeva ku varukuru; kwini adringi ki varukuru lri pagiagiagisisu ku taikaikaiyane, tali adringi si tali latadre la drisisi ku keretange.

¹⁵ Ku lragiane ki varukuru 133 ka mituru, ku ngulapane 22 ka mituru, ku ubelengane 13 ka mituru.

¹⁶ Ku varukuru lri ikai ku lribange; ku lribange lri mararaisi ki talrugulrugane ki varukuru, ku ubelengane yai 44 ka kunhunge. Ku adringi ki varukuru lrika situlrulu macuculrudu, ku babiabila ki varukuru lri ikai ku lrawlrawdru.

¹⁷ Lri patelebaku palriau kai ki kadaengane, amudu demedeme ki waudriwdripi. Kai kadaengane pademedeme lri kamudu.

¹⁸ Ai lri kiketeketaku muswane; lri ilukusu ki taelrelresu, lalalakesu, lakiathareve mwadringi ki varukuru.

^19-20 La lri mialrisu malra ki makaelaela ka nilapulapwane, wagulagulai, adhadhame paececebe, ku sawvalai si ababai iluku mwa adringi ki varukuru, lani kipalakebe ku niake lini.

²¹ La padulrua sekete ku makaelaela ku akaneane numi si waudriwdripi.”

²² Ku Nua la singikai ku tapadrekadrekasane ki Twaumase nguvavaeeva pangimia.