Tabekacane 50 - Ngudradreadrekadhane Ka Sisiu 魯凱語聖經

¹ Ku Yusepe la mwa guruthungane ki kinawmasane ki tamaini tubitubi, uma ki lringauini.

² Ala kirimu, ku Yusepe la drekase ki tarasulrasulrau arakai ku sasulravane palakebe ki kinawmasane ki tamaini ku kaika akaburavane, la pangimia ku tarasulrasulrau.

³ Kwi lalasu la singikai ku takelretanenga ku vai, makamasupatele ala tulrepenge kikai tapalakebane ki kinawmasane. Ku swa Izipiti la makamapitulu kalreme iniane.

⁴ Sangilribatenga ku takalremeane, ku Yusepe la iya kai ki kiacapili ki talialalai, “Pelaela kikai vaga ki talialalai,

⁵ ‘Ku ama sa lri kaedrepe pakiaketekete nakwane, ku lrika apasiwlrianeli iniane dralreke pwa Kanange kwini ngipapadulrungaini ku balriu. Lakamani, kiatubiaku palraingaili nau katwase mwa dralreke ki ama; sana tulrepenge, lri siwlriaku!’ ”

⁶ Ku talialalai la tubalre, “Lu mwa, singikai kwini takiketeketanesu katwase dralreke ki tamasu.”

⁷ Ku Yusepe la katwase dralreke ki tamaini. Ku lakiacapili ki talialalai makanaelre, ku latabebelenge ikai ki talialalai si lakiamatikaikai ki swa Izipiti la makitu tupalra ki Yusepe.

⁸ Ku wacekecekele ki Yusepe makanaelre, labetakaneini si wacekecekele ki tamaini, la mialri makitu karedele iniane; kathane ku lalalake lini si lwange kiu ku asuru ikai Gusenge.

⁹ Ku maredele iniane yakaiyana ku lapalridingi, tarangurigi ka kwapingi, matiasamali turamuru ka sakaredele.

¹⁰ La kela tali talrawane ka kadravane Yuredange kavai tavelavelatane ki mugi kavai Atade, ikai kwini karaleale tubitubi; ku Yusepe la ikai kwini pasikai ki tamaini kalreme makapitulu.

¹¹ Ku swa Kanange sa drele kwini takalra ku yasarubu ku umawmase ikai Atade ki tavelavelatane kalremelreme, la iya kai, “Kai swa Izipiti lu kalreme ala matiapapedrenge turamuru!” Lakamani kwini kadaengane ku kipasi Abele Mizeraime.

¹² Ku lalalake ki Yakubu la paluludu ku cunu ki tama lini,

¹³ satedre kwini kinawmasaneini pua Kanange, dralreke pikai tali talrawane Mamere kwini barungulu ka Makepela; kikai barungulu yakai kwini ki takauawngane ka langai ki Aberahame patwalai ki Iperungu ka swa Hite si tutadralredralrekane.

¹⁴ Ku Yusepe sa maka dralrekenga ki tamaini la karededele ki labetakaneini si sanaka kiapaelre dralreke siwlri mu Izipiti.

Ku Yusepe wasasa ki labetakaneini

¹⁵ Sa pacainga ku tama lini, ku labetakane ki Yusepe kiadremedreme, “Luiyasi kai Yusepe la kalisiliisiana ku kidremedremeini, pangimia kudra natapangimianeta iniane bilri mitane, lai lri tumaneta?”

¹⁶ La sikawlu ki umawmase ku peaelaela ki Yusepe, iya kai, “Salri pacai ku tamaita

¹⁷ wacunu naiane pelaelanga kai niakuvaalane ka vaga, ‘Ku lataka pasalriu muswane, pacepa kwini pasalrivane lini.’ Kunai sasiakawlu nai ki Twaumase ki tamasu; lakamani kwidra, kiatubi nai muswane pacepa ku tapasalrivane nai.” Ku Yusepe sa kilalra kikai vaga la tubi.

¹⁸ Sakabilrilinga, ala ngikakela ku latakaini kikawriva iniane, pidruru guruthungane icucubungu iniane, si iya kai, “Kunai makanaelre duri nai muswane.”

¹⁹ Ku Yusepe la pelaela liniane, “Asingithanga mukuludru, kainaku lri maka atalingikaiyane ki Twaumase.

²⁰ Napasana kabebetethe numi nakwane, ai ku Twaumase wamalra kwini ngilisiane paakabalrithi tuthariri, pakai ku apalakebane ki niake ki takaalra ka umawmase; ngwalai kwini tangimiane ku paswalaala, kaikameane ala ikai kai takaalra ku waudripiana.

²¹ Kunumi madha mukuludru, lri tara sirapalaku numiane si lalalake numi.” Ku Yusepe arakai ku sulrapelane ku vaga sasa liniane, pakasarwate kwi kidremedreme lini.

Tapacadhane ki Yusepe

²² Ku Yusepe si wacekecekele ki tamaini la pacungulu ikaikai Izipiti. Kai lasu sa pacai tara 110 ku cailini.

²³ Kai lasu wadreleana ki agane ki Iparaime, mialri kebereana ku agane ki Manase ka lalalake ki Makire pikai ki vagisini.

²⁴ Ku Yusepe la iya kai ki labetakaneini, “Lri padaalrungaku si pacai, ai ku Twaumase lri tara sirapale numiane, mailuku numiane katwase kai, mwa kwidra pukawnungaini ki Aberahame si Isake si Yakubu kwini ki kadaengane.”

²⁵ Ku Yusepe la kiketekete ki swa Iseraylri; kwi lasu amia kai, “Lu iluku ku Twaumase numiane papia kwini ki kadaengane yai, lri iluku numi kai culraleli.”

²⁶ Wapacai ku Yusepe satara 110 ku cailini. Kwi lalasu la arakai ku sapalakebane ka sasulravane padelreme ki kinawmasaneini, la pudringai pwa ki varukuru si pikaai Izipiti.