Tabekacane 46 - Ngudradreadrekadhane Ka Sisiu 魯凱語聖經

Ku Yakubu mailuku ki lawacekecekeleini mwa Izipiti

¹ Ku Yakubu swaragele ku lamanemane demedeme la kela ka Bereseba, kwi lasu la ikai kwini patarumara ki Twaumase ki tamaini ka Isake.

² Sakamaungu, ku Twaumase la ikai ki maburusi kawriva iniane, ku Twaumase watawtau iniane, “Yakubu, Yakubu!” Kwi lasu la tubalre, “Kawvadhaku!”

³ Ku Twaumase amia kai, “Twaumasaku, ka Twaumase ki tamasu. Madha mukulukuludru mwa ka Izipiti. Lri tuadravaku ku mwabaibalrithi muswane, ikai kavai ka amani ku maadrau ka kuni.

⁴ Lri ngikakamaniaku tupalra muswane mwa Izipiti, si lalri ngikakamaniaku sangiluku ki lamwabaibalrithi muswane siwlri mwa kai ki kadaengane. Lu pacaisu, ku Yusepe lri ithili muswane si kamani ka wadralreke.”

⁵ Ku Yakubu la singikai kwini Bereseba katwase. Ku lalalakeini la malra ki tama lini, ki lalalake si taelrelre lini makanaelre mubelenge ki palridingi ka pakainganai ki talialalai ki swa Izipiti.

⁶ Kwi lalasu la iluku ku malra lini ikai Kanange ku lanilapulapwane si tacekecekelane mwa ka Izipiti. Ku Yakubu la sangiluku ki lagaganeini mwa Izipiti,

⁷ matala: Lalalake, lagagane ka sawvalai, lalalake ka labaibai si lagagane ka labaibai.

⁸ Ku twapapalra ki Yakubu mwa Izipiti ka swa Iseraylri ku nagane lini: Lalake ki Yakubu ka Riwbingi si

⁹ lalalakeini ka Hanuke, Palu, Hezerunge, Karemi.

¹⁰ Simiune si lalalakeini ka Yemuele, Yamingi, Uhade, Yakingi, Zuhare, si tulalake ki alisu ka swa Kanange ka Saule.

¹¹ Lrivi si lalalakeini ka Geresune, Kuhathe si Mirari.

¹² Yuda si lalalakeini ka Sela, Pereze, Zera (ku Yuda yakaiyana ku tadrusa ku lalake ka Ire si Unange tara wapacai ikai Kanange). Lalalake ki Pereze amani kai Hezerunge si Hamure.

¹³ Isakare si lalalakeini ka Tula, Pua, Yasube si Simerunge.

¹⁴ Zibulungu si lalalakeini ka Serede, Ilune si Yahele.

¹⁵ Kikai amani ku lamwabaibalrithi ki Yakubu ka tulalake ki Lria ikai Mesuputamia, la ikaiyana ku druma ku ababai ka Dina. Ku lalake si lamwabaibalrithi ki Yakubu ngukai ki Lria ta 33.

¹⁶ Gade si lalalakeini ka Zepunu, Hagi, Suni, Izebune, Ilri, Arude si Areli.

¹⁷ Asere si lalalakeini ka Imena, Iseva, Isevi, Beriahe si agini ka ababai ka Sera. Beria si lalalakeini ka Hebere si Malekile.

¹⁸ Kikai amani ku lamwabaibalrithi ki Yakubu ngukai ki Zilepa ka duri ki lalake ki Labange ka Lria ta 16.

¹⁹ Ku taelrelre ki Yakubu ka Rakile la tadrusa ku lalake, amani kai Yusepe si Biniyamingi.

²⁰ Kai Yusepe sa ikai Izipiti twalalake ngukai ki Asenathe ka lalake ki Putipira ka barakalai ki swa Heliupulise amani kai Manase si Iparaime.

²¹ Ku lalalake ki Biniyamingi yai, Bila, Bekere, Asebele, Gira, Naimange, Ihi, Ruse, Mupime, Hupime si Arede.

²² Kikai amani ku lamwabaibalrithi ki Yakubu ngukai ki Rakile ta 14.

²³ Dange si lalakeini ka Husime.

²⁴ Napetali si lalalakeini ka Yahezele, Guni, Yezere, Seleme.

²⁵ Kikai amani ku lamwabaibalrithi ki Yakubu ngukai ki Bila ka duri ki Rakile ka lalake ki Labange, tapitu.

²⁶ Ku twapalra ki Yakubu mwa Izipiti ku kalagagananeini, kai pasipi ki lakiathareve, ikaai ku ta 66.

²⁷ Lu padrimaneana ku tadrusa ku tulalake ki Yusepe ikai Izipiti, ku wacekecekele ki Yakubu ikai Izipiti tamapitulu.

Ku Yakubu si wacekecekeleini wadaruru ka Izipiti

²⁸ Ku Yakubu la sikawlu ki Yuda aswalaala mwa ki Yusepe, pelaela ku vai ku aikaiyane Gusenge madredresenge. Kwi lalasu sa darurunga Gusenge,

²⁹ ku Yusepe la ngukai ki palridingi mwa kavai kidredresenge ki tamaini. Sa madradrele, ku Yusepe la kebere ki tamaini, si tubi kaulai.

³⁰ Ku Yakubu la iya kai ki Yusepe, “Anau ka wadreleana muswane ka panianianiakeanasu, kikainga adravane pacaingaku kai lri katumane.”

³¹ Sakabilrilinga ku Yusepe la iya kai ki labetakaneini si kwini laumawmase ki tamaini, “Lri tara pelaelaku ki talialalai, ku labetakaneli si laumawmase ki ama twalai Kanange wakelanga kai iya.

³² Lri pelaelaku ki talialalai, kunumi taraagwagu ki kiu, ka kiara nilapulapwane cekecekele panianiake; la iluku numi kai lakiu si lwange si lamanemane kela kai.

³³ Ku talialalai lu dawlu kikawriva numiane, la kivavaga ku taratumatumane numi iya,

³⁴ la pelaela madu iniane, mararaamau numi ki cucungulane numi, singika lavavalake pakela kaiasasane ka wacekecekecekele panianiake ara nilapulapwane. Lu mia kikai, kwi lasu lri paikai numiane kavai talikai Gusenge.” Ku taiyane ki Yusepe kai, amani sa kai mangulatatatadre kai swa Izipiti ki taraagwagu ki kiu.