Tabekacane 45 - Ngudradreadrekadhane Ka Sisiu 魯凱語聖經

Ku Yusepe ngiapapelaela ka aneane ki latakaini

¹ Ku Yusepe kai maka ngiadradrepetenga ku kidremedremeini picucubungu ki lasasiakawlu. La drekase liniane pakatwase mulatadre. Ku Yusepe sa papia ki labetakaneini ngipapelaela ka sia aneane yai, kadrwa ku palrapalra ku yakai kwini.

² Ai kudra tatubianeini kialalra ku swa Izipiti, ngwalai kwini ku vaga la daruru ki daane ki talialalai.

³ Ku Yusepe la papia ki latakaini iya kai, “Yusepeaku! Ku tamaita la mudringadriingaiana?” Ku labetakaneini sa kilalra kikai vaga la ngituluku kasamali, kai maka tubalre avavaga.

⁴ Ku Yusepe kela kai la iya liniane, kwi lalasu la mwa deethe iniane. Kwi lasu la iya kai, “Amaniaku ku agi numi, ka amani kudra kilangai numi pwa Izipiti ka Yusepe.

⁵ Ai, kunumi madha ngwalalai kikai si kathathiburu ngikakaelaela. Ku Twaumase pakai ku apalakebane ki niaketa makanaelre, la ngikakamani sikawlu nakwane aswalaala mwa kikai.

⁶ Kikai kalasilravane ki swakai kai taradrwadrusana ka caili, lri taralrimana ka caili kai maka kaungu, la lri kai maka kitaleke.

⁷ Pakai ku apalribulane numiane si mwabaibalrithi numiane, ku Twaumase siakawlu nakwane aswalaala kela kai, arakai kikai palrealrebane ku tapangimiane palribulu numiane.

⁸ Lu drelane, ku siakawlu nakwane yai Twaumase, kai numi kamani; ku Twaumase pakamani nakwane, ku abebeelengenga ki lakiacapicapili ki talialalai, ka amani ku sutu ki swa Izipiti, rathudu ki kuni palraelre.

⁹ “Lu kirimwa siwlri mwa ki ama kavai, la pelaela iniane, ku lalakesu ka Yusepe amia kai, ‘Ku Twaumase wacegecege nakwane asutu ki kuni palraelre ki swa Izipiti; madha pwadaidailane, kirarimwa kela kai nakwane.

¹⁰ Mailuka ki lalalakesu, lagaganesu, lwange si kiu si sanaka maneemane mwa ka adeethe Gusenge ikaikai, la adeethe nakwane;

¹¹ lukamiyaiya kai, lri maka lapwaku muswane. Lri taralrimanga ka caili ku kalasilravane, kainaku walreme drele muswane si wacekecekelesu si lalapulapusu lu makitu pacai ki silravane.’ ”

¹² Ku Yusepe la iya kai, “Kaiasasane, kunumi si agili ka Biniyamingi kikai wadrelenga numi, amaniaku ka Yusepe ka ngiakakawriva pelaela numiane kikai lavaga.

¹³ Lri pelaela numi ki tamaita, maadrau turamuru kai pukuli ikai Izipiti, la pelaela iniane sanaka drele numi. Kirarimwa alralra iniane pwa kai.”

¹⁴ La kebere ki agini ka Biniyamingi si tubitubi akwadrau; ku agini la mialri akwadrau tubitubi.

¹⁵ La pacungulu, kai lasu takutubitubi, mwa kebere nguvavaeva ki latakaini, si tubarengerane uma liniane; ala kirimu, kwini labetakaneini kawriva iniane.

¹⁶ Kwini takelane ki labetakane ki Yusepe la kimapelaelanga si daruru ki talialalai, ku talialalai si lakiacapili la makitu kiraragai makanaelre.

¹⁷ Ku talialalai la iya kai ki Yusepe, “Pelaela ki labetakanesu, arakaiya kwini lalapulapu lini si pasuete suragele kai lamanemane, la kisamula siwlri mu Kanange.

¹⁸ La pamalramalra ki tama lini si wacekecekele mailuku mwa nakwane kai. Lri baadhaku liniane ku mathaithaariringa ku kadaengane kai Izipiti, kwi lalasu lani ikai kai kisupisupilri ku ngiaradhekane ku tacekecekelane.

¹⁹ Kusu la mialria pelaela liniane, lani iluku ku tangukaiyane ku palridingi twalai Izipiti siwlri, lani alralra ki taelrelre lini, lalalake lini si tama lini karedele kela kai.

²⁰ Asi taulra ku tacekecekelane kavai, kikai Izipiti palraelre ku mathaithaariringa lrika liniane.”

²¹ Ku lalalake ki Yakubu la paluludu kikai vaga pangimia. Ku Yusepe la singikai ku tadrekasane ki talialalai baai liniane ku tangukaiyane ku palridingi si akaneane ikadalranane.

²² La baainga ki latakaini pasavavaeva ku taingeane ku laimai, ai ku baaini ki Biniyamingi laka tailrimane ku laimai si 300 ku paisu.

²³ La baai ki tamaini ku mangeale ku sawvalai ku ruba, pasiamece ku mathaithaariringa ku lamanemane ki swa Izipiti; ku drumane la baai ku mangeale ku tina ka ruba, pasiamece ku abadhane ki tamaini ka akaneane ikadalranane ku lataleke, pange si drumane ka laakaneane.

²⁴ La sateatedre ki labetakaneini, sa lri katwasenga la cunu liniane, “Maadha karivurivu ikadadalranane.”

²⁵ Kwini lalasu la katwase Izipiti, siwlri mwa Kanange ki tama lini ka Yakubu.

²⁶ Kwini lalasu la pelaela ki tama lini iya kai, “Ku Yusepe yataluvaivaiyana, si asutunga ki swa Izipiti.” Ku Yakubu la tirereenganenga, kai maka kasalru kwini vaga lini.

²⁷ Ai kwi lasu, sa kilalra patwalai liniane ku tacunane ki Yusepe ku vagaini, si drele ku pakainganai ki Yusepe ku latangukaiyane ku lapalridingi malramalra iniane mu Izipiti yai, la kai kasamalinga.

²⁸ Kwi lasu la iya kai, “Ala imianga! Ku lalakeli ka Yusepe panianianiakeana, sa kainaku pacaiana, lri tara mwaku drele iniane.”