Tabekacane 43 - Ngudradreadrekadhane Ka Sisiu 魯凱語聖經

Ku labetakane ki Yusepe wailuku ki Biniyamingi mwa Izipiti

¹ Ku kalasilravane ki tali Kanange arwa pakilringalriingau.

² Ku wacekecekele ki Yakubu sa elemenga kwidra kibungu lini twalai Izipiti; ku Yakubu la iya kai ki lalalakeini, “Kunumi lu nguselaa kibungu.”

³ Ku Yuda la iya kai ki tamaini, “Kwidra umawmase akwacaeme pakipapawlringau naiane, lu kai nai iluku ki agili karedele katwase, kai lri palraingi naiane mwa kidrele iniane.

⁴ Luiyasi la palraingisu naiane iluku ki agili, lri mwa nai pasikai muswane kibungu;

⁵ asi lwiyane kwini lasu naamia kai, lu kai nai iluku ki agili karedele katwase, kai lri palraingi naiane mwa kidrele iniane.”

⁶ Ku Yakubu amia kai, “Anu ngitha pakwalri nakwane? Asingithanga pelaela yakaiyana ku agi nai itavanane iya?”

⁷ Kwi lalasu la tubalre, “Kwini umawmase ngiaka kivavaga naiane kai ki tacekecekelaneta, ‘Yakaiyana ku tama numi? La ikaiyana ku drumane ku betakane numi?’ La kai nai dulru kai tubalre kwini la kivavagaini; anai thingathingale kwini lasu iluka ki agi ka lri iya naiane?”

⁸ Ku Yuda la iya kai ki tamaini, “Ta badhaili sudralru ki vavalake, la nai katwasenga, lu piata kai, kaita lri pacai ki silravane makanaelre.

⁹ Nau kamaninga ka marasiakai, kamani ka wasikiningi. Alaiyasi la kainaku pawdringadriingai iluku siwlri iniane, sawlri baai muswane, palraingaku siamece ku pasalrivane makalautu.

¹⁰ Ana kaita kawlai mukalava, naika ngwasipusalenga nai.”

¹¹ Ku tama lini amia kai, “Kudra atarapiane madu kikai, kunumi iluka kai sangwalreme ka tulu ki alrenge, valu, kusui, sasulravane, sangwalreme ka madru si alumundu kikai swakaiyane kai ka lacebe tusaceacebe ki sutu.

¹² La iluka padrima ku paisu ku takathane ki siaswalane, asi lwiyane lri tara sawlri numi kwini siaswalane kwini drele numi kwi paisu ka yalumasane; talika nipasamaliiane.

¹³ Iluka ki agi katwase, la makakaai kidrele kwini ki umawmase.

¹⁴ Ku wadulru sanaka manemane ka Twaumase ani pakakalithi numiane ki lasu, lani tara pasiwlri ki Biniyamingi si tangea ka betakaneini. Ala kunaku, alaiyasi lri kaulrasaku ku lalake, kiavanga ku angimiane!”

¹⁵ Kwi lalasu ala iluku ku saceacebe, nipadrimane ku paisu si Biniyamingi katwase papia ka Izipiti. Kwi lalasu sa darurunga Izipiti, la mwa kidrele ki Yusepe.

¹⁶ Ku Yusepe la drele ki Biniyamingi tupalra liniane kela, la iya kai kwini ki taramarasikaikai ki tacekecekelane lini, “Mailuka kikai ki laumawmase pwa ki daaneli; luka mwalringedele lri kabalrulu nakwane ka lalasu. Kunumi culwa ku vaeva ku nilapulapwane, padulru ku angitalekane.”

¹⁷ Kwini taramarasikaikai ki tacekecekelane lini la paluludu ku drekaseini mailuku liniane pwa ki daane ki Yusepe.

¹⁸ Kwini lalasu sa kiiluku mwa ki daane ki Yusepe, la makitu mukuludru turamuru, iya kai kidremedreme, “Lri tara ka ngwalalai kudra dreleta ku yalumasane ku lapaisu, ala kamani ku kiilukuta pwa kai. Ka lalasu alau lri pangitutuluku tulisi mitane, ribici kai larubata, vutha mitane aduri iniane.”

¹⁹ Lakamani, kai lalasu sa daruru ki lrawlrawdru, la iya kai ki taramarasikaikai ki tacekecekelane,

²⁰ “Sinsi! Ala kilalra: Ku paswalaala ngwalai nai ku akibungane, nawakelanga nai kikai.

²¹ Sa mubalribalriu nai, ikadadalranane sulai, mwatenge nai ki lumase, la makitu drele nai kwini paisu ka sakamiana ikaiyana ki lumase. Kikai wakela nai iluku kikai lapaisu, lri sawlri nai baai muswane.

²² Maelane kai iluku nai kai paisu kela kibungu; kai nai wathingale ku paswalaala luka aneane ku wapwa ku paisu ki lumase nai.”

²³ Kwini taramarasikaikai ki tacekecekelane la iya kai, “Madha kathathiburu! Madha mukulukuludru! Lri tara ka Twaumase numi, Twaumase ki tama numi ka wamalra kwini paisu sawlri pwa ki lumase numi; kudra paisu numi wamalranga naaku.” La pacungulu kwini lasu malra iluku ki Simiune si baai liniane.

²⁴ Kwini taramarasikaikai ki tacekecekelane la iluku liniane mudaane ki daane ki Yusepe, malra ku acilai patawdrapale liniane, la pakane ki ruba lini.

²⁵ Kwini lalasu la padulru ku saceacebe, mukalava ki Yusepe lu kela luka mwalringedele yai lri baai iniane; asi lwiyane kai lalasu kiapelaela, lri taelre ki Yusepe kane ku aga.

²⁶ Sa mutavanane ku Yusepe, kwi lalasu la makitu iluku ku saceacebe mudaane, la baai iniane, sukubu iniane.

²⁷ Ku Yusepe mwadringadringai numi la iya liniane, la pacungulu kivaga, “Kwidra namatikai numi kudra tarudrawdrangenga ka tama numi, kwini marudrange mwadringadringai? Marakaraakaceana?”

²⁸ Kwi lalasu la tubalre, “Ku sasiakawlusu ka tama nai marakaraakaceana.” La kirimunga sukubu iniane.

²⁹ Ku Yusepe sa drele ki agini ka Biniyamingi, la iya kai, “Kikai lakamani kudra pelaela numi nakwane kudra agiaginga! Lalake! Ku Twaumase ani subulrubulru muswane.”

³⁰ Ku Yusepe sa drele ki agini, ku kidremedremeini la mia kwidra itituku, pasana icucubungu ki umawmase tubi. La katwase liniane, kiulrau mwa ki tapeapecaneini, la tubi kawlai.

³¹ La tawmaca ala mutaluvaivai, ngidradrepete ku kidremedremeini, drekase kaneanga iya.

³² Ku Yusepe la nene ikai ki vaeva ka cukwi. Ku labetakaneini la ikai ki drumane ki cukwi. Kudra kiapaelre ku swa Izipiti la kitukudha ikai ki vaeva ka cukwi, asi lwiyane kikai swa Izipiti lu kidremedreme lu kabalrulu ki swa Hiburu kane ku aga taingeane ka samatininu.

³³ Ku Yusepe la panene ki labetakaneini picucubungu iniane, ku taneneane lini la singikaai ki marwarudrange si masakaikai. Kikai taapasakaikaiyane la kasamaali kai lalasu, la madredreele.

³⁴ Kwini damai laka twalai ki cukwi ki Yusepe vala liniane; ku kitudrulru ki Biniyamingi laka makakaalra ki palrapalra ku tailrimane. Kwi lalasu la taelre ki Yusepe kanekane ungungulu, kiraragai turamuru.