Tabekacane 42 - Ngudradreadrekadhane Ka Sisiu 魯凱語聖經

Ku labetakane ki Yusepe wamwa Izipiti kibungu

¹ Ku Yakubu sa kilalra yakai tali Izipiti ku taleke iya, la kawriva ki lalalakeini iya kai, “Anu kai kidredredreme ku apangimiane?

² Kialalraku ku yakai Izipiti ku taleke amia, lu mwa kavai kibungu, amani lu pacaita kiarasilravane.”

³ Kwini labetakane ki Yusepe ka tamangeale la mwa ka Izipiti makanaelre kibungu ku taleke.

⁴ Ai ku Yakubu kai patwapalra liniane kwini agi ki Yusepe ka Biniyamingi, asi lwiyane ku Yakubu mwakuludru ki lasu lu kipadradresenge ku amatikurwane.

⁵ Ku lalalake ki Yakubu si drumane ku umawmase la mwa kibungu, asi lwiyane ikai tali Kanange mialri kakalasilravane.

⁶ Ku Yusepe yakai ka Izipiti asutu, ka amani ku marasiakai kilangai ku lataleke baai ki la wakela ku umawmase. Lakamani, ku lataka ki Yusepe wakela mucucubungu iniane, guruthungane icakena sukubu iniane.

⁷ Ku Yusepe sa drele ki latakaini la thiingale ka amani lini, ai ngiakakukulrungane kai thingale, la akucaeme kivavaga liniane, “Twalai numi inu kainganai?” Kwi lalasu la tubalre, “Twalai nai Kanange kela kibungu.”

⁸ Ku Yusepe wathingale ki latakaini; ai kwi lalasu kai wathingale iniane.

⁹ La ngulringau kudra natasipianeini, la raanau iya kai liniane, “Kunumi yai taralrilriu numi, ka wakela lrilriu kai ki tangimiamiane ki kuni nai.”

¹⁰ La tubalre kwini lalasu, “Tamatamali, kunai ka lasasiakawlusu kaika taralrilriu, wakela nai ki kuni numi kibungu.

¹¹ Mabetabetake nai makanaelre, ka mwalecege ka umawmase, kaika taralrilriu.”

¹² Ku Yusepe la kakeecenge iya kai, “Ini! Kai kela numi walrilriu kai tangimiamiane ki kuni nai.”

¹³ La iya kai kwini lalasu, “Tamatamali, kai lasasiakawlusu nata 12 ka mabetabetake, ka tangeangea ku tama ku twalalake; kwi lasu yakaikai ka Kanange. Ku agiaginga taelre ikai ki tama nai, la ikaiyana ku tangea ku agi nai ku maulrawnga.”

¹⁴ Ku Yusepe la kecenganeana, “Ini! Ku amianga naaku kuasane, kunumi yai tengatengane numi ka taralrilriu.

¹⁵ Lri kithiathingalaku numiane luka patengatengane numi lukaini. Lri cubungaku ki nagane ki talialalai kiketekete: Lu maalra numi iluku mwa kai kwini ki agiaginga ka betakane numi, lutuumane kainaku lri pakatwase numiane.

¹⁶ Lri pakatwase numi ku tangea ku lri mwa malramalra iniane kainganai; ku drumane lri kiemenge ikai kai, mukalava ku sapathingalane kwini la taiyane numi. Sana kai ngimia kwini, lri papiaku ki niake ki talialalai kiketekete, amani numi ku taralrilriu makanaelre.”

¹⁷ Kwini lasu ala malra liniane emenge makatulrulu.

¹⁸ Saka samakatulrulu, ku Yusepe amia kai liniane, “Mwasakenaku ukuludru ki Twaumase, luiyasi tarumara numi kikai puvagali, lri pacepaku ki niake numi.

¹⁹ Pakai ku sapelaelane ala ka patengatengane ku takaumawmasane numi, ala pasura ku tangea ikai kai taememengane tusapakiravasane; ku drumane lani katwase mubalriu, iluku kwini kibungu numi ka lataleke baai ki mwabaibaisi ka lawacekecekele numi,

²⁰ ala mailuku ki agiaginga kela kai nakwane. Lu mia kwini athingalane kwi vaga numi ka patengatengane, lai lri kai numi kipapacai.” Kwini lalasu la tarumara kwini nipuvagane,

²¹ la maiyaiya kai, “Sakamani kwidra pakwalrita ki agimita, kikainga kiapaucugungata! Wadreleta ku takipakwalrianeini, kiatubi mitane, la kaita thengete! Alakamani kikai kipadradresengengata kai amatikurwane.”

²² Ku Riwbingi la iya kai, “Madha tulisilisi kavai ki vavalake naamiaku numiane, la kai numi kilalra; kikai kiame ka erai lri kamaningata ka wasawlri.”

²³ Ku Yusepe wathingale kilalra kwini vaga lini, ai kwini lalasu kai wathingale ki lasu ala ka wathingale kilalra, asi lwiyane kwini lu makawrivariva tara yakai ku tarapatululu.

²⁴ Ku Yusepe la ngibangulu katwase kwini, la tubi kawlai, ala kainganai siwlri kikawriva liniane, si pilri ki Simiune, picucubungu liniane kerenge iniane.

Ku lataka ki Yusepe siawlri mu Kanange

²⁵ Ku Yusepe la cunu ki umawmase pasaela pasuete ki lumase ku taleke ki latakaini, la malra kudra paisu sawlri pwa ki lalumase lini, la padulru ku akaneane lini ikai kadadalranane. Pudriadriingai suragele patuelre,

²⁶ la malra kwini kibungu lini ku lataleke pasiamece ki laruba, la katwase.

²⁷ Ikai kwini ki tasuladhane lini, ikai liniane la ikai ku mwatenge ki lumase lri pakane ki laruba, la drele ku paisuini ikaaiyana adringi ki lumasane.

²⁸ Kwi lasu la iya kai ki labetakaneini, “Kudra lalasu wasawlri nakwane kai paisu! Drela, kai yakai ki lumaseli!” Kwi lalasu makanaelre la makitu kasamali si kathathiburu, mukuludru iya kai, “Ku Twaumase ani piakai marasikai mitane?”

²⁹ Kwi lalasu la siwlri mu Kanange, mwa ki tama lini ka Yakubu, la pelaela iniane singibila ku tangilribalribatane lini.

³⁰ Kwi lalasu amia kai, “Kudra sutu ki swa Izipiti akwacaeme kawriva naiane, kaelaela naiane ka wamwa lrilriu ku tangimiamiane ki kuni lini.

³¹ La tubalre nai, ‘Amani nai kudra patengatengane ku takaumawmasane, ka kaika taralrilriu;

³² ta 12 nai ka sawvalai ka mabetabetake, ka vaeva ku tama nai. Yakai ku tangea ku agi nai ku maulrawnga kawmasane, ku agiaginga la asuru ikai Kanange ikaikai ki tama nai.’

³³ Kwini sutu la iya kai, ‘Lri kithiathingalaku numiane luka patengatengane numi luka ini. Kunumi lri pasuraku ku tangea ikai kai, ku drumane kai lri katumane katwase siwlri, malra kikai lataleke baai kwini ki lamwabaibaisi ka wacekecekele numi,

³⁴ ala mailuka kwini ki agiaginga numiane mwa kai nakwane. Lu mia kai lri kipawtengaku numiane ka patengatengane numi ku takaumawmasane, ka kaika taralrilriu. Lai lri malraku ki betakane numi sawlri baai numiane; lai lri mialri numi dulru maka asuru ikai kai, thathathakai.’ ”

³⁵ Sakabilrilane, kwi lalasu sa gugugu kwini lataleke yai, la makitu drele kwini tapaiswane lini ka sakamiana ilumasane. Kwini lalasu si tama lini sa drele kwini tapaiswane, la makitu mukuludru turamuru.

³⁶ Ku Yakubu la iya kai liniane, “Ani kawlrase nguelre ki lalakeini amia numi nakwane? Kadrwanga ku Yusepe! La kakadrwanga ku Simiune! Kikai lalri iluku numi ki Biniyamingi! Kai amatikurwane kainganainga mwa nakwane!”

³⁷ Ku Riwbingi la papia ki tamaini kiketekete iya kai, “Alaiyasi kainaku iluku ki Biniyamingi pasiwlri, kai lri katumane lu papacaisu ki tadrusa ka sawvalai ka lalakeli. Pasirapalaili ki agili, lri tara mailukaku iniane siwlri.”

³⁸ Ai ku Yakubu amia kai, “Kikai lalakeli kai lri maka tupalra numiane mwa! Ku kabetakananeini wapacainga, laka kathanengaini tangeangea! Lu ikadalranane alau lri kipadradresenge ku apacadhane. Kunumi ani makalautu ki tatubiane mwadringi ki tadralredralrekane amia numi nakwane?”