Tabekacane 40 - Ngudradreadrekadhane Ka Sisiu 魯凱語聖經

Ku Yusepe walalrwai ku sipi ki palraini kiemenge

¹ Sa ngilribatenga kikai, kwidra yakai ki daane ki talialalai ki swa Izipiti ka taramarasikaikai ki bava si taramarasikai ki akaneane pasalriu ki talialalai;

² ku talialalai la kalisi,

³ la drekase malra kwini ki tadrusa ka tabebelenge emenge pwa ki taememengane ki kiacapili ki tarakadrenge ki talialalai, pataelre ki Yusepe emenge ikai ki taluvaale.

⁴ Kwini tamatama ki tarakadrenge la padrangalru ki Yusepe kwini ki tadrusa ka tabebelenge; kwini lalasu la kawlai turamuru ku taikaiyane lini taememengane.

⁵ Yakai sakamaungu, kwini taramarasikaikai ki bava si taramarasikai ki akaneane la ikai ki taememengane tara sipi ku vaeva, la makaela kwini sipi lini ku patharevane.

⁶ Sakakaiyane ki mialrealre, la kela lrikape liniane ku Yusepe, la drele liniane kai kathaithaithariri ku kidremedreme lini,

⁷ la kivaga liniane, “Anu mia kaikameane kwalrialri ku kidremedreme?”

⁸ Kwi lalasu la tubalre, “Tara wasipi nai, ai kadrwa ku umawmase ku maka peaelaela ku patharevane kwini sipi nai.” Ku Yusepe la iya kai, “Ku lrigilane pelaela ku patharevane ki lasipi Twaumase ku wabaai. Ala pelaelaili kwini sipi numi!”

⁹ Kwini taramarasikaikai ki bava la iya kai, “Ikai ki sipi wadrelaku ku vaeva ku budu ka cebe ikai cucubungu nakwane,

¹⁰ kwini cebe la ikai ku tulru ku ricingi. Kwini cebe sa rigarigi la makakaai pupu, la kalreme ku budu.

¹¹ La malraku pikai ki alrimali ku kupu ki talialalai; la labutaku ku budu, si malra pe pwa ki kupu, ala mwa baai ki talialalai.”

¹² Ku Yusepe la iya kai, “Kikai sipi ku patharevane miyaiya kai: Kwini tulru ka ricingi amani ku amakatulrulane ka vai.

¹³ Lu makatulrulunga ka vai, ku talialalai lri pulatadre muswane, pacepe ku pasalrivanesu, pasiwlriwlri kudra naawnganesu; lri miasu ki siaswalane kudra naawnganesu, baai ku bava ki talialalai.

¹⁴ Ai, lu kasulivalivatengasu, ngulringavangaili, paralubu nakwane, kawriva ku mathariri pasikai nakwane ikai cucubungu ki talialalai, paralubu ku akipulatadraneli.

¹⁵ Twaladhaku ki kadaengane ki swa Hiburu kiravase mwa kai; adravane kikai taikaiyaneli Izipiti, laka kadrwa ku piali ku ngialisiane si naika akiemengane.”

¹⁶ Ku taramarasikai ki akaneane sa drele ki Yusepe la kathariri ku pelaelaini ku patharevane ki sipi ki taramarasikaikai ki bava, la iya kai ki Yusepe, “Mialriaku sipi ku vaeva, ikai ki sipili wadrelaku la udaku ku tulru ku swaete ku pange ku cepenge.

¹⁷ Kwini sabebeelengenga ka cepenge la sueteane ku akaneane ki talialalai ku makaelaela ku lapange; la kela ku adhadhame si kane kai ki lapange.”

¹⁸ Ku Yusepe la iya kai, “Kikai sipi ku patharevane miyaiya kikai: Kwini tulru ka cepenge amani ki amakatulrulane.

¹⁹ Lu makatulrulunga, ku talialalai lri malra takilili kwi awlrusu, lai lri kelrai muswane pua ki ulrudru, lalri kela ku adhadhame kane ki kinawmasanesu.”

²⁰ Lalri makatulrulunga si ka takitulalakane ki talialalai. Ikai kwini ki vai, ku talialalai lri pangitaleke ki lasasiakawluini. La pulatadre ki taramarasikaikai ki bava si taramarasikaikai ki akaneane, iluku liniane pucucubungu ki lasasiakawluini.

²¹ Ku talialalai wasawlri kwidra naawngane ki taramarasikaikai ki bava.

²² La malra takilili papacai ki taramarasikai ki akaneane. Kilakikai ngiamianga ku tapelaelane lalrwai ki Yusepe.

²³ Ai ku taramarasikaikai ki bava la kai maka pulringaunga ki Yusepe, mariimurunga iniane.