Tabekacane 39 - Ngudradreadrekadhane Ka Sisiu 魯凱語聖經

Yusepe si taelrelre ki Putipare

¹ Ku swa Isemaele wailuku ki Yusepe mwa Izipiti, si kilangai baai ki Putipare ka kiacapili ki tarakadrenge ki talialalai ki swa Izipiti.

² Ku Tamatama watapalra ki Yusepe, la pakasulivate singibila iniane sanaka maneemane. Kai lasu yakai kwini ki daane ki swa Izipiti ka tamatamaini;

³ ku tawki wadrele ku Tamatama ka watapalra iniane, la pangiesaadhane ku awnganeini patuelre.

⁴ Ku Putipare madalame ki Yusepe, la sudralru iniane kamani ku twapapapalra iniane, marasikaikai ki awngane tavanane si sanaka lamaneemaneini.

⁵ Twalainga kwini, ngwalai ki Yusepe, ku Tamatama la subulrubulru kwini ki daane ki swa Izipiti; ku daaneini si umawma patuelre mialri kisubulrubulru ki Tamatama.

⁶ Ku Putipare la baai patuelre pamarasikai ki Yusepe, kathanenga ku akaneaneini, kai wathethengetenga ku drumane. Ku Yusepe ngiacaeme ku tacebeaneini, kathariri turamuru;

⁷ la kai tarathainu, ku taelrelre ki tawkini la kadalame iniane, si iya kai, “Bwala! Tatadrusa apece.”

⁸ Ku Yusepe la kai tarumara, la iya kai iniane, “Kidremedrema, ku tawkili wabaainga nakwane patuelre pamarasikai, lu ikaiyaku kai, kai lri kwalringa kidremedreme ki tacekecekelane.

⁹ Ikai tavanane, mararaamau ku puku nai, kathanesu, kadrwa ku kaika sudralruini baai nakwane, asi lwiyane amanisu ku taelrelreini. Itumanaku maka pia kikai kaika mathariri ka kakudhane, si pasalriu ki Twaumase?”

¹⁰ Adravane kikai taelrelre ki tawkini lukavaivai arakai ku lavaga vavangalre ki Yusepe, kai Yusepe thadaalrane kai tarumara mwa tadrusa apece iniane, si kai palraingi taelre iniane.

¹¹ La ikai sakavaivai, ku Yusepe la mudaane twatumane, kikwini, laka kadrwa ka natangeanga ku sasiakawlu ku yatavanane.

¹² Ku taelrelre ki tawkini la ruthuku takai ki sapakabelebelengane ka laimai ki Yusepe, iya kai, “Abwala tadrusaili apece!” Ku Yusepe la ubere iniane, lailai mulatadre, ai ku sapakabelebelengane ka laimai la suru ikai ki alrima ki alisu.

¹³ Kai alisu sadrele ki Yusepe sa suru ku sapakabelebelengane ka laimai si katwase mulatadre,

¹⁴ la dawlu ki lasasiakawlu tavanane, si iya kai liniane, “Drela, kikai iluku ki tauwaneli kavai swa Hiburu twasinalreme mitane. Mwadaane ki tapeapecaneli, nau ulucu iya nakwane. La kawkavaku;

¹⁵ kwi lasu sa kilalra sa kawkavaku, la puanga cilri kikai sapakabelebelengane ka laimai pikai nakwane, si lailai katwase mulatadre.”

¹⁶ Kwi alisu laka tapikaiyane kwini sapakabelebelengane ka laimai ki Yusepe mukalavalava ku akelane ki tamatama ki Yusepe.

¹⁷ Kai alisu la tupelanga pelaela ki taelrelreini kikai, “Kavai ilukusu ka swa Hiburu ka duri wakela ki tapeapecaneli si tusinalreme nakwane.

¹⁸ Sa kawkavaku, la pwa cilri kikai sapakabelebelengane ka laimai si lailai mulatadre.”

¹⁹ Ku tamatama ki Yusepe sa kilalra ku taiyane ki taelrelreini iya kai, “Kikavai durisu sikathurwanenga piakai tusinalreme nakwane” Sa iya kwini, la kalisi turamuru,

²⁰ la dawlu ki umawmase ruthuku ki Yusepe, si emenge pikai ki taememengane ki daane ki latalialalai; ku Yusepe la kiemenge ikai kwini.

²¹ Ai ku Tamatama watapalra ki Yusepe, subulrubulru iniane; lakamani kwini kikadalame ki kiacapili ki swa taememengane,

²² la sikawlu iniane marasikai ki drumane ki lakiaemenge, ka amani ku marasiakai ki laawngane ki taememengane.

²³ Ku kicapili ki Yusepe ku awngane lu kaungu, kwini kiacapili ki taememengane kai kiadredredremenga; asi lwiyane ku Tamatama watapalra ki Yusepe, la pakasuliivate kwini tamarasikaiyaneini patuelre.