Tabekacane 38 - Ngudradreadrekadhane Ka Sisiu 魯凱語聖經

Yuda si Tamare

¹ Lri ikaai kwidra ki vai, ku Yuda la katwase kitukudha ki labetakaneini, mwa ikai taelrelre ki swa Adulame ka Hira.

² Ku Yuda la ikai kwini madradrele ki lalake ki Sua ka swa Kanange; la mwa karudrange ki alisu si tadrusa iniane apece.

³ Kwi alisu la katawbaliri, la tulalake ku vaeva ku sawvalai; ku Yuda la sunagane pasi Ire.

⁴ Kwini alisu la katawbaaliringa, si tulalake ku sakadrusa ku sawvalai, la sunagane pasi Unange.

⁵ Kwini alisu la tulaalakenga ku sakatulru ku sawvalai, la sunagane pasi Sela. Sa kitulalake ku Sela, ku Yuda yakai kavai Kezibe.

⁶ Ku Yuda la pakarudrange ki takataakanga ka lalakeini ka Ire, mwa ki Tamare.

⁷ Ku kakwakudhane ki Ire ngialisiane turamuru, ku Tamatama la papacai iniane.

⁸ Ku Yuda la iya kai ki agi ki Ire ka Unange, “Lu mwa tadrusa apece ki sakadanesu, pangimia ku naika apianesu ku takasakadananesu iniane, lani ikai ku ngipapawbalrithi ki taka.”

⁹ Ai ku Unange wathingale lu tulalake ku lalake kai lrika lalakeini, lakamani sa tadrusa apece ki sakadaneini, waraanau pawcilri pidaedae ku buluini, pakai ku kaika apasikaiyane ki takaini tulalake.

¹⁰ Kikai tapangimianeini pasalriunga ki Tamatama, ku Tamatama la mialri malra ku niakeini.

¹¹ Ku Yuda la iya kai ki taelrelre ki lalakeini ka Tamare, “Lu utavanaana mwa ki latinasu awalibakane, la adradrau ki lalakeli ka Sela pakela ki maadrau.” Ku iyaini kai ki alisu, mwakuludru ki Sela amani lu ngiaalrawnga ki tadrusa ka lalakeini pacai. Ku Tamare la katwase mwa ki daane ki latinaini.

¹² La kai tarathainu, la pacai ku taelrelre ki Yuda. Sa ngulremeanenga, la tarudrusa ki talragini ka Hira ka swa Adulame mwa ka Timena, ikai kavai yakai ku kiaubawbale ki kiu ku awngane.

¹³ La ikai ku umawmase ku peaelaela ki Tamare, ku tama ki tawaneini lri mwa ka Timena ki kiaubawbale ki kiu,

¹⁴ kwi alisu la mwalra ku sakalremeaneini, si arakai ku salripungai paidringi ki lringauini, si ngikakabungu, la nene ikai lrawlrawdru ki cekele Inaime ka sapapia ka Timena; asi lwiyane kai alisu wathingale pulringalringau ku agiaginga ka lalake ki Yuda ka Sela ka maadraunga, ai kaiyana wakela mwa iniane sitaelrelre.

¹⁵ Ku Yuda sa drele iniane yai, alau pairairange amia ki alisu, asi lwiyane kai alisu ngiatatamenge.

¹⁶ Ku Yuda kai wathingale kwini alisu ala ka amani kwidra kiathareve liniane, la mwa kwini thili ki kadalranane silape iniane, la kivaga iniane, “Bwala! Tatadrusa apece.” Kwini alisu la iya kai, “Lu tadrusasu nakwane manemane ku abaadhanesu nakwane?”

¹⁷ Kwi lasu la tubalre, “Lri patwaladhaku ki lakiuli malra ku tikianeana ku kiu si baai muswane.” Kwi alisu la iya kai, “Mathariri, sa kaisu baaiana nakwane kwini kiu, surana ku lamanemane tusadrepetane.”

¹⁸ La kivaga kwi lasu, “Mwarikaisu ku manemane tusadrepetane?” Kwi alisu la iya kai, “Kwini hangesu, tahangeane si ukudrusu.” Ku Yuda la malra kwini lamanemane baai ki Tamare. Kwini tadrusa la tadrusa apece; ku Tamare la katawbaliri.

¹⁹ Ku Tamare la katwase mwa ki daane ki latinaini, la mwalra kwini sangitatamengane ka salripungai, la sawlringa silaimai ku sakalremeane.

²⁰ Ku Yuda la sudralru ki talragini ka Hirahe satedre ku vaeva ku tikianeana ku kiu mwa baai kwini ki ababai, sasawlriane kwidra ki tusadrepetaneini ku lawbubulu, ai ku Hirahe kai maka kiadringai ki alisu.

²¹ Ku Hirahe la kivavaga ki swa Inaime, “Kudra yakai thili kadadalranane ku pairairange mwainunga?” La tubalre kwini lalasu, “Kadruana ku pairairange kai talikai kai.”

²² Ku Hirahe la siwlri mwa ki Yuda, la iya kai iniane, “Kainaku maka kiadringai ki alisu. Ku swakai kavai amia kai makanaelre, kai talikai kai kadruana ku apairairange.”

²³ Ku Yuda la iya kai, “Baadhanga iniane kwidra lamanemane, amani lu kipulrialrivaleta ki palrapalra. Nau baai ku kiu amialringaku ki alisu, ai kwini kaisu maka kiadringai ki alisu.”

²⁴ Ikai kau taratulrunga ka dramare, la ikai ku umawmase ku peaelaela ki Yuda, “Ku kiathareve muswane ka Tamare apairairairange, si laka tawbaliringa.” Ku Yuda la akwadrau kalisi, “Mua saralidri kwini ki alisu, la pua lama papacai iniane!”

²⁵ Kai alisu sa kibilibilibili, la sikawlu ki umawmase pelaela ki tama ki tauwaneini, “Patwaladhaku kikai ki pilawbubulane katawbaliri; ani drela kikai hange si tahangeane, si kikai ukudru; aneanane kikai lawbubulu kai?”

²⁶ Ku Yuda la thingale kwini lalawbubulu, la iya kai, “Patenganeini. Kainaku pangiamia ku naika apangimianeli iniane; naika pamwaku ki lalakeli ka Sela mwa iniane karudrange.” Twalainga kwini, ku Yuda la kai tadrusanga iniane apece.

²⁷ Saka satulalalakenga, kwi alisu ala thingale ka tadrusa kwini yabarangane iniane.

²⁸ Kwi alisu sa kiangeangeange yai, ku tangea kwini yabarangane la sege putaluvaivai ku vaeva ku alrima; ku tarapatulalalake la ruthuku si kerenge ku duduli ku calrisi, si iya kai, “Kikai amani ku aswalala kitulalake.”

²⁹ Ai kwini lrulai wasawlri ku alrimaini, ku betakaneini la aswala mutaluvaivai. Ku tarapatulalalake la iya kai, “Kusu kiakarengecesu mutaluvaivai!” La sunagane kwini ki lrulai pasi Pereze.

³⁰ La kabibilrili kwini betakaneini mutaluvaivai, ku alrimaini laka nikerengane ku duduli ku calrisi, lakamani ku sunagane pasi Zera.