Tabekacane 35 - Ngudradreadrekadhane Ka Sisiu 魯凱語聖經

Ku Twaumase swabulrubulru ki Yakubu ikai Bithele

¹ Ku Twaumase amia kai ki Yakubu, “Lri mwasu ka Bithele, la ikaikai kavai. Lri ikaisu kavai cegecege ku vaeva ku tapatarumaramarane. Amaniaku kwidra sa mubeberesu ki taka ka Isau ka adrelane muswane ka Twaumase.”

² Ku Yakubu la iya kai kwini ki wacekecekeleini si sanaka twapapalra iniane, “Kwini mailuku numi kwini lasamiamiange ki maelane ka zuku cilria verevere; ngibabula, kipabalrithi ku mabula ku laimai.

³ Lri katwaseta kikai mwa ka Bithele, ikai kavai lri pasikaiyaku ki Twaumase cegecege ku tapatarumaramarane. Sa kipadradresedresengaku ku akwalriane, ku Twaumase paralubu nakwane; sa acaicaicaliaku mwa kidruanga yai, watapalra nakwane.”

⁴ Kwi lalasu la makitu malra kwini sanaka lasamiamiange ki maelane ka zuku si lridingi lini baai ki Yakubu; ku Yakubu la dralreke kikai lamanemane pikai tailebeane ki tharialupu ka angatu ka adeethe kavai Sekeme.

⁵ Ku Yakubu si lalalakeini sa katwatwasenga yai, ku Twaumase la pakathathiburu ki swakai kwini ki laumawmase, si kai lreme saladha liniane.

⁶ Ku Yakubu si wacekecekele makanaelre wakelanga ka Luze ki swa Kanange, kikainga sia Bithele.

⁷ Kwi lasu yakai kwini cegecege ku vaeva ku tapatarumaramarane, la sunagane kwini pasi Ile Bithele, asi lwiyane sa mubebere ki takaini yai, ku Twaumase yakai kwini papia iniane adrelane.

⁸ Kudra siarapale pathuthu ki Rebeka ka Dibura wapacai, la dralreke pikai tali lrawdru Bithele ki tailebe ki tharialupu ka angatu, lakamani kwini angatu kipasi “Watubi ka tharialupu ka angatu”.

⁹ Ku Yakubu sa twalai Mesuputamia kela yai, ku Twaumase la peelanga papia iniane adrelane, si subulrubulru iniane.

¹⁰ Ku Twaumase la iya kai iniane, “Ku naganesu yai Yakubu, ai twalainga kai, lri si Iseraylringasu.” Ku Twaumase la pabalrithi ku naganeini pasi Iseraylri.

¹¹ Ku Twaumase amia kai iniane, “Amaniaku ku wadulru sanaka manemane ka Twaumase; lri baadhaku muswane ku mapapapangale ku lamwabaibalrithi. Lrika taikaalra ku kuni ku lri twalai ki lamwabaibalrithi muswane ngiradhekane; lri kamanisu ku tatwaladhane ki latalialalai.

¹² Lri baadhaku muswane si lamwabaibalrithi muswane kudra kadaengane ku subulrubulruli si baai ki Aberahame si Isake ku kadaengane.”

¹³ Sa maka kawriva kikai vaga, ku Twaumase la katwase iniane.

¹⁴ Ku Yakubu la ikai kwini ki takikawrivaneini ki Twaumase cegecege ku vaeva ku sangulringalringavane ka lrenege, la pibelenge paralikiliki ku bava si lawlau ki ulrive.

¹⁵ Kwi lasu swanagane kikwini pasi Bithele.

Ku Rakile wapacai sa tulalalake

¹⁶ Ku Yakubu si wacekecekeleini twalai Bithele katwase. Kwi lalasu la kela kwini ai wadaailiana kavai Iparathe, laka satulalalakenga ki Rakile. Kai alisu kiapakwalri tulalake,

¹⁷ sa kai beserenga ki sakiangeange, kwini tarapatulalalake la iya kai iniane, “Madha mukuludru, sawvaalainga.”

¹⁸ Sa ateateatekenga manianiake ku Rakile, lri padaalrunga si nguniakane yai, la sunagane ki lalake pasi Benuni; ai ku tamaini swanagane pasi Biniyamingi.

¹⁹ La pacai ku Rakile, la kidralreke pikai thili ki kadalranane ki sapapia ka Iparathe; kai Iparathe sia Bithelrihimenga kaiasasane.

²⁰ Ku Yakubu wacegecege ku pacase ka lrenege ki takidralrekane, pakelanga kaikameane kwi nicegecegane ka pacase yakaiyana belenge ki takidralrekane ki Rakile.

²¹ Ku Yakubu la pacungulu katwase ku kadalrananeini, la ikai kwini tali lrawdru ka Idere tusasuladhane.

Lalalake ki Yakubu

²² Ku Yakubu sa ikaikaiyana talikai kwini yai, ku takatakanga ku lalakeini ka Riwbingi la tadrusa apece ki labaibai ki tamaini ka Bila. Ku Yakubu kialalra kikai miyaiya kikai, la kalisi turamuru. Ku Yakubu ta 12 ku lalalakeini.

²³ Ku tulalake ki Lria amani kai: Takatakanga ka lalake ki Yakubu ka Riwbingi, ala ka Simiune, Lrivi, Yuda, Isakare si Zibulungu.

²⁴ Ku tulalake ki Rakile amani kai: Yusepe, Biniyamingi.

²⁵ Ku tulalake ki duri ki Rakile ka Bila amani kai: Dange si Napetali.

²⁶ Ku tulalake ki duri ki Lria ka Zilepa amani kai: Gade si Asere. Kikai lalalake ki Yakubu makanaelre kiatulalake ikai kavai Mesuputamia.

Tapacadhane ki Isake

²⁷ Ku Yakubu la kela ka Mamere ki tamaini ka Isake; kwini Mamere yai amani ka Hiburungu, ka nataikaikaiyane ki Aberahame si Isake.

²⁸ Ku Isake tara 180 ku caili.

²⁹ Kai lasu pasuludrunga turamuru la mutukwinga pacai; ku lalakeini ka Isau si Yakubu la dralreke iniane.