Tabekacane 34 - Ngudradreadrekadhane Ka Sisiu 魯凱語聖經

Kiakabebetethe ku Dina

¹ Yakai saka minakavalane, kwini lalake ki Yakubu si Lria ka Dina sa katwase ngulatatadre ki swakai kwini ki labaibai.

² Kwini talialalai ki swakai kwini ka swa Hivi ka Hamure yakai ku lalakeini ka sia Sekeme; kwi lasu sadrele ki Dina, la ruthuku bilibili iniane, si kabebetethe iniane.

³ Ku Sekeme ngwalai ku tharirane ki Dina, la ngucawane ku dalamaneini ki alisu, la nau kikiragai ki alisu la iya kidremedreme.

⁴ La kitubi ki tamaini iya kai, “Ala kidremedrema ku apangimianeli si sitaelrelre kai ki tawvailekete.”

⁵ Ku Yakubu la kilalra ku takikabebetethane ki lalakeini ka Dina ki Sekeme. Kwidra ku lalalakeini yakai ubulane pagwagwagu ki lanilapulapwane, la kai avavagavaga, mwakalavalava liniane ku akelane lini.

⁶ Ku tama ki Sekeme ka Hamure sa kela kikawriva ki Yakubu, pasikai ki lalakeini kikawriva ku akarudrangane.

⁷ Ku lalalake ki Yakubu sakilalra kikai, la twalai ubulane mubalriu. Kwi lalasu la kalisi turaamuru, asi lwiyane ku tapiane ki Sekeme kabebetethe ki lalake ki tai Yakubu yai, taingeane ka twasinalreme ki swa Iseraylri ka kiarubwane turamuru, ka kaika nipalrailraingane.

⁸ Ku Hamure amia kai liniane, “Ku lalakeli ka Sekeme madalame ki lalake numi, ala tarumara si palraingi ki lalakeli lani mwa karudrange ki alisu.

⁹ Ala tamapalrailraingi mathaethareve ka taidrusa ka zuku, kunai nai mwa karudrange ki labaibai numi; kunumi la mwa karudrange ki labaibai nai.

¹⁰ Luka ngimiyaiya kai, kai lri katumane lu ikaikai numi ki kadaengane nai, si ngisasingikaai silape ku amwane ikaikai, la ngilralraingi thathakai, langai pikai ku tacekecekelane.”

¹¹ La pacungulu, ku Sekeme la ngikakamaani papia ki tama ki Dina si labetakaneini kitubi, “Kiatubiaku kakuruaili; sana kitubi numi ku manemane, lri palraaingaku.

¹² Sana palraingi numi nakwane mwa ki lalake numi karudrange, ku taiyane numi ku sabadhane si saceacebe, lri palraingaku pangimia.”

¹³ Ku lalalake ki Yakubu ngwalai kwini takabebetethane ki Sekeme ki agi lini ka Dina, la draedrangelre tubalre ki Sekeme si tamaini ka Hamure.

¹⁴ Kwini lalasu la iya kai, “Kai nai lri maka pamwa ki agi nai ku kai kiagelregelre tulrisi ka umawmase; ku miyaiya kikai taingeane ka twasinalreme naiane.

¹⁵ Luiyasi palraingi numi ku puvaga nai, lri palraaingi nai ku kitubi numi: Lri ngimia numi naiane, sanaka sawvalai lri kigelregelre tulrisi makanaelre.

¹⁶ Luka ngimiyaiya kai, lri palraingi nai mathaethareve numiane, si ikaikai ki kadaengane numi, kavaevanga ka zuku.

¹⁷ Alaiyasi kai numi tarumara kai puvaga nai si kigelregelre tulrisi, lri iluku nai ki agi nai katwase kai.”

¹⁸ Ku Hamure si lalakeini ka Sekeme lu kidremedreme kwini latakitubiane mamamwa ki kakudhane.

¹⁹ Kwini langukathabarane mialri ka nikiwsakenane ikai ki tacekecekelane lini, la icengecenge ngucawane ki dalamane ki lalake ki Yakubu, la makakaai katwase pangimia kwini niyane ka vaga.

²⁰ Ku Hamure si lalakeini ka Sekeme la mwa lrawlrawdru ki cekele ka rarubwane pelaela ki swakai kwini,

²¹ “Kikai laumawmase twathaithariri mitane, kai matumane paikai liniane kai ki kadaenganeta, thathakai; kikai swaadrau kai kadaengane, lri makakelrete mwa ikai. Lai lri dulruta mwa ki labaibai lini karudrange, la mia lini maka mwa ki labaibaita karudrange.

²² Ai kikai laumawmase yakai ku vaeva ku puvaga lini: Kuta kikai sanaka sawvalai lri tara ngialrawta ki sawvalai lini kigelregelre tulrisi, lwiyasi la tarumarata kikai nipuvagane, ala lri palraingi taelrenga mitane, kavaevanga ka minzuku.

²³ Alata palraingi, lani ikaikai mitane. Lumia kai, kikavai lanilapulapwane si lamanemane lini kaika lrika mitanenga?”

²⁴ Ku sakatucekelane ku umawmase la palraingi kwini taiyane ki Hamure si Sekeme; ala kigelregelre tulrisi kwini yakai ki cekele kwi lasawvalalai.

²⁵ Sa makatulrulunga, kwini ki cekele kwi lasawvalalai sakaiyana kabasau ku takigelregelrane lini tulrisi, ku tadrusa ka lalake ki Yakubu, ka betakane ki Dina ka Simiune si Lrivi, lakakadrua ku tapathingalane lini mailuku ku dramu mucekele. Kwi lalasu la pwa papacai demedeme sanaka sawvalai ki swakai kwini,

²⁶ adravane ka Hamure si Sekeme paelre papacai, la iluku ki Dina patwalai ki daane ki Sekeme.

²⁷ Sa maka papacainga, kwini drumane ku lalalake ki Yakubu la ravase kwini ki cekele, bilri ku takikabebetethane ki agi lini.

²⁸ Kwi lalasu waravase ku lakiu, lalwange, ruba si kwini yacekele si yalrilringulu sanaka maneemane.

²⁹ Kwi lalasu waribici sanaka takuciacingalre ka lamanemane, salri kwini yadaane ku palrapalrane ku lawbubulu, la ravase sanaka labaibai si lavavalake.

³⁰ Ku Yakubu amia kai ki Simiune si Lrivi, “Pamatiakuru numi nakwane; twalainga kaikameane, kai swa Kanange, swa Perizi si swa kai kikai ka laminzuku lri makitu kagirimucu nakwane. Kikai kaita tathainu ku umawmase, luiyasi ngielre kwi lalasu si kela kikaruburu mitane, kikai tacekecekelaneta lri kamudu.”

³¹ Ai kwini lalasu amia kai tubalre, “Kai nai lri palraingi ki palrapalra lu malra ki betakane nai tupairairange!”