Tabekacane 30 - Ngudradreadrekadhane Ka Sisiu 魯凱語聖經

¹ Ku Rakile kai pasiakai ki Yakubu tulalake, la kirimu pathalra ki takaini, la iya kai ki Yakubu, “Baadhaili ku lalake; lu kaisu pia kwini, lri pacadhaku!”

² Ku Yakubu la kalisi ki Rakile, si iya kai, “Kainaku lri maka ngitalikaiyane ki Twaumase; kwini kaika tulalalakesu amanini.”

³ Ku Rakile la iya kai, “Kawvai durili ka Bila, tadrusa iniane apece, lani tulalake pasikai nakwane; lu mia kwini, ala nau maka atiatina.”

⁴ Ku Rakile la malra ki durini ka Bila si baai ki tauwaneini tulabaibai, ku Yakubu la tadrusa ki Bila apece.

⁵ Ku Bila la katawbaliri, la tulalake ku lalake ki Yakubu ku vaeva ku sawvalai.

⁶ La iya kai ku Rakile, “Ngiatalikaiyane nakwane mwalra ku sakwalrialrili ku Twaumase, kialalra ku inulrili, la baai nakwane ku vaeva ku lalake ka sawvalai.” Lakamani ku sunaganeini ki lalake pasi Dange.

⁷ Ku Bila la katawbaaliringa, la tulalake ku lalake ki Yakubu ku sakadrusa.

⁸ Ku Rakile amia kai, “Maulrudru nai ki kaka, la tau akaciaku.” Lakamani ku sunagane ki lalake pasi Napetali.

⁹ Ku Lria la ngithathingale ala ka kai lri tulalakenga, la malra kwini ki durini ka Zilepa baai ki Yakubu tulabaibai;

¹⁰ ku Zilepa la tulalake ku vaeva ku sawvalai ki Yakubu.

¹¹ Ku Lria amia kai, “Ala sasipianaku!” La sunagane ki lalake ka sawvalai pasi Gade.

¹² Ku Zilepa la tulaalakenga ku lalake ki Yakubu ku sakadrusa ku sawvalai.

¹³ Ku Lria amia kai, “Ala kiasubulrubulrwaku! Sanaka ababai kiasubulrubulru ka alisu lri iya nakwane.” Lakamani ku sunagane ki lalake pasi Asere.

¹⁴ Saka kalakitalekane ki mugi, ku Riwbingi yakai ki mamugiane kidringai ku piya ku sapakagaragarangane ki sawvalai ka madru, la malra si baai ki tinaini ka Lria. Ku Rakile la iya kai ki Lria, “Tavalaili pakabekeelane kwini malra ki lalakesu kwi sapakagaragarangane ka madru!”

¹⁵ Ku Lria la tubalre, “Kaiyana makakelrete ku taribicanesu ki tauwaneli? Kikai nau riibicinga la iyaiyasu kikai sapakagaragarangane ka madru ki lalakeli!” Ku Rakile la iya kai, “Alaiyasi baaisu kwini sapakagaragarangane ka madru ki lalakesu, kai maungu tadrusanga apece ki Yakubu.”

¹⁶ Sakamiauawbunga, ku Yakubu la kela singimamugiane; ku Lria la kidredresenge, si iya kai iniane, “Kaimaungu lri tara tadrusata apece, asi lwiyane ngwalai muswane arakaiyaku ku sapakagaragarangane ka madru ki lalakeli balrithi muswane.” Kwini ki maungu, ku Yakubu la tadrusa ki Lria apece.

¹⁷ Ku Twaumase kialalra ku inulri ki Lria, la katawbaliri kwi alisu, si tulalake ku lalake ki Yakubu ku sakalrima ku sawvalai.

¹⁸ Ku Lria la iya kai, “Ku Twaumase wabaai nakwane kai pakalreva, asi lwiyane wamalraku ki durili si baai ki tauwaneli.” La sunagane ki lalake pasi Isakare.

¹⁹ Ku Lria la katawbaaliringa, la tulalake ku sakaeneme ku sawvalai ka lalake ki Yakubu.

²⁰ Kwi alisu amia kai, “Ku Twaumase wabaai nakwane kai tinukucingalrane ka saceacebe; kikai ku tauwaneli lri kathariringa nakwane, asi lwiyane pasangwa enemaku tulalake ku sawvalai ku lalakeini.” Lakamani ku sunagane ki lalake pasi Zibulungu.

²¹ Sakabilrilinga la tulalake ku vaeva ku ababai, la sunagane iniane pasi Dina.

²² Ku Twaumase makalithi ki Rakile, la kilalra ku inulrini, ala maka tulalake.

²³ Kwi alisu la katawbaliri, si tulalake ku vaeva ku sawvalai, kai alisu la iya kai, “Ku Twaumase mwalranga kai kitudreadrekaseli.

²⁴ Ku Tamatama ani baaiana nakwane ku vaeva ku sawvalai ka lalake.” Lakamani ku sunagane ki lalake pasi Yusepe.

Ku Yakubu si Labange makakawariva

²⁵ Ku Rakile sa tulalakenga ki Yusepe, ku Yakubu amia kai ki Labange, “Ala nau katwasenga! Siwlri mwa ki cekeleli.

²⁶ La palraingaili mailuku ki taelrelreli, labaibaili si lalalakeli, la nau katwase; kikai amani ku sakipawlrawlravaneli ku takaunganeli. Wathingalesu ku sakiasamwamulali pasikai muswane kaungu!”

²⁷ Ku Labange la iya kai iniane, “Kilalalra kai aiyaneli! Lu asipaku, ku Tamatama ngwalai muswane ala kamani ku subulrubulru nakwane.

²⁸ Pelaelaili, lri nguthainusu ku sapawlrawlravane, lri tara baadhaku muswane.”

²⁹ La tubalre ku Yakubu, “Wathingalesu ku tapangimianeli kaungu pasikai muswane, ikai ki tadrangalruaneli, kikai lalwangesu, lakiusu luka watumane edhale.

³⁰ Sa kainaku kelana, ku pikaisu kaika thaininwana, kikainga kai latacekecekelanesu la padrimanga kakalra turamuru; ku Tamatama ngwalai nakwane si subulrubulru muswane, kikainga lri ngipapasikainga naku ku angimianeli!”

³¹ Ku Labange la kivaga, “Lalri pangitumanaku ku apangibilrianeli pawlrawlrau muswane?” Ku Yakubu la tubalre, “Kainaku lri malra ku sapawlrawlravane ku paisu! Luiyasi palraingisu kikai ani pia kwini iyaiyali, lri dulrwaku pacungulu drangalruana ki lakiusu.

³² Kaikameane, lri mwaku ki lakiusu, si apawvagavagai ki sanaka cucuriane, vuvulrikane, si icecelrenge, ka nikiubawbalane si cucuriane, vuvulrikane ka kiu, kikai ani kamani kudra sakipawlrawlravane ku tapasikaiyaneli muswane kaungu.

³³ Luka ngimiyaiya kai lukabibilrili lri pakaduaisu thingale luka patengatenganaku luka ini; lu kelasu drele ku sakipawlrawlravaneli yai, alaiyasi la kidringaisu ku kaika cucuriane vuvulrikane ku kiu ikai ki lakiuli, ku kaika icecelrenge ka nikiubawbalane ka kiu, lri thingalesu kwini ala ka kupali.”

³⁴ Ku Labange la tubalre, “Palraingaku kwini taiyanesu, tapangimianga kikai!”

³⁵ Sakavaivai kwini, ku Labange la kibubuli malra kwini lavuvulrikane, cucuriane ka balase ka kiu si vuvulrikane, si cucuriane, si maibu ki lrawlrapungu ka tina ka kiu apawvagai, la mialri pawvagai kudra ki laicecelrenge ka nikiubawbalane ka kiu, la padrangalru ki lalalakeini,

³⁶ Ala katwase mailuku ki lakiu, mwa kwidra nimakatulrulane ku tadadavacane ku adailane matatukudha ki Yakubu. Ku Yakubu la pagwagu ku tedrane ku lakiu ki Labange.

³⁷ Ku Yakubu la malra kudra vasau ka lredelrede ki paiyange ka angatu, alemundu ka angatu si utungu ka angatu, la mubakuru ku bekeelane. Kwini ricingi ki angatu la adrelane ku cucuriane ka lrawlrapungu.

³⁸ Kai lasu la malra kikai miyaiya kai ka laricingi ki angatu thethere picucubungu ki lakiu, si taungungulane ki lakiu, asi lwiyane, kwini lakiu lu kela ki acilai ungulu yai la mabalabalau.

³⁹ Ku kiu lu icucubungu kai ki miyaiya kai ka ricingi mabalabalau, la tulalake ku vuvulrikane, cucuriane, udiwdingane ku lrulai ku kiu.

⁴⁰ Ku Yakubu la pauvagai ki nikiubawbalane ka kiu si kiu, si paecebe kwini ki vuvulrikane, si icecelrenge ka kiu ki Labange. Ku Yakubu la pangimia kikai si drima ku kiuini, si malra patatukudha kwini ki kiu ki Labange si lakiuini.

⁴¹ Kwini taricucuru ka kiu lu mabalabalau yai, ku Yakubu la malra kwini miyaiya kwini ka angatu ka ricingi thethere picucubungu ki taungungulane ki kiu, la ikai kwini ki miyaiya kwini ka laricingi mabalabalau.

⁴² Ai lu mabalabalau kwini tariarilai ka kiu yai, la kai thethere kwini miyaiya ka ricingi. La kai tarathainu, ku tariarilai ka kiu laka Labangane, ku taricucuru ka kiu laka Yakubuane.

⁴³ La mia kikai, ku Yakubu arwangiradheradheekane, makalra ku lakiu, ku laduri, ku lalrakeda si laruba.