Tabekacane 29 - Ngudradreadrekadhane Ka Sisiu 魯凱語聖經

Ku Yakubu wakelanga ki daane ki Labange

¹ Ku Yakubu la pacungulu katwase, la kela kwini ki kadaengane ki swa talrawane.

² Kwini lasu sa ikai ubulane la drele ku vaeva ku dralremedreme, yakai ku taitulruane irubu ku lakiu ithili ki dralremedreme. Ku lataraagwagu lu paungulu ki lakiu ku acilai patwalai kai ki dralremedreme; kwini dralremedreme nilrilalrilabane arakai ku maadrau ku lrenege.

³ Sana isarubunga ku lakiu, kwini lataraagwagu la mulrilabe kwini dralremedreme, si paungulu ki lakiu, ala lrilabe kwini ki dralremedreme.

⁴ Ku Yakubu la kivaga kwini ki laumawmase, “Lawsai, twalai numi inu kela kai?” Kwini lalasu la tubalre, “Twalai nai Harange.”

⁵ Kwi lasu la iya kai, “Wathingale numi ki agane ki Nahure ka Labange?” Kwini lalasu la tubalre, “Wathingale nai iniane!”

⁶ La kivaga ku Yakubu, “La mudringadringai?” Kwini lalasu la tubalre, “Mwadringadringai. Drela, kavai lalakeini ka ababai ka Rakile waililuku ki lakiu kaingananganai!”

⁷ Ku Yakubu la iya kai, “Ka yabeelengeana ka vai, kaiyana ka saelelebe ki kiu, anu kai paungulu ki kiu, lani katwase siwlri mwa ki tapagwagwane kane ku ubulu?”

⁸ La tubalre kwini lalasu, “Lu keela makanaelre ku lakiu, la urielre mulrilabe ki dralremedreme ku taraagwagu, kai lri maka paunguluana ki kiu.”

⁹ Ku Yakubu sa kikawrivarivana ki taraagwagu, ku Rakile wailuku ku kiu ki tamaini kela, asi lwiyane kwi alisu amani saka taraagwagu ka ababai.

¹⁰ Ku Yakubu sa drele ki Rakile si lakiu ki tamaini ka Labange, la katwase mulrilabe kwini ki dralremedreme, paungulu ki lakiu.

¹¹ La mwa tubarengerane ki Rakile si tubi.

¹² La pelaela ki Rakile, “Amaniaku ku lalake ki betakane ki tamasu, ka lalake ki Rebeka.” Ku Rakile la katwase lailai mubalriu pelaela ki tamaini.

¹³ Ku Labange sa kilalra ka wakela ku Yakubu ka lalake ki betakaneini, la katwase lailai mulatadre kidredresenge iniane, si kebere iniane, tubarengerane iniane, la iluku iniane pwa ki daane lini. Ku Yakubu la pelaela patuelre ki Labange ku tangilribataneini.

¹⁴ Ku Labange la iya kai, “Amanisu ku karetesananeli!” Ku Yakubu la ikai kwini taradramare.

Ku Yakubu ngwalai ki Rakile si Lria pasikai kaungu ki Labange

¹⁵ Yakai saka minakavalane, ku Labange la iya kai ki Yakubu, “Unu karetesananeli muswane, ai kaisu lri vwavutha pasikai nakwane kaungu. Ala pelaelaili, lri tupiasu ku takaunganesu ku paisu?”

¹⁶ Ku Labange tadrusa ku lalakeini ku labaibai, ku takataka sia Lria, ku agiagi lasi Rakile.

¹⁷ Ku maca ki Lria lrailraici, ku Rakile la kathariri turamuru ku tacebeaneini.

¹⁸ Ku Yakubu la kadalame turamuru ki Rakile, ngwalai kikai la kitubi, “Alaiyasi palraingisu nakwane mwa ki agiagi ka lalakesu ka Rakile karudrange, lri lremeaku pasikai muswane kaungu tarapitu ka caili.”

¹⁹ La tubalre ku Labange, “Palraingaku anatumane la pamwaku muswane karudrange amiamiaku iniane; lu pamwane muswane kadrwa ku lrika miyaiya! Ala ikaiya kai taelre nakwane!”

²⁰ Pakai ku akarudranganeini mwa ki Rakile, ku Yakubu la kaungu tarapitu ka caili, ai lu kidremedreme kai lasu mia ki makapiapiyaleana, asi lwiyane kai lasu madalame turamuru ki Rakile.

²¹ Ku Yakubu la iya kai ki Labange, “Mwakesanga ku nipuvaiyane, ala nai karudrangenga ki lalakesu!”

²² Ku Labange la padulru ku angitalekane ki akarudrangane, la dawlu kwini ki laswakai kwini ku laumawmase kipaelre.

²³ Ai kwini sakamaungu, ku Labange la malra ki lalakeini ka Lria si baai ki Yakubu; ku Yakubu la tadrusa iniane apece.

²⁴ (Ku Labange la malra ki ababai ka duri ka Zilepa baai ki Lria tuduri iniane.)

²⁵ Sakakaiyane ki mialrealre, ku Yakubu la thingale ala ka Lria, la silape ki Labange si iya kai, “Asu pia kikai nakwane? Amani ki Rakile ku pasikaili muswane kaungu. Asu tavuvulrucu nakwane?”

²⁶ Ku Labange la tubalre, “Lu singikaiyane ku kakudhane nai ka swakaikai, lu kai karudrangeana ku takataka kai paswalala ki agiagi.

²⁷ Alaiyasi la ubangalresu peelana pasikai nakwane tarapitu ka caili kaungu, lu ngilribatenga ku minakapitulane ka vai ku takarudrangane, lri baadhaku muswane ki Rakile.”

²⁸ Ku Yakubu la palraingi. Sa makapitulunga ki vai ku takarudrangane, ku Labange la malra ki lalakeini ka Rakile baai ki Yakubu pasitaelrelre.

²⁹ (Ku Labange la malra ki ababai ka duri ka Bila aduri ka sasiakawlu ki Rakile.)

³⁰ Ku Yakubu la tadrusa apece ki Rakile; ku dalamaneini ki Rakile silrialribate ku dalamaneini ki Lria. La pasikaiyana ki Labange kaungu tarapitunga ka caili.

Lalalake ki Yakubu

³¹ Ku Tamatama wadrele ki Lria ka kaika paramia ku takikadalamaneini ki Rakile, la baai ki Lria ku atulalalakaneini, ku Rakile la kai maka tulalake.

³² Ku Lria la katawbaliri, la tulalake ku vaeva ku sawvalai. Kai alisu amia kai, “Ku Tamatama wadrelenga kai sakwalrialrili, kikai ku tauwaneli lri tara kadaalame nakwane.” Lakamani ku sunagane kwini ki lalake pasi Riwbingi.

³³ Kai alisu la katawbaaliringa, la tulalake ku sakadrusa ku sawvalai. Kai alisu amia kai, “Ku Tamatama wabaainga nakwane kikai sawvalai ka lalake, asi lwiyane kialalra ka kainaku kiakadalame.” Ala sunagane ki lalake pasi Simiune.

³⁴ Kai alisu la katawbaaliringa, si tulalake ku sakatulru ku sawvalai. Kai alisu amia kai, “Kikai, ku tauwaneli lri tara kadaalame nakwane, asi lwiyane pasiakainga naku iniane tulalake pasangutulru ku sawvalai,” la sunagane ki lalake pasi Lrivi.

³⁵ Kwini alisu la katawbaaliringa, la tulalake ku sakasupate ku sawvalai. Kai alisu amia kai, “Kikai lri drengedrengeraku ki Tamatama”; lakamani ku sunagane pasi Yuda. Twalai kikai, la kai tulalakenga.