Tabekacane 25 - Ngudradreadrekadhane Ka Sisiu 魯凱語聖經

Drumane ka taingeane ka lamwabaibalrithi ki Aberahame

¹ Ku Aberahame la karuudrangenga mwa ki tangea ka ababai, ka sia Ketura.

² La tulalake ku lalake ki Aberahame ka sia Zimerane, Yukesane, Medane, Midiange, Isebake si Sua.

³ Ku Yukesane la tulalake ki Seba si Didane, ku mwabaibalrithi ki Didane amani kai swa Asurime, swa Letusi, si swa Leumime.

⁴ Ku lalake ki Midiange amani kai Ipa, Ipare, Hanuke, Abida si Ileda. Kilakikai amani ku lamwabaibalrithi ki Ketura.

⁵ Ku Aberahame wabaai patuelre ku tacekecekelane ki Isake.

⁶ Ai kai lasu, sa panianianiakeana mialri vala ku lawbubulu baai kudra ki lalalake ki drumane ka labaibaini. Ala pakatwase kikai ki lalalake papia tali talrawane, pakidaili ki lalakeini ka Isake.

Tapacadhane si takidralrekane ki Aberahame

^7-8 Ku Aberahame malragi ku niakeini, sa pasuludrunga tara 175 ku cailini wapacai.

⁹ Ku lalakeini ka Isake si Isemaele la dralreke iniane pikai ki barungulu ka Makepela. Kikai barungulu yakai tali talrawane ka Mamere, ka nakadaengane ki swa Hite ka Iperungu ka lalake ki Zuhare.

¹⁰ Kikai kadaengane amani ku langai ki Aberahame ki swa Hite. Ku Aberahame si taelrelreini ka Sara tara kiadralreke ikai kwini.

¹¹ Sa pacainga ku Aberahame, ku Twaumase swabulrubulru ki lalakeini ka Isake. Ku Isake yakaikai kwini adeethe talikai Bire Lahai Rui.

Mwabaibalrithi ki Isemaele

¹² Kudra swa Izipiti ka duri ki Sara ka Hagare twalalake ku lalake ki Aberahame ka sia Isemaele, kikai lebe amani ku lalalakeini.

¹³ Singikai ku tamasakaikaiyane ku takitulalakane pacase kikai lanagane lini amani kai: Nebaiuthe, Kidare, Adebele, Mibesame,

¹⁴ Misema, Duma, Masa,

¹⁵ Hadade, Tima, Yeture, Napise si Kidima.

¹⁶ Kai lalasu yai amani ku talialalai ki tai 12 ka zuku. Kudra taikaiyane lini ku cekele, ku tatusasuladhane lini la singikai ki nagane lini sunagane.

¹⁷ Ku Isemaele sapacai tara 137 ku cailini,

¹⁸ ku taikaiyane ki mwabaibalrithi iniane ku kadaengane twalai Havila daruru ka tali talrawane Izipiti, papia kavai tali Sure ka Asiria. Kai taelre ki drumane ki lamwabaibalrithi ki Aberahame.

Kiatulalake ku Isau si Yakubu

¹⁹ Kikai ngwakai ki Isake ka lalake ki Aberahame ka pacase.

²⁰ Ku Isake sa taramasupatelenga ku cailini marudrange mwa ki Rebeka; kai Rebeka lalake ki Bethuele ka swa Arame kavai Mesuputamia, ka agi ki Labange.

²¹ Asi lwiyane ku Rebeka kai twalalake, ku Isake la pasikai iniane papia ki Twaumase inulri; ku Tamatama la palraingi ku inulrini, la katawbaliri ku Rebeka.

²² Tukapia kwini katawbalirini, sakaiyana kitulalake, kwini yabarangane la makakalisilisiinga. Kwini alisu la iya kai, “Anaku kipakwalriinga?” La kivaga ki Tamatama.

²³ Ku Tamatama la tubalre: Drusa ka kuni kwini yabarangane muswane; lri tulalakesu ku lri maecebe makakabadha ka minzuku. Ku tangea lrika magagarange ki tangea; kwini takataka lri asasiakawlu ki agiagi.

²⁴ La darurunga ku atulalakane, la tulalake ku Tukapia.

²⁵ Kwini aswalala mutaluvaivai, la kadirerele, ka ubawbalane ku kinawmasane, mia ki siaebele ku ubawbalane ka laimai, lakamani ku sunagane lini pasi Isau.

²⁶ Kwini sakadrusa ku ngiabwale, ku alrima la galrimecemece tapakilri ki Isau, lakamani ku sunagane ki tamaini pasi Yakubu. Kwini lalasu sa kitulalake yai, ku Isake taramanemelenga ku cailini.

Kialangai ku Isau ku takatinueapaneini

²⁷ Sakadrawnga kwini tadrusa ka lalake, kwini Isau laka amani kwidra taraalupu, madalame nguaububulane; ai kwini Yakubu maseselebe ka taitavananane.

²⁸ Ku Isake la pawkalrivili kilibake ki Isau, asi lwiyane kwi lasu madalame kane kudra panapana ki Isau ku la singiubulane; ku Rebeka laka makilialibake ki Yakubu.

²⁹ Yakai sakavaivai, ku Yakubu la agaga ku azeki, ku Isau la kela singitalupane, la mubaaisinga,

³⁰ la iya kai ki Yakubu, “Lri pacaingaku ki mubaisane, ala badhaili kwini sawngulane!” (Ngwalai kikai kai lasu la mialri si Idume.)

³¹ Ku Yakubu la tubalre, “Badhaili kwini takatinueapanesu, la nau baai kai sawngulane ka azeki.”

³² Ku Isau la iya kai, “Unu! Kikai lri pacainga naku, kai takatinueapananeli manemane ku paluludane?”

³³ Ku Yakubu la tubalre, “Paswalana kiketekete nakwane, si baai kwini eape ka nagane.” Ku Isau la kiketekete, la baai ki Yakubu kwini eape ka nagane.

³⁴ Ku Yakubu ala baai kwini lapange si sawngulane ka azeki ki Isau, sa maka kane maka ungulunga ku Isau, la ngidrakale si katwase. Ku Isau twangimiyaiya kai tudreadrekase ku nagane ki eape.