Tabekacane 24 - Ngudradreadrekadhane Ka Sisiu 魯凱語聖經

Ku Isake marudrange sitauwane ki Rebeka

¹ Kikai, ku Aberahame tarudrawdrangenga turamuru, ku takaunganeini ikai ki tapanianiakaneini kiasubulrubulru ki Tamatama.

² Kwi lasu la iya kai ki taramarasikai ki tacekecekelaneini, ka marwarudrangenga ka sasiakawlu, “Ta kwini alrimasu pwa kai ki kabicelrakane ki vagisili si kiketekete.

³ Papia ki Tamatama ka Twaumase ki swa subelebelenge si kawmasane kiketekete, madha ikaikai kai Kanange silape ku lrika taelrelre ki lalakeli;

⁴ lri tara siwlrisu mwa ki takitulalakaneli, ikai kwini ki laretesaneli pasikai ki lalakeli ka Isake pilri ku lrika taelrelreini.”

⁵ Ai kwini sasiakawlu amia kai, “Luiyasi kwini ababai la kai ubangalre katwase ki daaneini si kainganai tupapalra nakwane kela kikai, lai lri tumane madu? Lri ilukaku ki lalakesu siwlri mwa ki nacekelesu?”

⁶ Ku Aberahame la tubalre, “Kaisu lri maka iluku ki lalakeli siwlri mwa ki nacekeleli lutuumane!

⁷ Ku Tamatama ka Twaumase subelebelenge waililuku nakwane katwase ki cekeleli, kwini ki taikaiyane ki laretesaneli, kiaketekete nakwane ku Twaumase ka lri baai kai taikaiyaneta kai kadaengane ki lamwabaibalrithi nakwane. Lri tara sikawlu ki sasiakawluini paswalala padulrudulru, ku lrika amaka pasikaiyanesu ki lalakeli ikai kavai malra kwidra taelrelre ki lalakeli.

⁸ Alaiyasi kwini alisu la kai mubangalre tupapalra muswane kainganai, kikai tamakaketeketane kadrwa ku capilane muswane. Ai maadha ililuku ki lalakeli mwa kavai.”

⁹ Kwini sasiakawlu la malra ku alrimaini pwa ki kabicelrakane ki vagisi ki tawki ka Aberahame, kiketekete ku lrika apangimiane ku tasudralrwane ki Aberahame.

¹⁰ Kwini sasiakawlu la patwalai ki lrakeda ki tawki pilri ku mangeale, si mailuku ku maiyakaikaai ku lawbubulu ki tawkini, papia tali dradha kavai Mesuputamia, ka taikaiyane ki Nahure ka cekele.

¹¹ Sa kelanga kikwini, la papidruru ki lrakeda ithili kwini ki latadre cekele ka dralremedreme. Kikwini laka miauawbunga, samwalrwalrunga ki lalabaibai.

¹² Kwi lasu la inulri iya kai, “Tamatama ka Twaumase ki tawkili ka Aberahame! Kiatubiaku muswane kaikameane pangiesadhaili, kiatubiaku muswane ku apasuswanesu ku tapuvaganesu ki tawkili.

¹³ Kaiasasane acegecegaku ithili ki dralremedreme, kikai latawvailekelekete ki swakai kai ki cekele lri makitu kela kai mwalru.

¹⁴ Lri kikawrivaku liniane ki tangeea iya kai, ‘Ala sarara kwi tamwalrwalrwanesu, si paungulu nakwane kwi acilai.’ Luiyasi iya kai kwini alisu, ‘Ungula! La nau mialri vau kai acilai si paungulu ki lrakedasu!’ Lri sidraamaku kikai tawvailekete ka amani ku pasikaisu ki sasiakawlusu ka Isake pilri ka taelrelreini. Luka ngimiyaiya kikai, lri thingalaku ala ka pangiamiasu ku tapuvaganesu ki tawkili.”

¹⁵ Sa kaiyana tulrepenge ku inulrini, ku Rebeka wakelaanga thili ki dralremedreme, angeale ku tamwalrwalrwane; kwini alisu yai lalake ki Bethuele. Kwini Bethuele lalake ki agi ki Aberahame ka Nahure si taelrelreini ka Mileka.

¹⁶ Kwi Rebeka mathariri turamuru ka ababai, laka tawvaileketeana, kadrwana ku umawmase ku kiaelre iniane. Kwi alisu la mulebe mwa thili ki dralremedreme, la vau pasuete ki tamwalrwane. Si mubelenge.

¹⁷ Kwini sasiakawlu la kidredresenge iniane, la iya kai iniane, “Ala pawngulaili pakatiiki!”

¹⁸ Kwini alisu la iya kai, “Sinsi alani ungula!” La makakaai sarare ku tamwalrwane, la malra pikai ki alrima paungulu kwini ki sasiakawlu.

¹⁹ Samaka ungulu kwini sasiakawlu, ku Rebeka la iya kai, “Ala nau mialri pawngulu ki lrakedasu, ani ngukadhamane.”

²⁰ Kwini alisu la kirariimu gugu ku acilai pwa ki tapawngungulane. La katwaseana lailai mwa ki dralremedreme mwalru; la maka pawngulunga kwini ki lrakeda.

²¹ Kwini lasu la dredredrele ki alisu, ku athingalane luka amani ku ani pangimia iyaiya iniane ki Tamatama ku awngane?

²² Samaka ungulunga kwini lrakeda, kwini lasu la malra ku tinukucingalrane ka kingi, la pasilridingi ki ngungwane kwini ki alisu, la malra ku maecebe ku kingi ka kalathe, pasikalathe pikai ki alrimaini.

²³ Kwini lasu la kivaga, “Ala pelaelaili, aneane ku tamasu? Ikai ki daane ki tamasu yakai ku taikaiyane nai sulai?”

²⁴ Kwini alisu la tubalre, “Ku ama sia Bethuele ka lalake ki Nahure si Mileka.

²⁵ Makalra naiyanane ku sapakapakanane ku laubulu, la mialri ikai ku tasuladhane numi.”

²⁶ Kwini lasu la pidruru si sukubu ki Tamatama.

²⁷ Kwini lasu amia kai, “Wadrengedrengeraku ki Tamatama ka Twaumase ki tawkili ka Aberahame. Pangiamia ku tapuvaganeini ki tawkili; la malra nakwane pakakai ki ani mwa taiyane ki tawkili kwini ki daane ki laretesaneini.”

²⁸ Kwini tawvailekete la lailai mutavanane, si pelaela ki tinaini si lawacekecekeleini.

²⁹ Ku Rebeka yakai kudra takaini ka sawvalai ka sia Labange, kwini lasu la katwase lailai mwa ki thili ki dralremedreme, kwini ki sasiakawlu ki Aberahame.

³⁰ Kwi lasu wadrelenga ki agini ka sialridingi ku ngungwaneini ku kingi si sikalathe ku kingi, la mialri kilalra ki vagaini ku takawrivane kwini ki lasu ki agini. Sakamani kwidra ku sasiakawlu ki Aberahame la ikai kwini ki thili ki dralremedreme, ithili ki lrakeda acegecege. Ku Labange la mwa iniane,

³¹ la iya kai iniane, “Ila tamwa naiyanane. Amanisu ku subulrubulru ki Tamatama, asi acegecege ikai latadre? Maka padulrungaku ka taikaiyane numi sulai, si padulru ka tapikaiyane ki lrakeda.”

³² Kwini umawmase la mudaane. Ku Labange la pulebe kwini amece ki lrakeda, si pakane ku ubulu. La pacungulu malra ku acilai baai ki sasiakawlu ki Aberahame si kwini ki papalraini patawdrapale.

³³ Nipadulrwanenga ku akaneane, kwini umawmase la iya kai, “Ala kilalraana nau pakaelreana kawriva ku tacunane ki tawkili, ala nau kane!” Ku Labange la iya kai, “Ani kawriva midra!”

³⁴ Kwini umawmase la iya kai, “Sasiakawlaku ki Aberahame.

³⁵ Ku Tamatama maadrau turamuru ku subulrubulruini ki tawkili, la pasatacekecekelane turamuru iniane. Ku Tamatama la patarumara iniane ku lalwange, lakiu, lakingi gingi, duri ka sawvalai, duri ka ababai, lalrakeda si laruba.

³⁶ Ku taelrelreini ka Sara saka tarudrawdrangenga la tulalake ku lalakeini ku vaeva ka sawvalai; ku tawki la baai ki lalakeini kwini tacekecekelane patuelre.

³⁷ Ku tawki la pakiketekete nakwane, ku lrika apasuswane ku tacunaneini. Kwi lasu amia kai, ‘Madha mwamwa ki swa Kanange silape ku lri kithareve mwa naiane;

³⁸ lri mwasu ki cekeleli, ki laretesaneli pasitaelrelre iniane.’

³⁹ La kivagaku ki tamatama, ‘Luiyasi kwini ababai la kai mubangalre tupapalra nakwane, lai lri tumanenga madu?’

⁴⁰ Kwi lasu la tubalre, ‘Kudra sukusukubuli ka Tamatama lri tara sikawlu ki sasiakawlu belenge si lri karedele muswane, lalri maka pangimiasu ku kisikawlusu. Lri tara ikaisu kwini ki cekeleli, ikai ki laretesaneli pasikai ki lalakeli pasataelrelreane.

⁴¹ Sana mwasu ki daane ki laretesaneli, pangiamiangasu ku kiketeketesu. Ku laretesaneli la kai patarumara muswane kwini ki ababai, kwini kiketeketesu kadrwanga ku tamacacapilaneta.’

⁴² “Kaikameane, sa mwaku thili ki dralremedreme, la kitubiaku iya kai, ‘Tamatama ka Twaumase ki tawkili ka Aberahame! Kikai kiatubiaku muswane kaiasasane ku apangimianeli ku kisudralruli.

⁴³ La acegecegaku ithili ki dralremedreme, lu ikai ku tawvailekete ku wakela vau ku acilai yai, lri kitubiaku iniane ku lrika apaungulane nakwane ku yakai ki tamwalrwaneini.

⁴⁴ Luiyasi kwini alisu la pukawnu, si nau vau paungulu ki lrakedali iya, siadramaku kwini alisu ala ka amani kudra pilrisu ka lrika taelrelre ki lalake ki tawkili.’

⁴⁵ Sa kainaku maka inulriana, ku Rebeka waangeale ku tangukaiyaneini mwalru, si kelaanga ki thili ki dralremedreme vawvau. La iyaku kai ki alisu, ‘Ala pakatikia paungulu nakwane ku acilai.’

⁴⁶ Kai alisu la makakai sarare ku tamwalrwane, si iya kai, ‘Ala ungula! Lalri mialriaku paungulu ki lrakedasu!’ La ungulaku, la mialri vau si paungulu ki lrakedali.

⁴⁷ La kivagaku iniane, ‘Aneane ku tamasu?’ Kwi alisu la tubalre, ‘Ku ama sia Bethuele ka lalake ki Nahure si Mileka.’ Sa iya kwini, la malraku ku lridingi pasilridingi ki ngungwane si pasikalathe iniane.

⁴⁸ La pidruraku sukubu ki Tamatama, si drengedrengere ki Tamatama ka Twaumase ki tawkili ka Aberahame; wailuku nakwane makakai ki laretesane ki tawkili, la maka patwaladhaku ki agane ki kadralra ki tawkili kidringai ku lrika kiathareve mwa liniane.

⁴⁹ Kaiasasane, luiyasi palraingi numi arakai ku tengatengane ku kidremedreme pasikai ki tawkili, ala pelaelaili; lu kai numi palraingi, mialria pelaelaili, la nau thingale ku apangitumananeli.”

⁵⁰ Ku Labange si Bethuele la tubalre, “Kikai tangimiane kelrekelretenga ki Tamatama, manemaneana ku aiyane nai?

⁵¹ Kai Rebeka, iluka iniane, ani singikai ku taiyane ki Tamatama, ataelrelre ki lalake ki tawkisu.”

⁵² Ku sasiakawlu ki Aberahame sakilalra kikai vaga, la pidruru ikai daedae sukubu ki Tamatama.

⁵³ Kwi lasu la pacungulu malra ku laimai, kingi gingi, la sangirageragelanane baai ki Rebeka, la mialri baai ku nitukucingaalrane ku saceacebe ki takaini ka sawvalai si tinaini.

⁵⁴ Laka miyaiya kai, ku sasiakawlu ki Aberahame si lapapalraini ala kirimunga makitu kanenga ungulunga, si ikai kwini sulai ku makavale. Sakakaiyane ki mialrealre sa ngidrakale, la iya kai kwini lasu, “Ala nau katwasenga siwlri mwa ki tawkili!”

⁵⁵ Ai ku taka ki Rebeka si tinaini la iya kai, “Kai lalake ani makapiapialeana ikai kai naiane, lu padawdaalru lri makamangeale ku vai ala nikatwase.”

⁵⁶ Ai Kwini lasu amia kai, “Madha puadaidailane naiane! Ku pangiamianga ku Tamatama pakasasulivate naiane, ala nau katwasenga mwa ki tawkili!”

⁵⁷ Kwi lalasu la tubalre, “Alata kivaga ki lalake, lata dredrele lulri tumanaiya!”

⁵⁸ La dawlu ki Rebeka, si kivaga iniane, “Palraingisu tupapalra kikai ki umawmase katwase?” Kwi alisu la tubalre, “Palraingaku!”

⁵⁹ Ala, pakatwase ki Rebeka si siarapale iniane ka tiatina tupapalra ki sasiakawlu ki Aberahame si kwini ki lapapalraini makanaelre.

⁶⁰ Kwi lalasu la subulrubulru ki Rebeka iya kai: Agili! Asu atina ki sanaka umawmase! Ku lamwabaibalrithi muswane ani pamalebe ki cekele ki badha!

⁶¹ Ku Rebeka si twapapalra iniane asasiakawlu ka lababai la maka padulrunga patuelre, la ngukai ki lrakeda. Ku sasiakawlu ki Aberahame la mailuku ki Rebeka katwase.

⁶² Kikai, ku Isake taluaelanga mwa calragulragu ka Bire Lahai Rui, ikai tali lrawdru ka Kanange.

⁶³ Sakamiauawbu, yakai lrilringulu dadadavace, la paswabelenge drele, la drele ku maredededele ku ngwalrakedakeda.

⁶⁴ Ku Rebeka sa drele ki Isake, la mulebe ki lrakeda,

⁶⁵ si kivaga ki sasiakawlu ki Aberahame, “Kikavai twalai ki lrilringulu kaingananganai papia mitane aneane?” Ku sasiakawlu la tubalre, “Ala amani ku lalake ki tawkili.” Ku Rebeka la arakai ku salripungai paidringi ki lringauini.

⁶⁶ Kwini sasiakawlu la pelaela kudra tapianeini patuelre ki Isake.

⁶⁷ Ku Isake la ililuku ki Rebeka mudaane ki balrawbau ka nataikaikaiyane ki tinaini ka Sara, la mamamuanga karudrange. Ku Isake madalame ki Rebeka turamuru; twalai sa pacai ku tinaini, pakeelanga kai ala kasasa.