Tabekacane 21 - Ngudradreadrekadhane Ka Sisiu 魯凱語聖經

Kiatulalake ku Isake

¹ Ku Tamatama swabulrubulru ki Sara, singikai kudra tapuvaganeini;

² kwi alisu la katawbaliri, la tulalake ku vaeva ku sawvalai saka tarudrawdrangenga ku Aberahame; kwini lalake ala ngimiya kudra takelretane ku vai ki Twaumase si kitulalake.

³ Ku Aberahame la sunagane iniane pasi Isake.

⁴ Ku Aberahame la pasusu ku taiyane ki Twaumase, ku Isake sa makavalrulunga ku vai ku takitulalakane la pakigelregelre tulrisi iniane.

⁵ Sa kitulalake ku Isake yai, ku Aberahame taraidainga ku caili.

⁶ Ku Sara amia kai, “Ku Twaumase pakiaragai paulrakai nakwane; kudra kialalra kikai tangimiane ku umawmase la mialri tupapalra nakwane makitu kiragai si mulrakai.”

⁷ Kwini alisu la iyana kai, “Aneane ku lri maka yugingi ki Aberahame ku Sara lri sirapale ku lalake iya? Saka tarudrawdrangenga, ala tulalakeanaku pasikai iniane ku sawvalai.”

⁸ Kwini lalake la swasuuai kadrau, saka taisadrane kai thuthunga kwini ki vai, ku Aberahame la tuadrau pangitaleke.

Ku Hagare si Isemaele kiapakatwase

⁹ Yakai sakavaivai, kwini swa Izipiti ka duri ka Hagare kudra tulalakeini ka lalake ki Aberahame ka Isemaele si lalake ki Sara ka Isake la tadrusa kivavavange.

¹⁰ Ku Sara la drele liniane, la iya kai ki Aberahame, “Pakatwasa kai ki duri ka ababai si lalakeini. Kikai lalake ki ababai kai lri maka uridrusa ki lalakeli ka Isake mucungulu ki tacekecekelanesu.”

¹¹ Ngwalai kikai la kwalri turamuru ku Aberahame, asi lwiyane ku Isemaele mialri ka lalakeini.

¹² Ai ku Twaumase amia kai ki Aberahame, “Madha ngwalalai kai ki lalake si duri ka Hagare si kathekelre. Singikaiya ku taiyane muswane ki Sara la pangimia, asi lwiyane lri patwalaisu ki Isake tarumara kudra puvagali muswane ku lamwabaibalrithi.

¹³ Ala kwini lalake ki duri ka ababai, lri mialriaku baai iniane ku mapaangale ku lalalake, lri avaeva ka kuni, asi lwiyane mialrini ka lalakesu.”

¹⁴ Sakakaiyane ki mialrealre, ku Aberahame la pailuku ki Hagare ku lataleke si akuvaeva ki lrangici ka thuthubungu ku acilai, si baai patarumara ki Hagare kwini lalake, si pakatwase liniane. Ku Hagare la katwase kwini, la kela ka calragulragu Bereseba, la ikai kwini si amama ki kadalranane.

¹⁵ Sa elemenga ungulu ku acilai, la malra kwini ki lalake pitailebe ki angatu,

¹⁶ la katwase kidaili ki lalake ikaai kau lu lrailane ku adailane si nene ikai kwini. La ngikakawrivariva, “Kainaku walreme dredredrele ki lalakeli lu pacai.” Kwini alisu la nene ikai kwini si tungawngaungau tubitubi.

¹⁷ Ku Twaumase kialalranga ku tatubiane ki lalake, “Ku sasiakawlu ki Twaumase la twalai belenge kawriva ki Hagare iya kai: Hagare, asungithanga pia kai kawpupungu? Madha mukuludru, ku Twaumase kialalranga ku tatubiane ki lalake.

¹⁸ Ngidrakaala, la drakale ki lalake, si sasa iniane; lri twadravaku ka kuni ki lamwabaibalrithi iniane.”

¹⁹ La pacungulu, ku Twaumase paledra kwini maca ki Hagare, la drele kwini alisu ku taluvaale ku dralremedreme; kwini alisu la mwa thili ki dralremedreme, si pasaela pasuete ki lrangici ka thuthubungu ku acilai, la paungulu ki lalake.

²⁰ Ku Twaumase la tapalra ki lalake; la swasuai kadrau, ikaikai kwini calragulragu Parange, ka amaninga kwidra taraalwalupu.

²¹ Ku tinaini la pamwa ki tangea ka swa Izipiti ka ababai pasitaelrelre iniane.

Ku Aberahame si Abimileke makaketekete

²² Sakamani kwidra, ku Abimileke si kiacapili ki kwapingini ka Pikule matwase mwa kikawriva ki Aberahame, la iya kai iniane, “Sanaka tatumananesu ki maneemanenga taikaiyane ku Twaumase tapalra muswane;

²³ lakamani, ikaiya kikai, icucubungu ki Twaumase kiketekete, kaisu lri draedrangelre nakwane, ki lalalakeli si lamwabaibalrithi nakwane lutuumane. Kai takilibaakaneli muswane, lri mialrisu kilibake nakwane si taikaiyanesu kai ki kuni.”

²⁴ Ku Aberahame la tubalre iya kai, “Palraingaku kiketekete.”

²⁵ Ku Aberahame la ngwalai ki sasiakawlu ki Abimileke ku taribicane ku taluvaale ku dralremedreme si kalisi ki Abimileke.

²⁶ Ku Abimileke la iya kai, “Kainaku wathingale luka aneane ku paiya kikai. La kaisu matikaiyana pelaela nakwane kikai, kikai yai tau kilaalraku.”

²⁷ Ku Aberahame la baai ki Abimileke ku piya ku lakiu si lwange, kwini tadrusa la makaketekete.

²⁸ Ku Aberahame la malra ku pitu ka lrulai ka tina ka kiu sarare pikai thili.

²⁹ Ku Abimileke la kivaga iniane, “Asu piya kikai?”

³⁰ Ku Aberahame la tubalre, “Ala tarumara kikai pitu ka lrulai ka tina ka kiu, sapelaelanesu ka patengane kikai dralremedreme ala ka amaniaku ka walruku.”

³¹ Laka miyaiya kikai, kwini kadaengane lakamani ku kipasi Bereseba, asi lwiyane kikwini tadrusa yakai kwini makaketekete.

³² Kwini lalasu sa ikai Bereseba makaketeketenga, ku Abimileke si kiacapili ki kwapingini ka Pikule la katwase siwlri mu Pelisitine.

³³ Ku Aberahame la ikai Bereseba lredreke ku vaeva ku yanagi, ikai kwini sukubu ki Tamatama ka palralrawthu panianiake ka Twaumase.

³⁴ Ku Aberahame la ikaikai Pelisitine kaulai.