Tabekacane 2 - Ngudradreadrekadhane Ka Sisiu 魯凱語聖經

¹ La ngimia kikai, kikai lepawngane sanaka maneemane maka wabeekacenga.

² Ikai ki samaka pitulu, ku Twaumase twalreepengenga ku tabekacaneini kaungu la isadra ku awngane.

³ La subulrubulru baai ki samakapitulu, si tusaniange kwini ki vai ka mwakalrivili ka vai; asi lwiyane yakai kwini ki vai tulrepenge ku tabekacane, la palikai ku awngane si isadra.

⁴ Kikai yai amani ku tangilribatane sa bekace ku Twaumase ki lepawngane. Ku Tamatama ka Twaumase sa bekace kai ki lepawngane yai,

Mawivaivai ka Idingi

⁵ kai daedae kadrwa ku ubulu si angatu, kadrwa ku lalacenge, asi lwiyane kaiyana pawdale, la kakadrwa ku umawmase ku mauawngu;

⁶ ai yakaai ku acilai ku twalai adringi ki kadaengane beraberai, pakalrealreke ki kadaengane.

⁷ Sakabilrilinga, ku Tamatama ka Twaumase la arakai ku lamenge ki daedae bekace tuumawmase, la malra ku saseverane ki niake ipi pwadringi ki ngungwaneini, kai lasu la kirimunga ka yakai ku niake ka umawmase.

⁸ Ku Tamatama ka Twaumase yakai kavai tali talrawane cegecege ku Idingi ka mawivaivai, la malra ki bekaceini ka umawmase pasutelrai pikai kwini adringi.

⁹ Ku Tamatama ka Twaumase pacebe kwini ki kadaengane ku makaelaeela ku tathaaithariri ku laangatu, la pumadru ka talimememe. Ikai kwini ki mawivaivai yakai ku taluvaale ku patarwamaara ku niake ka angatu, la mialri ikai ku taluvaale ku wadulru pathingale ki umawmase ku mathariri si malisi ka angatu.

¹⁰ Yakai ku vaeva ku kadravane ku twalai Idingi kainganai mwaludru, si pwacilai kwini ki mawivaivai. La mwaludru mulatadre Idingi, si mawvagavagai mau supate ka vaalru.

¹¹ Ku sivaale ku vaalru sia Pisunge, ngiavalritutuku kavai Havila.

¹² Ki talikai kwini tatwaladhane ku kakingiane, bekelane ka nisilasilapane ka sarakaikaiyane tusapasangulrelremane, si tinukucingalrane ka lrenege.

¹³ Ku sakadrusa ku vaalru sia Gihunge, ngiathalrilringulu Kuse.

¹⁴ Ku sakatulru ku vaalru sia Tigerise, ngwakakaai bitake tali talrawane Asiria. Ku sakasupate ku vaalru sia Yuparati.

¹⁵ Ku Tamatama ka Twaumase la malra kwini ki umawmase pasutelrai pikai Idingi, si pakauawngu iniane, drangalrungalru kwini ki mawivaivai.

¹⁶ Ku Tamatama ka Twaumase la drekase kwini ki umawmase, “Sanaka madru ki ivai ikai kai ki mawivaivai, lri dulrusu kane patuelre.

¹⁷ Kathaane kavai lri dulru pathingale ki umawmase ku mathariri si malisi ka madru ki angatu, kaisu lri kane lutuumane; lu kanesu, ikai kwini ki vaivai lri tara pacaisu.”

¹⁸ Sangilribatenga, ku Tamatama ka Twaumase la iya kai, “Kai umawmase lu tangeangea cekecekecekele kai mathariri, lri bekacaku ku tangea ku swadalepe ka palra ka lri paralubu iniane.”

¹⁹ Ku Tamatama ka Twaumase ala arakai ku dae bekace ku makaelaeela ku waudriwdripi si adhadhame, la malra liniane pucucubungu kwini ki lasu, si kamani ku swanagane; kwini lasu la sunagane sanaka waudriwdripi.

²⁰ Kai lasu swanagane ki lanilapulapwane, laadhadhame, si labulabulai; ai, kadrwa liniane ku natangeanga ku swadalepe ka palraini, ku lri maka paralubu iniane.

²¹ Lakamani, ku Tamatama ka Twaumase la paereke kwini ki lasu. Kwini lasu sa kasipelrenge sakaereke, ku Tamatama ka Twaumase la malra ku vaeva ku vigwaini, la pwa sawlri apaelre kwini beate.

²² Ku Tamatama ka Twaumase la arakai kwini vigwa bekace ku tangea ka ababai, la iluku kwini ki alisu pucucubungu kwini ki lasu.

²³ Kwini lasu la iya kai, kikai amanilringa ku twalai ki culraleli, ka twalai ki beateli; “Ababai” lri iyaku iniane, asi lwiyane kikai alisu twalai ki “Sawvalai” kainganai.

²⁴ Lakamani, ku sawvalai lri kitukudha ki marudrawdrangeini, si maelre ki taelrelreini, kwini tadrusa lai ka vaevanga ka kinawmasane.

²⁵ Kwini lasu si taelrelreini vialralralrakane, ai kai kiarimu kainu.