Tabekacane 19 - Ngudradreadrekadhane Ka Sisiu 魯凱語聖經

Pasalrivane ki swa Sudume

¹ Sakamaungu kwini ki vai, kwini tadrusa ka sasiakawlu belenge la kela Sudume; ku Lute la nene ikai taelelebane ki cekele. Sa drele liniane la acegecege, kidredresenge liniane, pidruru guruthungane icucubungu liniane,

² la iya kai, “Latamatamali ila tamwa naiyanane, la nau pasudalru numiane. Anu tawdrapale, si sulai kai maungu, luiya ki mialrealre la sara ngidrakaale, pacungulu ku kadalranane numi.” Ai kwini lalasu twabalre, “Ini! Lri ikai nai kadalranane cekele sulai.”

³ Ai ku Lute malritheethe iluku liniane, kwini lalasu la katwase mwa linianane. Ku Lute la paakame ku kaika nipawsemakane ka pange ki sasiakawluini, padulru ku akaneane si pasudalru. Sa maka padulrunga, la kane kwini lalasu.

⁴ Kwini badhabadha sakaiyana mutapeapecane, kudra lasawvalai ku tarudrawdrange lavavalake ki swa Sudume, la kela ngithalringulu ki daane ki Lute.

⁵ La tawtau ki Lute, kivavaga iniane, “Kai maungu kudra yakai numianane kwini laumawmase yakai inu? Ta pulatadra liniane! Lanai taelre liniane apece.”

⁶ Ku Lute la mulatadre, si elebe ku lrawlrawdru,

⁷ la iya kai liniane, “Lawsai, kai numi lri maka pia kikai ngialisiane!

⁸ Drela, tadrusa kai lalakeli tara tawvailekete, nau baai numiane, la ngisasingikaiya ku tatumane iya numi liniane. Ai maadha pakwalrialri kai ki tadrusa; kai kela lini naiyanane, badhabadhali, lri tara palakebaku liniane.”

⁹ Ai kwi lalasu twabalre, “Kusu ka maelane ka kuni ka umawmase, katwasa! Aneanesu, si nau kamani ka wadrekase thethengete naiane! Katwasa! Lu kaisu kilalra, lri kiecebe nai muswane, ka parawramuru ku takiecebane nai liniane.” Kwini lalasu la pwa lrudrulu ki Lute, drikisi aru cucubungu, lri lrudrulu ki lrawlrawdru si mudaane.

¹⁰ Ai kwini tadrusa wataale ku alrima, malra ki Lute pudaane, si elebe ku lrawlrawdru.

¹¹ Kwini ki yalatadre ku lasawvalai, kai wasusu ku tarudrawdrange ku lavavalake, mamukici makanaelre, la kai maka kidringai ku lrawlrawdru.

Ku Lute matwase Sudume

¹² Kwini tadrusa la iya kai ki Lute, “Ikai kai ki cekele yakaiyana ku laretesanesu? Yakaiyana ku lalakesu, ku taelrelre ki lalalakesu, ku drumane ku laretesanesu ku yakai kai? Pakatwasa liniane,

¹³ asi lwiyane lri amudu nai kai ki cekele. Ku nisidrurwane pangukai kai ki laumawmase, ku Tamatama kialalranga, lakamani ku pakainganai naiane kela amudu kai ki cekele.”

¹⁴ Ku Lute la katwase silape ki siasilangane ki lalakeini ka ababai, pelaela liniane iya kai, “Kirarimwa katwase, ku Tamatama lri amudu kai ki cekele.” Ai kwini lalasu parwarwaruthale amiamia iniane.

¹⁵ Sakaliare, ku sasiakawlu belenge warututu ki Lute iya kai, “Kirimwa mailuku ki taelrelresu si tadrusa ka lalakesu ka ababai katwase kai! Amani lu kipaelre numi kai ki cekele kamudu.”

¹⁶ Ku Lute la kalrikilriki, ai ku Tamatama makalithi iniane, kwini tadrusa la malra bilibili iniane, ki taelrelreini si alrima ki tadrusa ka lalakeini ka ababai, iluku liniane katwase kwini ki cekele.

¹⁷ Sa mulatadrenga ki cekele, kudra tangea ka sasiakawlu belenge amia kai, “Katwasa mubere! Madha paswalrikulrikudru drele, la madha idrengedrengere ikai valrwalru. Lailadha mwa ka lregelrege anu kai pacai.”

^18-19 Ai ku Lute amia kai, “Tamatamali, madha piapia kai! Kikai kialibakesu si paralubunga nakwane, si palribulu kai niakeli, madha palailainga naiane mwadaili, kavai lregelrege adaailinga, alau lri kainaku darurwana kavai lai lri kelanga ku sapapacai, la lri kainaku udripinga.

²⁰ Wadrelesu kavai ki tikiyane ka cekele? Kai adaili twalai kai, ala nau mwa kavai. Drela, kavai vaeva yai tikiyane ka cekele, ala nau ikai kavai kipalakebe!”

²¹ Kwini lasu la tubalre, “Mathariri, palraingaku muswane, kainaku lri amudu kavai ki tikiyane ka cekele.

²² Kirarimwa lailai! Lu kaisu darurwana kavai kainaku lri pwalrimana!” La kamani ku pasi Zuare ki Lute kikwini cekele.

Takaamudane ki swa Sudume si swa Gumura

²³ Sa lrawlrau ku vai, ku Lute wadaruru ka Zuare.

²⁴ La pangitutuluku, ku Tamatama la arakai ku kwadaladalai ku balaru patwalai belenge gugu pwa ki cekele Sudume si Gumura.

²⁵ Ku Twaumase waamudunga kwini ki drusa ka cekele, palraelre kwini ki drataane, sanaka umawmase, si sanaka wacebeceebe ikai ki kadaengane.

²⁶ Ku taelrelre ki Lute la paswalrikudru drele, la aulrudru ka timu.

²⁷ Sakakaiyane ki mialrealre, ku Aberahame la kirariimu mwa kudra nataacegeceganeini icucubungu ki Tamatama.

²⁸ Kwini lasu la drele paswalebe Sudume si Gumura si palraelre kwini drataane, la drele kwini ki kadaengane twaebebebelre, mia ki ebelre ki talamalamane lu tudilrungu kaingananganai tuebebelre.

²⁹ Ai, ku Twaumase sa amudu kwini ki drataane si drusa ka cekele, ngwalringau ki Aberahame, lakamani ku palraingi paubere ki Lute.

Tatwaladhane ki swa Muabe si Amune

³⁰ Ku Lute mwakuludru ikai Zuare. La karedele ki tadrusa ka lalakeini taluela mulregelrege, ikai kai kwini ki barungulu.

³¹ Kwini takataka la pelaela ki agini iya kai, “Tarudrawdrangenga ka tamaita; kai kawmasane la kakadrwa ku sawvalai ku lri mwa mitane karudrange, si lri tulalaketa.

³² Abwala! Tamalra kai bava si pawngulu ki tamaita, la tamwa iniane apece, si patwalai iniane tulalake.”

³³ Kwini sakamaungu, la pawngulu ku bava ki tama lini, kwini takataka la mwa iniane tadrusa apece. Ku Lute mabusuku turamuru, ku tapiane kikai kadrwa ku tathingalane.

³⁴ Sakakaiyane, kwini takataka la pelaela ki agini iya kai, “Ku maungu tadrusaku ki tamaita apece; kaimaungu tamaalrana ku bava si pawngulu iniane, lasu mwa tadrusa iniane apece. Lu mia kikai, kusu si kwaku lri patwalaita ki tamaita tulalake.”

³⁵ Lakamani, kwini sakamaungu la pawngulunga ki Lute, kwini agiagi la mwa tadrusa apece iniane. Kwini lasu mabusukunga paramuru, ku tapiane kikai kadrwa ku tathingalane.

³⁶ Miyaiya kai, kikai tadrusa ka lalake ki Lute la tara twalai ki tama lini katawbaliri.

³⁷ Kwini takataka la tulalake ku vaeva ku sawvalai, la sunagane pasi Muabe; amani ku cucungulane ki swa Muabe ka umawmase kaikameane.

³⁸ Kwini agiagi la mialri tulalake ku vaeva ku sawvalai, la sunagane pasi Benami; amani ku cucungulane ki laumawmase ki swa Amune kaikameane.