Tabekacane 15 - Ngudradreadrekadhane Ka Sisiu 魯凱語聖經

Ku Twaumase kiaketekete ki Aberame

¹ Sangilribatenga kikai kwidra, ku Aberame yakai ki takipadrelaneini kilalra ki Tamatama iya kai iniane, “Aberame, madha mukuludru! Lri palakebaku muswane, baai muswane kwidra maadrau ku pakalreva.”

² Ai ku Aberame tubalre iya kai, “Abebeelengenga ka Tamatama! Kikai kadrwa ku lalakeli ku sawvalai, lu baaisu nakwane ku pakalreva manemane ku paluludane? Ku kathane ku lri mucungulu nakwane yai swa Damasekuse ka Ilriezere.

³ Kaisu wabaai nakwane ku lalakeli ku sawvalai, lakamani, kudra yakai naiyanane kitulalake kwidra tangeea ka duri lri kamani ku mwacungulu kai tacekecekelaneli.”

⁴ La pacungulu, la kilaalranga ki Tamatama iya kai iniane, “Kwini duri ka Ilriezere kai lri kamani ku mwacungulu muswane; kathane kwidra kalalakanesu ka sawvalai ku lrika patengatengane ka lri mucungulu muswane.”

⁵ Ku Tamatama la iluku iniane mulatadre, la iya kai iniane, “Ala masiasirara subelebelenge, thaininu kai latariau? Ku mwabaibalrithi muswane lri mia ki tariau ku kalrane!”

⁶ Ku Aberame masalru ki Tamatama, ku Tamatama la tumadringelrese iniane ka umawmase.

⁷ Ku Tamatama la peelanga iya kai iniane, “Tamatamaku, waililukaku muswane katwase kavai Babilunia ka Ure. Lri baadhaku kikai kadaengane muswane, ka amani ku lrika tacekecekelanesu.”

⁸ Ai ku Aberame kivagana, “Abebeelengenga ka Tamatama, lri tumanaku si thingale ala ka lri tara maalraku kikai kadaengane?”

⁹ Ku Tamatama la tubalre, “Kusu iluka ku vaeva ku taratulrunga ka caili ku tina ka lwange, si vaeva ku taratulrunga ka caili ku tina ka kiu, si taratulrunga ka caili ku balase ka nikiubawbalane ka kiu, si vaeva ka tavagu vaeva ka penai mwa kai nakwane.”

¹⁰ Ku Aberame la mailuku kikai lawaudriwdripi mucucubungu ki Tamatama, la malra nguvavaeva gelregelre paudrusa, la paececebe sarare tusipusale; ai kudra laadhadhame kai pawadrusa gelregelre.

¹¹ La kela lredepe mulebe ku lakwau, makitu ibelenge ki lanibutulane, ku Aberame la sisau kwini ki lakwau.

¹² Sa lriwlriwgu ku vai, ku Aberame la ererereke; la ikai ku matiukukuludru ku dradrimitane kela mwa iniane.

¹³ Ku Tamatama la iya kai iniane, “Tara thingaala, ku mwabaibalrithi muswane lri acaicali mwa ki maelane ka cekele, si lri kituduri ki umawmase, lai lri kitudreadrekase ki umawmase tara 400 ka caili.

¹⁴ Ai, lri tara pathavungaku kwidra twaduri liniane ka kuni; kwi lalasu lu katwase kikwini lri tara mailuku ku thathatha ku tacekecekelane katwase.

¹⁵ Ala kusu, lri kalragi kwi niakesu, si kasulivaliivate katwase kawmasane, sutelrai kidralreke.

¹⁶ Luka sakasupatenga ku mwabaibalrithi, ku lagaganesu ala lri maka dulru siwlriwlri mwa kikai; asi lwiyane lri mukalavaku lu suetenga ku pasalrivane ki swa Amuri, si kaika apikakwakwanenga kai pathavungu, ala lri pakatwasaku liniane.”

¹⁷ Sa lriwgunga ku vai si kadradrimitinga, la kiriimu ikai ku twaebebelre ku talabwane si kwadaladalai ku taliwlare. Ngukakai kabicelrakane kwini ki nipawvagadhane ka labeate.

¹⁸ Ku Tamatama la ikai kwini ki vai kiketekete ki Aberame iya kai, “Lri baadhaku kikai kadaengane ki mwabaibalrithi muswane, kikai kadaengane twalai ki kadravane ki swa Izipiti daruru kavai kadravane Yuparati,

¹⁹ paelre ki lakadaengane ki swa Keni, swa Kenizi, swa Kademuni,

²⁰ swa Hite, swa Perizi, swa Ripaime,

²¹ ki swa Amuri, swa Kanange, swa Giregasi si swa Yebuse.”