Tabekacane 13 - Ngudradreadrekadhane Ka Sisiu 魯凱語聖經

Ku Aberame si Lute mauvagai

¹ Ku Aberame mailuku ki taelrelreini si lamanemaneini patuelre katwase Izipiti, si papia tali dradha katwase, la mudaane tali lrawdru ka Kanange; ku Lute la mialri katwase tupapalra iniane.

² Ku Aberame amani ku satacekecekelane turamuru, piakai ku thathatha ku lanilapulapwane si lakingi gingi.

³ Sakabilrilinga la katwasenga kwini, si arwakaikaai papia tali dradha taluela, deethenga ka Bithele. Kai lasu siaulri mwa kwini kabicelrakane ki Bithele si Ai, ka amani kwidra nataikaiyaneini tudaane ku balrawbau, si sulasulai,

⁴ ka nataraedrane ku tapatarumaramarane; kwi lasu la ikai kwini sukubu ki Tamatama.

⁵ Kwini twapapalra ki Aberame ka Lute la mialri ikai ku lalwange, lakiu, si lawacekecekele si durini.

⁶ Kikai taidrusa ka wacekecekele sakakalranga turamuru ku lwange si kiu, kadrwanga ku kadaengane ku swaadrau ku amakakelretane ikai,

⁷ la ngwalai kikai kudra latarapagwagu ikai ki Aberame si Lute la kai telrai ku amakakalisiane. (Sakamani kwidra ku swa Kanange si swa Perizi yakaikaaiyana kwini.)

⁸ Ngwalai kwini, ku Aberame la iya kai ki Lute, “Padethaneanata turamuru, pikakwa makakalisi; kai taraagwagu muswane si taraagwagu nakwane la mialri pikakwa makakalisi.

⁹ Alata mauvagai! Kikai swadradraadrau kai kadaengane kai yacucubungu muswane, lu pilrisu ki tali vanale, nau pilri ki tali viri; lu pilrisu ki tali viri, nau pilri ki tali vanale.”

¹⁰ Ku Lute la masiasirare pangithalringulu, la drele kwini valrwalru Yuredange padaruru kavai sanaka drataane kwini Zuare; kikai dratane taaciladhane, mia ki Idingi ka mawivaivai, la mia ki kadaengane ka Izipiti; (sakamani kwidra ku Tamatama kaiyana waamudu kavai cekele Sudume si Gumura.)

¹¹ Ku Lute la pilri kwini valrwalru ka Yuredange ka dratane, la katwase taluela papia tali talrawane. Kwini tadrusa la pangimia kikai si mauvagai.

¹² Ku Aberame la ikai Kanange; ku Lute la ikai kwini ki cekele dratane valrwalru, si tudaane ku balrawbau ikai deethe Sudume.

¹³ Ku swa Sudume ngialisianenga turamuru, kai lalasu pakialringaunga pasalriu ki Tamatama.

Ku Aberame talwaela mu Hiburungu

¹⁴ Sa katwasenga ku Lute, ku Tamatama amia kai ki Aberame, “Kusu twaladha kwini ki taacegeceganesu la papia talrawane, talriwgane, tali lrawdru si tali dradha drele masiasirare.

¹⁵ Lri baadhaku muswane si lamwabaibalrithi muswane kikai sanaka pakelasu drele kai kadaengane palraelre; kikai kadaengane lrika numiane palralrawthu.

¹⁶ Lri paedhalaku ki lamwabaibalrithi muswane, ku pangalane kadrwa ku umawmase ku lri maka asipi; kai umawmase lu dulru asipi ki enai kai ki kadaengane lri maka asipi ki lamwabaibalrithi muswane.

¹⁷ Ngidrakaala! La katwasa dadavace alraelre kai ki kadaengane; lri baadhaku muswane.”

¹⁸ Ku Aberame la suburu si suragele kwini balrawbau, si taluela mu Hiburungu, ikai kwini ki adeethe ki tharialupu ka angatu ki Mamere; kwi lasu la ikai kwini pasikai ki Tamatama raedre ku taluvale ku tapatarumaramarane.