Tabekacane 12 - Ngudradreadrekadhane Ka Sisiu 魯凱語聖經

Ku Twaumase wadawlu ki Aberame

¹ Ku Tamatama amia kai ki Aberame, “Lri katwasesu ki cekelesu, laretesanesu, si daane ki tamasu, mwa kwidra ki pelaelali muswane kwidra kadaengane.

² Lri patapangalaku ku lalalake si lagaganesu; lai lri kamani ku maadrau ka kuni. Lri subulrubulrwaku muswane, lai lri kitwadrau kwini naganesu; lu ngimia kikai, ku umawmase lri ngwalai muswane si kibaai ku akaesadhane.

³ Ku swabulrubulru muswane, lri subulrubulrwaku iniane; ku wapusu muswane, lri pusuaku iniane. Lri pangukaiyaku muswane subulrubulru ki sanaka umawmase.”

⁴ Ku Aberame satara 75 ku caili, pasusu ku tapelaelane ki Tamatama katwase Harange; ku Lute la tupapalra iniane.

⁵ Ku Aberame wailuku ki taelrelreini ka Sarai, Lute ka lalake ki betakaneini si kwidra tacekecekelaneini ikai Harange si laduri makanaelre katwase papia Kanange. Kwini lalasu sa darurunga ka Kanange,

⁶ ku Aberame la pacungulu ku kadalranane lini, la kela Sekeme ka alrivilrivi ka taikaiyane, kwini adeethe kwidra ki tharialupu ka angatu Muri. (Sakamani kwidra ku swa Kanange yakaikaaiyana kwini.)

⁷ Ku Tamatama la adrelane ki Aberame, la iya kai iniane, “Lri baadhaku kikai kadaengane ki mwabaibalrithi muswane.” Ku Aberame la ikai kwini ki taadrelanane iniane ki Twaumase raedre cegecege ku taluvale ka tapatarumaramarane.

⁸ Sakabilrilane, la katwase papia tali lrawdru, mwa ka Bithele cekele tali talrawane lregelrege, kwini tali sapakalriwgu lregelrege mararaisi Bithele, ku tali talrawane adeethe Ai; kwi lasu yakai kwini tudaane ku tasuladhane, la raaedrenga ku taluvaale ku tapatarumaramarane, la sukubu ki Tamatama.

⁹ Sa kawlainga, la katwase aru papia tali lrawdru ka Kanange.

Ku Aberame wadaruru Izipiti

¹⁰ Kwini talikai Kanange la kipadradresenge ku silravane, ku tangimiane pakialringau turamuru. Ku Aberame la katwase papia tali lrawdru taluela, sa daruru ka Izipiti, lri padawdaalru ikai kwini.

¹¹ Kwi lalasu sa kela kwini ki pagiagisane, salri padaalrunga si kela ka Izipiti, ku Aberame la iya kai ki taelrelreini ka Sarai, “Kusu yai matharirisu kai tacebeanesu ka ababai,

¹² lu drele ku swa Izipiti muswane, taelrelre kikai ki lasu lri iya muswane, la lri ngwalai kai si papacai nakwane si paasuru muswane.

¹³ Lri pelaelasu liniane, kunaku agiaku kikai ki lasu lri iyasu, kwi lalasu lri ngwalai muswane si pacepe ki niakeli, la lri musakene nakwane.”

¹⁴ Sa lribate pagiagisane si mudaanenga Izipiti ku Aberame, ku swa Izipiti tengatengane drele kwini ki alisu ka mathariri turamuru ku tacebeane.

¹⁵ Yakai ku kiacapili ki daane ki talialalai ku wadrele ki alisu, la icucubungu ki talialalai lrigu ku tharirane ki alisu; kwi alisu la kiiluku mwa ki daane ki talialalai.

¹⁶ Ngwalai ki alisu, ku talialalai la pasudalru tubadhabadha ki Aberame, la baai iniane pakakaalra ku lwange, kiu, ruba, lrakeda si duri.

¹⁷ Ai ku talialalai, ngwalai ku tamalrane iluku ki taelrelre ki Aberame ka Sarai, ku Tamatama la pulebe ku amatikurwane si pamatikuru ki talialalai si yakai ki daane ki talialalai ku umawmase; kwini lalasu la makitu kipucaemane ku matiukuludru ku caemane.

¹⁸ Ku talialalai la dawlu ki Aberame, si kivaga iniane, “Asu pia kai nakwane? Asu kai pelaela nakwane ka taelrelresu kai ki alisu?

¹⁹ Agili asu iya iniane, la kirimwaku malra iniane sitaelrelre? Kawvai taelrelresu yakai kai, iluka iniane si katwase!”

²⁰ Ku talialalai la drekase kwini ki maecebe iniane ka sasiakawlu, pakatwasa ki Aberame kai ki cekele; kwini lalasu la malra iniane si taelrelreini, si lamanemaneini pailuku pakatwase.