Tabekacane 11 - Ngudradreadrekadhane Ka Sisiu 魯凱語聖經

Cakare Babilunia

¹ Sakapathagilane kai kawmasane taingeangeane ku vaga, kai laumawmase arakaikai ku taingeangeane ku vaga.

² Kai lalasu sa ikai tali talrawane acaicaicali wakela kwini dratane Babilunia, ikai kwini sutelrai cekecekele.

³ Kwini lalasu madrekadrekase, “Bwala! Tatulringiga, malra lama tukawlukulu kwini lringiga.” Kwini lalasu la kirimu pathagili arakai kwini lringiga raedre, la arakai ku kurutange raedre ki lringiga.

⁴ Kwini lalasu la iya kai, “Bwala, tapia ku vaeva ka cekele, ikai ki cekele lri ikai ku abeelenge ku cakare, ku abelengane lri daruru ki ememe subelebelenge, la tapakithingale kai lanaganeta, amani lu kipasivagavagaita sarau mwa kiinunga kai kawmasane.”

⁵ Sapia kwini, ala kela ku Tamatama mulebe, lri drele kikai ki laumawmase ku piyaiya lini ku cekele si abebelenge ka cakare.

⁶ La iya kai, “Kai lalasu maelrelre kavaevanga ka minzuku, la iya ku taingeangeane ku vaga; kikai yai pathagithagiliana, lu bibilrilinga kai lalasu lri singikaainga ku nau pia iya lini.

⁷ Bwala! Ta mulebe pakalrithavulu ki vaga lini, lani kai maka mathingathingale lu makawrivariva kai lalasu.”

⁸ Ku Tamatama la malra liniane pasivagavagai pasarau mwa kiinunga kai kawmasane; kai lalasu la isaadranga ku kauawngu lini tucekele.

⁹ Lakamani kikai cekele ku kipasi cakare Babilunia; asi lwiyane ku Tamatama yakai kwini pakalrithavulu ku vaga ki laumawmase, si pasivagavagai pasarau liniane mwa kiinunga kai kawmasane.

Mwabaibalrithi ki Seme

¹⁰ Kikai lebe amani ku mwabaibalrithi ki Seme. Sa taradrusanga ka caili ku tangilribatane ki telebe, sa taraidai ku caili ki Seme twalalake ki Arepakesade.

¹¹ La panianiakeana tara 500 ka caili, si tulalalaalakeana.

¹² Ku Arepakesade satara 35 ku cailini twalalake ki Sela,

¹³ la panianiakeana tara 403 ka caili, si tulalalaalakeana.

¹⁴ Ku Sela sa taramatulrulu ku cailini twalalake ki Ibere,

¹⁵ la panianiakeana tara 403 ka caili, si tulalalaalakeana.

¹⁶ Ku Ibere satara 34 ku cailini twalalake ki Pelege,

¹⁷ la panianiakeana tara 430 ka caili, si tulalalaalakeana.

¹⁸ Ku Pelege sa taramatulrulu ku cailini twalalake ki Reu;

¹⁹ la panianiakeana tara 209 ka caili, si tulalalaalakeana.

²⁰ Ku Reu satara 32 ku cailini twalalake ki Seruge,

²¹ la panianiakeana tara 207 ka caili, si tulalalaalakeana.

²² Ku Seruge sa taramatulrulu ku cailini twalalake ki Nahure,

²³ la panianiakeana tara 200 ka caili, si tulalalaalakeana.

²⁴ Ku Nahure satara 29 ku cailini twalalake ki Tera,

²⁵ la panianiakeana tara 119 ka caili, si tulalalaalakeana.

²⁶ Ku Tera sa icengecenge taramapitulu ku cailini, twalalakeenga ki Aberame, Nahure si Harange.

Mwabaibalrithi ki Tera

²⁷ Kikai lebe amani ku mwabaibalrithi ki Tera. Ku Tera twalalake ki Aberame, Nahure si Harange. Ku Harange twalalake ki Lute.

²⁸ Ku Harange sa pacai ikai ki cekeleini ka Babilunia ka Ure, ku tamaini ka Tera yakaaiyana panianianiake.

²⁹ Ku Aberame la karudrange mwa ki Sarai; ku Nahure la karudrange mwa ki Mileka ka lalake ki Nahure; ku Harange mialri ka tama ki Iseka.

³⁰ Ku Sarai kai maka twalalake, la kakadrwa ku lalake.

³¹ Ku Tera wailuku ki lalakeini ka Aberame, kwi aganeini ka lalake ki Harange ka Lute si kiathareve ka taelrelre ki Aberame ka Sarai matwase kwini ki cekele Babilunia ka cekele Ure, papia talikai Kanange. Kwini lalasu sa kelanga ka Harange, la ikainga kwini sutelrai cekecekele.

³² Ku Tera satara 205 ka caili la pacai ikai Harange.