Tabekacane 1 - Ngudradreadrekadhane Ka Sisiu 魯凱語聖經

Tabekacane ki Twaumase

¹ Sakapathagilane, ku Twaumase sa pathagili bekace kai subelebelenge si kawmasane.

² Kai kawmasane kadrwana ku manemanemane, kaiyana ngiadarepe. Madradrimitiana palraelre; ku Ri ki Twaumase ngiavelevelevele ikai belenge ki acilai.

³ Ku Twaumase la drekase, “Lri ikai ku ledra.” Ku ledra la utaluvaivai.

⁴ Ku Twaumase sa drele ki ledra laka mathariri, la malra pauvagai ki ledra si dradrimitane,

⁵ “Vaiyane” la iya ki ledra, “Maungu” la iya ki dradrimitane. La ngilribate kwini maungu, si kela ku mialrealre; kikai yai amani ku aswalalanga ka vai.

^6-7 Ku Twaumase la pela drekase, “Ikai kai ki laacilai lri ikai ku subelebelenge, la malra apauvagai ki acilai ibelenge si ilebe.” Kikai patuelre la singikai ki drekaseini tulrepenge. Ku Twaumase la bekacenga subelebelenge, si malra ki acilai apauvagai ibelenge si ilebe.

⁸ La sunagane subelebelenge “Belenge” iya. La ngilribate kwini maungu, si kela ku mialrealre; kikai yai samaka pusale.

⁹ Ku Twaumase la pela drekase, “Kai lebe kai acilai lri yelrelre, lai lri mutaluvaivai ku kadaengane.” Kikai patuelre la singikai ki drekaseini tulrepenge.

¹⁰ Ku Twaumase la sunagane ki kadaengane “Daedae” iya, kwidra ki yaelrelre ka acilai “Laveke” la iya, ku Twaumase la drele ki daedae si laveke ka mathariri.

¹¹ La pacungulu, ku Twaumase drekase, “Kai kadaengane lri cebe ku makaelaela ku wacebecebe, yakai ku lataleke, yakai ku lapwamadrumadru.” Kikai patuelre la singikai ki drekaseini tulrepenge.

¹² Kai kadaengane la cebenga ku makaelaela ku wacebecebe, yakai ku lataleke, yakai ku lapwamadrumadru. Ku Twaumase sa drele kikai lawacebecebe laka mathariri.

¹³ La ngilribate ku maungu, si kela ku mialrealre; kikai yai samaka tulrulu.

¹⁴ Ku Twaumase la pela drekase, “Kai subelebelenge lri ikai ku kinawmasane ki ledra si apatatukudha ki vaiyane si maungu, la lri kamani ka sapatuthingalane ki caili si vai si kalamanemanane,

¹⁵ lai lri ikai subelebelenge ledra si paledra ki kadaengane.” Kikai patuelre la singikai ki drekaseini tulrepenge.

¹⁶ Ku Twaumase ala bekace ku drusa ku maadrau ku kinawmasane ki ledra: Ku vai marasiakai ki vaiyane; ku dramare marasiakai ki maungu. Ku Twaumase la bekace ki latariau.

¹⁷ Ku Twaumase la malra kikai lawaledra pikai subelebelenge, pakai ku apaledrane kai ki kadaengane,

¹⁸ marasiakai ki vaiyane si maungu, pauvagai ki ledra si dradrimitane. Ku Twaumase sa drele ki ledra laka mathariri.

¹⁹ Ngialribate ku maungu, la kela ku mialrealre; Kikai samaka supatele.

²⁰ Ku Twaumase la drekase, “Kai acilai adringi lri edhale ku makaelaela ku waudriwdripi; kai belenge lri ikai ku makaelaela ku ngiapapapalai ku laadhadhame.”

²¹ Ku Twaumase la bekace ku maadrau ka waudriwdripi ikai laveke, si ku yakai ki acilai ku makaelaela ku waudriwdripi, si ngwababelenge ku makaelaela ku laadhadhame. Ku Twaumase sa drele kikai ki lawaudriwdripi laka mathariri.

²² Ku Twaumase la subulrubulru kikai ki lawaudriwdripi, paedhale ki lakange ikai ki laveke, arupadrimadrima ki adhadhame ikai ki daedae.

²³ Ngialribate ku maungu, la kela ku mialrealre; kikai samaka lrimale.

²⁴ Ku Twaumase la pela drekase, “Kai kadaengane lri edhale ku makaelaela ku waudriwdripi: Nilapulapwane, bulabulai, wagulagulai.” Kikai patuelre la singikai ki drekaseini tulrepenge.

²⁵ Ku Twaumase la bekace sanaka manemane ka waudriwdripi ikai kai ki kadaengane. Ku Twaumase sa drele kikai lawaudriwdripi laka mathariri.

²⁶ La pacungulu ku Twaumase iya kai, “Lri singikaita kai tangimiamianeta, si bekace ku umawmase, lani kamani ku marasiakai ki lakange, laadhadhame, si sanaka nilapulapwane si lawagulagulai ka makaelaela ka waudriwdripi si yakawmasane patuelre.”

²⁷ Ku Twaumase la ngipapatwalrau bekace tuumawmase. La kathi liniane, yakai ku sawvalai, yakai ku ababai.

²⁸ Ku Twaumase la subulrubulru liniane, iya kai, “Lri tulalake numi tuthathatha, ku mwabaibalrithi numiane lai lri suete kai kawmasane, si gemegeme kai ki kadaengane. Lri pamarasikaiyaku numiane ki lakange, laadhadhame, si sanaka waudriwdripi.

²⁹ Lri patarumaraku kai lataleke si lapwamadrumadru ku lrika akanekaneane numi.

³⁰ Ai, kai lawaudriwdripi si adhadhame patuelre, lri pakanaku liniane kai ubulu si lalacenge.” Kikai patuelre la singikai ku drekaseini tulrepenge.

³¹ Ku Twaumase sa drele ku bekaceini patueelre laka mathariri turamuru. Ngialribate ku maungu, la kela ku mialrealre; kikai yai samaka nemele.