Taasipane 9 - Ngudradreadrekadhane Ka Sisiu 魯凱語聖經

Mwasaka drusa ka lrisi ki Takilragavane

¹ Saka mwasakadrusa ki caili kwini ki aswalalanga ki dramare ku takatwasane ka Izipiti ki swa Iseraylri, ku Tamatama yakai calragulragu Sinai si kawriva ki Musi,

^2-3 “Ki saka 14 ki vai kai ki dramare kai, twalai lu lriwgunga ku vai, ku swa Iseraylri lri pasusu patuelre ku nikelretane si nitukakudhanane ki Takilragavane ka lrisi.”

⁴ Ku Musi la cunu ki mapapangale pasusu ki Takilragavane ka lrisi.

⁵ Luka miauawawbu ki saka 14 ki aswalaalanga ki dramare, kwini lalasu yakai calragulragu Sinai pasusu ki Takilragavane ka lrisi. Ku drekase ki Tamatama ki Musi ka vaga, ku mapapangale lri pasusu nguvavaeeva.

⁶ Ai, yakai ku tapia ku ngwalai ku tasucipavane ki wapacai la kaika mabula, kai lri maka ikai kwini ki vai kipaelre ki Takilragavane ka lrisi. Kwini lalasu la mwa ki Musi si Arungu,

⁷ si iya kai, “Ngwalai sa sucipau nai ki wapacai ki kinawmasane si kaikabula; ai asi kai palraingi naiane pakaredele ki drumane ka swa Iseraylri taelre ikai kwini ki nikelretane ka vai patarumara ku sapatarumarane baai ki Tamatama?”

⁸ Ku Musi la tubalre, “Kunumi ikaiya kai mukalavana padaalru, nau dredreleana luka manemane ku cunu ki Tamatama.”

⁹ Ku Tamatama wacunu ki Musi,

¹⁰ kawriva ki swa Iseraylri, “Kunumi si lagagane numi alaiyasi ikai ku ngwalai ku tasucipavane ki wapacai ka kinawmasane si kaika mabula, ku mwa adaili mubabadhane, lri tara tulrisisi ki Takilragavane ka lrisi usakene ki Tamatama.

¹¹ Ku miyaiya kikai ku umawmase lri maka paru adailane ku tara dramare, lri ikai kwini ki sakadrusa ki dramare 14 ki vai lukamaungu tulrisisi. Lri arakai ku kaika nipawsemakane ka pange si mapalili ka lacenge tulrisisi,

¹² ai kudra tedrane ku akaneane madha pakela ki mialrealre ki kaiyane; madha celracelra ku culrale ki nilapulapwane. Tara singikaiya sanaka kakudhane tulrisisi ki Takilragavane ka lrisi.

¹³ Ai, lwiyasi ikai ku mabula ku umawmase, lakai mulatadre mubabadhane, la kai tulrisisi ki Takilragavane ka lrisi, kwini lasu lri kaika kawkawluli, asi lwiyane kwini lasu kai yakai kwini ki takelretane ka vai patarumara nakwane. Kwini lasu lri tara siamece ku pasalrivaneini.

¹⁴ “Alaiyasi kudra yakai numiane ku singibadhane ku umawmase la tulrisisi ki Takilragavane ka lrisi usakene ki Tamatama, kwini lasu lri tara pasusu nguelre sanaka nikelretane si kakudhane. Adravane ka swakai tini ku badhabadha, lri makitu pasusu ku thadalrane ka hulrice.”

Kwakulavane ka ememe

^15-16 Ikai kwini ki vai saka tacegecegane ku Alrivilrivi ka balrawbau ki Tamatama, yakai ku vaeva ku kwakulavane ka ememe wakabungu ki Alrivilrivi ka balrawbau. Luka maungu, kikai kwakulavane ka ememe lu drelane mia ki apwi.

¹⁷ Lu katwase arwa belenge, ku swa Iseraylri mwasuburu ku tasuladhane lini si katwase mukadalranane; lu kainganai mulebe ikai inu, kwini lalasu yakai kwini tutasuladhane.

¹⁸ Ku mapapangale singiakaai ku drekase ki Tamatama musuburu ku tasuladhane, la mialri singiakaai ku drekase ki Tamatama tutasuladhane. Ku ememe lu tara thainu ku taidrengerane ikai taibelenge ki Alrivilrivi ka balrawbau, kwini lalasu tara thainu ikai ki tasuladhane.

¹⁹ Ku ememe lu kawlai ku taidrengerane itaibelenge ki Alrivilrivi ka balrawbau, kwini lalasu kialalra ku drekase ki Tamatama, si kai talula.

²⁰ Yakai lu idrengere ku ememe ikai belenge ki Alrivilrivi ka balrawbau maka piapiale. Kai wasusu ku takangitwatumanane, kwini lalasu pasusu ku drekase ki Tamatama si musuburu ku tasuladhane, la cegecege ku tasuladhane.

²¹ Yakai lu idrengere imauawngane kwini ememe, luka mialrealre la ubelenge. Sana mubelenge, kwini lalasu ngiavelevele mukadalranane.

²² Adravane ka maka pwapusale, tara dradraamare, tara caili luka mawlawlai ku vai, sana idrengere ku ememe ibelenge ki Alrivilrivi ka balrawbau, kwini lalasu kai ngiavelevele; sana mubelenge ku ememe, kwini lalasu mwa kadalranane.

²³ Kwini lalasu lu tutasuladhane lu musuburu ku tasuladhane makitwa pasusu ku pangukai ki Tamatama ki Musi ku drekase ka vaga si pangimia.