Taasipane 8 - Ngudradreadrekadhane Ka Sisiu 魯凱語聖經

Pacegecege ku pitu ku tinaki

¹ Ku Tamatama kawariva ki Musi,

² “Kusu pelaela ki Arungu, lu paacegecege ku pitu ku tinaki ani papia cucubungu ku tapaledrane.”

³ Ku Arungu la pasusu ku tadrekasane, si malra kwini tinaki papia ki cucubungu ki tapikaikaiyane ki tinaki.

⁴ Kwini tapikaikaiyane ki tinaki, twalai belenge pakela ki lebe, niarakaiyane ku kingi darepe patuelre, singikai ku tapelaelane ki Tamatama ki Musi tungimiyaiya darepe.

Lrisi ki akabulane si apatarumarane ki swa Lrivi

⁵ Ku Tamatama kawariva ki Musi,

⁶ kusu malra patatukudha ki swa Lrivi si drumane ka swa Iseraylri,

⁷ pangimia kai lebe ka kakudhane bula liniane: Arakaiya kudra mabula ka acilai ubu ki kinawmasane lini, la pangikakiriti palraelre ki kinawmasane lini pakabula, la sinau pakabula ku laimai. Lumia kikai, kwini lalasu ikai ki lrisi kiatumabulanga.

⁸ Kwini lalasu lri iluku ku vaeva ku lrulai ka sawvalai ka lwange, si atara patarumarane ka Taleke ka lrisi, ka amani kudra nithalreanenga apaelre ki milrikinku si abera ki ulrive, lai lri ilukwanasu ku vaeva ka lrulai ka lwange; tu Balrithane ki pasalrivane ka lrisi.

⁹ Kusu ala lri sarubusu patuelre ki swa Iseraylri, si paacegecege ki swa Lrivi cucubungu ki Alrivilrivi ka balrawbau.

¹⁰ Ku swa Iseraylri lri malra ku alrima lini pwa ki awlru ki swa Lrivi;

¹¹ ku Arungu lri malra ki swa Lrivi si patarumara nakwane, tunipawkalrivilane ka saceacebe ki swa Iseraylri. Lumia kikai, kwini lalasu ala lri maka dulru kipuawngane ku awnganeli.

¹² Ku swa Lrivi lri ansu pikai belenge ki awlru ki drusa ka sawvalai ka lwange; ku vaeva lri tu Balrithane ki pasalrivane ka lrisi, ku vaeva lri tu Lama ka lrisi, si patarumara ki Tamatama, pakai ku apasikaiyane ki swa Lrivi ka lrisi ki kiapakabula.

¹³ “Kusu malra ki swa Lrivi tunipawkalrivilane ka acebe si patarumara nakwane, la pakadrenge ki Arungu si lalalakeini kwini ki lalasu.

¹⁴ Kusu pangimia kikai patatukudha ki swa Lrivi si drumane ka swa Iseraylri, lani ka swakainga nakwane.

¹⁵ Kusu lu pakabulangasu ki swa Lrivi si patarumaranga nakwane, kwini lalasu lri maka dulrunga ikai ki Alrivilrivi ka balrawbau marasikai ki awngane.

¹⁶ Peaelaelanga naku, kwini lalasu lri ubalrithi ku taetalane ki tinutakane ki swa Iseraylri; kwini lalasu lrika nakwane tangeangeea.

¹⁷ Sa papacadhaku kwini ki aswalalanga kitulalake ki swa Izipiti sakavai kwini, nipatatukudhaneenga tusaniange ka takatakanga ki dadadaane ki swa Iseraylri si kwini aswalaalanga kitulalake ka lanilapulapwane lrika tali nakwanenga.

¹⁸ Kikai asasane lri malraku ki swa Lrivi apatukamani ki takataakanga ki swa Iseraylri makanaelre.

¹⁹ Wasikawlaku ki swa Lrivi si baai ki Arungu si lalalakeini, tusaceacebe ki swa Iseraylri, lri pasikai ki swa Iseraylri kipuawngane ikai ki Alrivilrivi ka balrawbau si pasikai liniane patarumara ku Balrithane ki pasalrivane ka lrisi, amani lu ngudadethe ki Alrivilrivi ka taikaikaiyane si dawlu ku akipamatikurwane.”

²⁰ Ku Musi, Arungu si mapapangale makanaelre ki swa Iseraylri pasusu ku vaga ka drekase ki Tamatama ki Musi si malra ki swa Lrivi patarumara.

²¹ Ku swa Lrivi ngiababulanga, si sinau ku laimai lini; ku Arungu la malra liniane tunipawkalrivilane ka acebe si baai patarumara ki Tamatama, la mialri pasikai liniane patarumara ku Balrithane ki pasalrivane ka lrisi bula liniane.

²² Ku ngwakai ki swa Lrivi, ku mapapangale pasusu ku drekase ki Tamatama ki Musi nguvavaeva pasusunga. Lumia kikai, ku Lrivi lri dulru ikai ki tasangilukane ki Arungu si lalalakeini, pangimia ku awngane ki Alrivilrivi ka balrawbau.

²³ Ku Tamatama kawariva ki Musi,

²⁴ “Sanaka tara 25 ku cailini ku swa Lrivi lri ikai ki Alrivilrivi ka balrawbau kipuawngane,

²⁵ lu kelanga ki taramalrimale ku caili lri palikainga ku awngane si isadra.

²⁶ Ki bilrilanenga kwini lasu lri dulru ikai ki Alrivilrivi ka balrawbau paraluralubu ki papalraini, ai kai lri maka ngikakamani tangeangeea kipuawngane. Lri pangimiasu kikai apavavala pakaungu ki swa Lrivi.”