Taasipane 7 - Ngudradreadrekadhane Ka Sisiu 魯凱語聖經

Ku Tamatama ki lazuku patarwamara

¹ Ku Musi ikai kwini ki tamaka cegecegane ku Alrivilrivi ka balrawbau ki Tamatama, lri arakai ku mabula ka lawlau sakidri ki Alrivilrivi ka balrawbau si lawbubulu, tapatarumaramarane si nipatupalrapalrane ka lamanemane, si malra patarumara ki Tamatama.

² Ku tarasangililuku ki lazuku ki swa Iseraylri, ka amani kwini tamatama ki lazuku, mialri ka amani ku marasiakai ki apakipacasane ki umawmase,

³ mailuku ku laacebe lini, patarumara ki Tamatama; yakai ku eneme ku palridingi, 12 ku sawvalai ku lwange. Kwini tadrusadrusa ka kiacapili patarwamara ku vaeva ku palridingi, kwini tangeea ka kiacapili paka vaeva ku sawvalai ku lwange patarumara. Kwini lalasu samaka patarumaranga kilakikai,

⁴ ku Tamatama kawariva ki Musi,

⁵ “Malra tarumara kikai lamanemane tusaarakaikaiyane ki Alrivilrivi ka balrawbau, si singikai ku akipuawnganane ki swa Lrivi pavalavala liniane.”

⁶ Ku Musi la malra kwini lapalridingi si lalwange si baai ki swa Lrivi.

⁷ Wabaai ki lagagane ki Geresune paka drusa ku palridingi, si supate ku lwange,

⁸ wabaai ki lagagane ki Mirari paka supate ku palridingi, paka valru ku lwange. Kwini lalasu lri ikai ki tasangilukane ki lalake ki Arungu ka Ithamare kipuawngane.

⁹ Ku Musi kai wabaai ki lagagane ki Kuhathe ku palridingi si lwange, asi lwiyane kwini adrangalrwane lini kwini saniange ka lawbubulu lri tara angeale bulri.

¹⁰ Kwini lakiacapili mialri iluku ku acebe ki atulrisisiane ki tapatarumarane ki tapatarumaramarane. Kwini lalasu lu maka padulrunga kwini acebe si malranga pwa ki tapatarumaramarane,

¹¹ ku Tamatama kawariva ki Musi, “Kusu pelaela liniane, ikai ki 12 ka vai, ki vaivaai lri tara ikaai ku tangea ku kiacapili ku pasiakai ki atulrisisiane ki tapatarumaramarane si patarumara ku acebe.”

^12-83 Kwini lalasu singiakai ku tamasakaikaiyane la patarumara ku acebe lini. Aswalalanga ka vai, kiacapili ki swa Yuda ka lalake ki Aminadabe ka Nahasunge ka lri patarumara. Samaka pusale ka vai, kiacapili ki swa Isakare ka lalake ki Zuare ka Nathaneile ka lri patarumara. Samaka tulrulu ka vai, kiacapili ki swa Zibulungu ka lalake ki Hilungu ka Ilriabe ka lri patarumara. Samaka supatele ka vai, kiacapili ki swa Riwbingi ka lalake ki Sidiure ka Ilrizure ka lri patarumara. Samaka lrimale ka vai, kiacapili ki swa Simiune ka lalake ki Zurisadai ka Silumile ka lri patarumara. Samaka eneme ka vai, kiacapili ki swa Gade ka lalake ki Diule ka Ilriasape ka lri patarumara. Samaka pitu ka vai, kiacapili ki swa Iparaime ka lalake ki Amihude ka Ilrisama ka lri patarumara. Samaka valru ka vai, kiacapili ki swa Manase ka lalake ki Pidazure ka Gamalile ka lri patarumara. Samaka bangate ka vai, kiacapili ki swa Biniyamingi ka lalake ki Gidiuni ka Abidange ka lri patarumara. Samaka mangeale ka vai, kiacapili ki swa Dange ka lalake ki Amisadai ka Ahiezere ka lri patarumara. Samaka 11 ka vai, kiacapili ki swa Asere ka lalake ki Ukerange ka Pagiele ka lri patarumara. Samaka 12 ka vai, kiacapili ki swa Napetali ka lalake ki Inane ka Ahira ka lri patarumara. Kwini lakiacapili thadalrane maramaramau ku acebe lini: Vaeva ku gingi ka usara, ku telregane 1.5 ka kukingi, vaeva ku gingi ka kisi, ku telregane 800 ka kunke, makitu singiakai ku takelretane ki Alrivilrivi ka taikaikaiyane, la pasaela sueteane ku nipaibwane ki lawlau ku malaelamenge ka milrikinku tu Taleke ka lrisi; vaeva ku kingi ka usara, ku telregane 110 ka kunke, paswaete ku taliane; vaeva ku lrulai ka sawvalai ka lwange, vaeva ku balase ka nikiubawbalane ka kiu, vaeva ku taracailinga ka lrulai ka balase ka kiu tu Lama ka lrisi; vaeva ku sawvalai ka kiu tu Balrithane ki pasalrivane ka lrisi; drusa ku sawvalai ka lwange, lrima ku balase ka nikiubawbalane ka kiu, lrima ku balase ka kiu, lrima ku taracailinga ka balase ka kiu tu Sulivatane ka lrisi.

^84-88 Kwini ta 12 ka kiacapili ku nipatarumarane ku saceacebe pasikai ki atulrisisiane ki tapatarumaramarane lu paelrelreeane ku acebe amani kikai lebe: 12 ku gingi ka usara si gingi ka kisi, ku telregane 27.6 ka kukingi. 12 ku kingi ka usara, ku telregane 1.32 ka kukingi, lai lri pasuete ku taliane patuelre. 12 ku sawvalai ku lwange, 12 ku balase ka nikiubawbalane ka kiu, 12 ku taracailinga ku lrulai ka kiu, si nipakaredelane patarumara ka Taleke ka lrisi tu Lama ka lrisi. 12 ku balase ka kiu tu Balrithane ki pasalrivane ka lrisi. 24 ku sawvalai ka lwange, manemele ku balase ka nikiubawbalane ka kiu, laka manemele ku balase ka kiu, manemele ku taracailinga ku lrulai ka balase ka kiu tu Sulivatane ka lrisi.

⁸⁹ Ku Musi mwa daane ki balrawbau, salri kawriva ki Tamatama yai, kwi lasu kialalra ki Tamatama twalai ki sacaebane ki Langiane, ku twalai ki kabicelrakane ki Kirubime, kawriva iniane.