Taasipane 6 - Ngudradreadrekadhane Ka Sisiu 魯凱語聖經

Kakudhane ki ngipapatarumara baai ki Twaumase

¹ Ku Tamatama wadrekase ki Musi

² malra kikai lebe ka nipelaelane si pelaela ki swa Iseraylri. Adravane ka sawvalai ka ababai, alaiyasi puvaga ku ngiapapatarumara baai ki Twaumase, lri ngipapatarumara ki Tamatama,

³ lri tara isadra ki labava. Kwini lasu lai lri kai maka ungulu ku laesebe ki budu, kai lri maka kane ku budu si nirudamane ka budu.

⁴ Lu icengecengeana ngipapatarumara baai ki Twaumase, kai lri maka kane sanaka yabelenge ki cebe ki budu, adravane ka berathe si ngicu ki budu.

⁵ Ikai ki tangipapatarumaraneini baai ki Twaumase, kwini lasu kai lri kigulrugulru; kia ruthuku ngwalai ki tapuvaganeini, ikai kwini ki tapatarumaraneini ki Tamatama, lri elrenge pakaelrenge ku isiuini.

^6-7 Kwini isiuini amani ku sapatuthingalane ka ngiapapatarumara baai ki Twaumase. Kwini lasu kai lri maka sucipau ki wapacai, si ngikakudrulru, adravane ka tamaini, tinaini, betakane ka sawvalai ku ababai, kwini lasu mialri kai lri maka ngudadeethe.

⁸ Ikai kwini ki tangipapatarumaraneini baai ki Twaumase, kwini lasu kiatusaniange si baai ki Tamatama.

⁹ Lwiyasi kwini yakai thili ki ngipapatarumara baai ki Twaumase la kirimu pangitutuluku pacai, ngwalai kwini ku kiatusaniange ka isiuini la kikudrulru, kwini lasu lri mukalava makapitulu ku vai, ala lri kigulrugulru, kungisingisi. Lu mia kikai, kwini lasu ikai ki lrisi mabulanga.

¹⁰ Luka samakavalrulu, kwini lasu lri iluku ku drusa ku tavagu ku penai, mucucubungu ki lrawlrawdru ki Alrivilrivi ka balrawbau ki Tamatama, si baai ki barakalai.

¹¹ Ku barakalai lri patarumara ku Balrithane ki pasalrivane ka lrisi, ku vaeva lri tu Lama ka lrisi, si pasikai iniane marasikai ku lrisi ki pakabula, asi lwiyane amani sa kirecenge ki wapacai kwini lasu. Kwini ki vai, kwini lasu lri tupela kitusaniange kwini isiuini,

¹² lri tupela ngipapatarumara ku tangipapatarumaraneini baai ki Twaumase; kwini siaswalane ku vai kai kia paasipinga, amani sa kipakakudrulru kwini nakiatumabula ka isiuini. Lri iluku ku vaeva ku taracailinga ku lrulai ka balase ka kiu tu Samupasalrivanane ka lrisi.

¹³ Lu pawkesanga ku vai ki tangipapatarumaraneini baai ki Twaumase, lri pangimia kai lebe kai lrisi. Kwini lasu lri mwa ki lrawlrawdru ki Alrivilrivi ka balrawbau,

¹⁴ malra ku tulru ku mwadringadringai ku nilapulapwane patarumara ki Tamatama: Ku vaeva ka taracailinga ka lrulai ka balase ka kiu tu Lama ka lrisi, ku vaeva ka taracailinga ka lrulai ka tina ka kiu tu Balrithane ki pasalrivane ka lrisi, ku vaeva ka balase ka nikiubawbalane ka kiu tu Sulivatane ka lrisi.

¹⁵ Kwini lasu lri mialri patarumara ku akuvaeva ki cepenge ku kaika nipawsemakane ka pange: Yakai ku nipaibwane ki malaelamenge ka milrikinku si lawlau ki ulrive ka makudremelre ka pange si nisakidrane ku lawlau ki ulrive ka malubiiri ka pange, la lri patarumara ku Taleke ka lrisi si Paralikiliki ka lrisi.

¹⁶ Ku barakalai lri malra kikai lamanemane patarumara ki Tamatama, lri patarumara ku Balrithane ki pasalrivane ka lrisi si Lama ka lrisi.

¹⁷ Kwini lasu lri malra kwini balase ka nikiubawbalane ka kiu tu Sulivatane ka lrisi patarumara ki Tamatama, lai pakaredele patarumara kwini yacepengane ka kaika nipawsemakane ka pange. Lai lri mialri patarumara ku Taleke ka lrisi si Paralikiliki ka lrisi.

¹⁸ Kwini ngipapatarumara baai ki Twaumase lri ikai ki lrawlrawdru ki Alrivilrivi ka balrawbau kigulrugulru, la malra kwini isiu pwa ki Sulivatane ka lrisi ka apwi lama.

¹⁹ Ku barakalai ala lri malra ku nitumaduanenga ku vaeva ku sapwalra ki balase ka nikiubawbalane ka kiu si vaeva ku pange ku yacepengane, vaeva ku malubiri ka pange pwa ki alrima ki ngiapapatarumara baai ki Twaumase.

²⁰ La pacungulu ku barakalai lri malra kwini si tunipawkalrivilane ka sapatarumarane baai ki Tamatama; kwini amani ku abaadhane ki barakalai ka saniange ka lamanemane. Kai ka kathane kikai, ku tinukakudhanane wakelrete kwini tuku ki balase ka nikiubawbalane ka kiu si vagisi lri ka barakalaadhane. Ala lu ngilribatenga kikai kwini ngiapapatarumara baai ki Twaumase ala lri maka ungulu ku bava.

²¹ Kikai belenge amani ku ngiapapatarumara baai ki Twaumase. Kwini ngiapapatarumara baai ki Twaumase la ikai ku puvagaini ku apatarumarane ka kaika kiapaelre ki ngwakai kikai, lri tara pangimia kwini palraingini.

Sasubulrubulrwane ki barakalai

²² Ku Tamatama wadrekase ki Musi,

²³ cuna ki Arungu si lalalakeini arakaiya kikai lebe ka lavaga subulrubulru ki swa Iseraylri:

²⁴ Ku Tamatama ani subulrubulru muswane, palakebe muswane;

²⁵ Ku Tamatama ani arakai ku thalradhane marasikai muswane, pakaesai muswane.

²⁶ Ku Tamatama ani drangalrungalru muswane, si baai ku sulivatane muswane.

²⁷ Ku Tamatama kawariva, “Lwiyasi kwini lalasu la pangukai ki naganeli subulrubulru ki swa Iseraylri, lri tara subulrubulrwaku liniane.”