Taasipane 5 - Ngudradreadrekadhane Ka Sisiu 魯凱語聖經

Kai ka mabula ka umawmase

¹ Ku Tamatama kawariva ki Musi,

² “Kusu drekasa ki swa Iseraylri, malra kwini ki maraibiu, siaeraeraerai, wasulrape ki wapacai ka kaika mabula ka umawmase si pakatwase pulatadre ki tasuladhane.

³ Malra kwini sanaka kaika mabula ki lrisi pakatwase pulatadre, kwini lalasu lani kai kudrulru ki tasuladhane, kwini ki taikaiyaneli.”

⁴ Ku swa Iseraylri la pasusu ku drekase, la malra ki miyaiya kai ku umawmase pakatwase pulatadre ki tasuladhane.

Wacugu

⁵ Ku Tamatama peaelaela ki Musi,

⁶ pasuswa iya ki swa Iseraylri kikai lebe kai nipelaelane: Lwiyasi ikai ku kai singiakai ki Tamatama, la pasamali pasalriu kwidra ki aneane;

⁷ kwini lasu lri tara ngipapelaela ku pasalrivaneini, malra kwini pawlisini patuelre sawlri baai ki sanaka pasalriuini ka umawmase, lalri padrimana ku drumaneana ku vaeva ki nipau lrimane.

⁸ Alaiyasi kwini umawmase la pacainga, laka kadrwa ku padethane ku lritudrane kulri tarumara kwini sacugane, kwini lasu lri malra ku paisu si patarumara ki Tamatama, lri baai tusaarakaiyane ki barakalai. Kikai sacugane amani ku apadrimaneana kwini ki nikelretanenga ikai ki lrisi ka saarakaiyane ka balrithane ki pasalrivane ka kiu.

⁹ Kwini tangeea ka swa Iseraylri ku nipawkalrivilane patarumara ki Tamatama lri ka abadhane kwini ki pasiakai liniane patarumara ki barakalai.

¹⁰ Sanaka barakalai lri malra si suru kwini nipucucubungane iniane ku la sapatarumarane.

Pangukai ki malavare ki taelrelreini ka ababai

¹¹ Ku Tamatama wadrekase ki Musi,

^12-14 malra kikai nipelaelane si pelaela ki swa Iseraylri. Lu ikai ku umawmase ku malavare ki labaibaini ka pasalriu iniane, la kanganga ki drumane ka sawvalai, si ngikakudrulru. Ai kikai kai maka wadulru ngiamialringa kwini iya, asi lwiyane kwini alisu alau lrika kadrwa ku tapathingalananeini, laka kadrwa ku peaelaela ngiamia kwini iya, kadrwa ku wamaca si pwalra, ku taingeane kwini alisu alau kadrwa ku pasalrivane ki taelrelreini, laka lavaarane ki taelrelreini sikakathane.

¹⁵ Kai lri susu ku tangimiamiane, kikai lasu lri tara iluku ki labaibaini mucucubungu ki barakalai. Lai lri iluku ku sapasikaiyane ki labaibaini ku sapatarumarane ku vaeva ki kukingi ku madradrau ka lrevege ka mugi. Kwini lasu kai lri maka gugu ku lawlau ki ulrive si drima ku sapasangulrelremane pubelenge; asi lwiyane kikai amani ku patarumara ki lasu ka malavare ki taelrelreini ka Taleke ka lrisi, pakai ku apathingalane ku tangimiamiane ka kaika Taleke ka lrisi.

¹⁶ Kwini barakalai lri iluku kwini ki ababai aru cucubungu, si acegecege icucubungu ki tapatarumaramarane.

¹⁷ Ku barakalai lri gugu pakatiki ku saniange ka acilai pikai ki kisi, la malra ku thuvugu kwini yakai ki Alrivilrivi ka balrawbau si sabulu pwa ki acilai,

¹⁸ ala lri lruka kwini nierecane ka isiu ki alisu, si malra kwini apatarumarane kwini Taleke ka lrisi pwa ki alrimaini. Ku barakalai lri malra kwini kisi pikai ki alrimaini, kwini kisi nipasuteane ku nipuswane ka mapaalili ka acilai.

¹⁹ Ku barakalai kiketeketa lai lri iya kwini ki alisu, si palraingi kwini sanaka takawrivane ki barakalai kikai yalebe, “Lwiyasi kaisu kanganga ki druma, kaisu lri tarumara kikai sapuswane kai ki mapalili ka acilai.

²⁰ Alaiyasi ka namangangasu mwa ki drumane,

²¹ ku Tamatama ani pangukai ki sakacekelesu pusu muswane; ani pawbalrake ki barangesu, si pawngerele ki talalakanesu.

²² Kikai acilai lu mwadringi ki barangesu, ani pawbalrake ki barangesu, ku talalakanesu lani aru mungerele.” Kwini ababai lri tubalre, “Palraingaku. Ku kidremedreme ki Tamatama ani tara ngimia.”

²³ Kwini barakalai lri malra kikai nipuswane pacase, si malra kikai nipacasane pwa ki yakisiane ka mapalili ka acilai sinau.

²⁴ Lu kaiyana paungulu ku barakalai kwini acilai ki ababai, (kikai acilai lri pakiangeange iniane turamuru,)

²⁵ Ku barakalai lri malra kwini yalrimane ki ababai ku Taleke ka lrisi, si icucubungu ki Tamatama lukaluku, la pwa ki tapatarumaramarane belenge,

²⁶ ala lri malra ku milrikinku pialrimane tusangulringavane, si pikai ki tapatarumaramarane lama pakawtu. Ku bibiilrilinga, ku barakalai lri malra kwini acilai ungula iya kwini ki ababai.

²⁷ Kwini alisu ala ka tengane ka manganga ki druma, kwini acilai lri pakiangeange, kwini barange lri kainganai mubalrake, mungerele ku talalakane. Kwini alisu lri kipusu ki lasakacekeleini.

²⁸ Kwi alisu alaiyasi ka kadrwa ku pasalriu, ka kai ngiakakudrulru, kwini alisu kai lri kipakadula, lri maka dulrwana tulalake.

^29-30 Kikai amani ku hulrice kwidra ki lasu ka malavare ki taelrelreini. Kwini ababai lri acegecege icucubungu ki tapatarumaramarane, ku barakalai lai lri marasikai kikai lrisi.

³¹ Ku tawane kadrwa ku pasalrivane, lwiyasi kwini ababai la ikai ku pasalrivane, lri tara siamece ku pasalrivane.